1 ሚርጌ ፓራሢንታ ሳርጌሎ ዖይቶንታ ፖኦሊሳኣ ዓኣ ዶዶ ማዔ ጊብፄኮ ዖሎ ዓሶ ጉሙርቂ ማኣዳሢ ዴንቃኒ ዒኢካ ዴንዳ ዓሶም ባዴዔ! ዔያታ ዒስራዔኤሌኮ ዱማዼ ናንጊና ናንጋ ጎዳ ማኣዶ ሺኢቁዋሴ፥ ሃሣ ዒዛኮ ዳምቦዋ ዔያታ ዔኩዋሴ። 2 ጋዓንቴ ናንጊና ናንጋ ጎዳ ዔሮኬ፤ ዱማ ዱማ ባይዛ ባኣዚያ ዒ ዔኪ ሙካኔ፤ ዒ ኬኤዜ ቃኣሎ ጊንሢም ማሁዋሴ፤ ፑርቶ ዓሶ ማኣሮና ዬያ ፑርቶ ዓሶ ማኣዳ ዓሶ ባይዛኒ ዒ ዔቃኔ። 3 ጊብፄ ዓሳ ዓሲ ማዓንዳፓዓቴም ፆኦሲቱዋሴ፤ ፓራሢያ ዔያቶኮ ሃይቃ ሼምፔና ዓኣያ ማዓንዳፓዓቴም ዓያናቱዋሴ፤ ናንጊና ናንጋ ጎዳ ዻጋዺ ዔቃ ዎዶና ማኣዳያ ማዔ ካኣቲ ዹቂንታንዳኔ፥ ማኣዲንታ ካኣቲያ ዶዓንዳኔ፥ ላምዓሢ ዎሊ ዔኪ ባይቃንዳኔ።

4 ናንጊና ናንጋ ጎዳ ታኣም ሂዚ ጌዔኔ፦ «ዞቢ ቆልሞ ዎዺ ጉዻ ዎዶና ቆልሞ ሄንቃ ናኣታ ዎሊ ዔኤሊ ዎዚ ዒላቴቴያ ዔያቶኮ ዒላታ ዞባሢ ዒጊቹዋሢጉዲ ታኣኒያ ቢያ ባኮ ዎይሣ ጎዳ ፂዮኔ ዹኮና ጌሜሮናይዳ ዖልዚሮ ኬዳንዳኔ። 5 ካፒ ፔኤኮ ማኣራ ዓኣ ናኣቶ ዔኤቢ ዔካያይዳፓ ቃዛኒ ባራኒ ዓጮ ሺራሢጉዲ ታኣኒ ቢያ ባኮ ዎይሣ ጎዳ ዬሩሳላሜ ዔኤቢ ሄሉዋጉዲ ቃዛንዳኔ፥ ላኣጋንዳኔ፥ ዓውሳንዳኔ፥ ዑፃኣ ሺሪያ ታ ዒዞ ዻቂሻንዳኔ።

6 «ዒስራዔኤሌ ዴሬዮቴ! ጋፒ ዒንሢ ዒፄሢ ባንሢ ማዑዋቴ! 7 ዒንሢኮ ጎሞ ኩጮና ቢሮንታ ዎርቆንታይዳፓ ዒንሢ ኮሼ ሜሌ ፆኦዞ ቢያ ዢቢ ዒንሢ ሃሻንዳ ዎዴ ሙካንዳኔ። 8 ዓሶኦሬ ዓሳ ዓሲሮ ማዒባኣ ጬንቻ ዓፓሮና ሃይቃንዳኔ፤ ዬያ ጬንቾ ዓፓሮ ቤርታ ዔያታ ዔቃዓኬ፤ ዔያቶኮ ዼጌ ዓሳ ዎልቄና ማዺሾ ማዾ ማዻንዳኔ። 9 ዲቃሣ ባኣዚ ሙካ ዎዶና ዔያቶኮ ዋርዲያ ዶዓንዳኔ፤ ዔያቶ ዖሎ ዓሶኮ ሱኡጋ ፔኤኮ ባንዴሮ ሃሺ፥ ጎጋይቂ ጎጋይቂ ጳሽካንዳኔ።» ታማ ፂዮኔይዳ፥ ናኣባና ዬሩሳላሜይዳ ማዔ ናንጊና ናንጋ ጎዳሢ ሃያ ኬኤዜኔ።