1 ዬኖ ዎዶና ካኣቲ ሂዚቂያሴ ሃርጊንቲ ሃይቃኒ ዑኬኔ፤ ዬያሮ ዓሞፄ ናኣዚ ፆኦሲ ማሊፆ ኬኤዛ ዒሲያሴ ዒዛ ዖኦጫኒ ዒዛ ኮራ ዓኣዻዖ፦ «ናንጊና ናንጋ ጎዳ፥ ‹ኔኤኒ ሃያ ሃርጋፓ ዓቲንዱዋኣሢሮ ኔኤኮ ማኣሮ ዔልቃሚ ጊኢጊሼ› ኔኤም ጌዔኔ» ጌዒ ኬኤዜኔ።

2 ዒማና ሂዚቂያሴ ፔኤኮ ዓኣፖ ካሮ ኮጮ ባንሢ ማሃዖ፦ 3 «ናንጊና ናንጋ ጎዳሢዮ! ታኣኒ ጉሙርቂሢና ጉቤ ዒናፓ ኔኤም ማዼሢንታ ኔኤኒ ዎዛዻ ባኣዚ ታ ማዼሢያ ማሌ» ጌዒ ሺኢቃዖ፥ ዒናፓ ዬኤኬኔ።

4 ዬካፓ ናንጊና ናንጋ ጎዳ ዒሲያሴም፦ 5 «ሂዚቂያሴ ኮራ ዓኣዺጋፓ ሂዚ ጌዔ፤ ‹ታኣኒ ናንጊና ናንጋ ጎዳ ማዔ ኔኤኮ ቤርታኣ ዓዳሢ፥ ዳውቴ ፆኦዛሢ ሺኢጲፆ ኔኤኮ ዋይዜኔ፤ ዓቢፆዋ ታ ኔኤኮ ዛጌኔ፤ ዬያሮ ታኣኒ ኔኤኮ ሌዖይዳ ታጶ ዶንጎ ሌዔ ቃሳንዳኔ፤ 6 ኔናንታ ሃኖ ዬሩሳላሜ ካታሜሎንታ ዓሶኦሬ ካኣቲ ኩጫፓ ታኣኒ ታኣሮ ዲሢ ማዒ ዓውሳንዳኔ› » ጌዔኔ።

7 ዒሲያሴ ዒዛም፦ «ናንጊና ናንጋ ጎዳ ጌዔ ቃኣሎ ማዺ ኩንሣንዳያ ማዒፆኮ ኔኤም ዒንጋ ማላታ ያዺኬ፤ 8 ካኣቲ ዓካኣዜ ጌዳሲ ጌዳሲ ኮሼ ኬኤሎ ዑፃ ሺባ ሺቦ ፆኦሲ ታጶ ጌዲ ጊንሢም ሊካ ኬይሲ ሺቢሳንዳኔ» ጌዔኔ፤ ዒማና ዬይ ሺባ ጌይንቴ ጎይፆ ሊካ ኬዲ ሺቤኔ።

9 ዬካፓ ሂዚቂያሴ ሃርጎይዳፓ ፖዓዖ ሃካፓ ዴማ ዓኣ ጋላቶ ዓይኑሞ ፃኣፔኔ፤

10 ሌዓ ታኣኮ ጊዴዶንዛታንቴ ታኣኒ ናንጉዋጉዲ ላኣጊንቲ

ሃይቄ ዓሶ ዓጮ ኬዳንዳሢ ታኣም ማሊንቴኔ።

11 ሼምፔና ዓኣ ዓሳ ናንጋ ሃኖ ዓጫ ዓኣዖ

ናንጊና ናንጋ ጎዳንታ ሼምፔና ዓኣ ማዢንቶ ቢያሢ ባኣካፓ

ዓሲ ላሚ ታ ዛጋዓ ጌዔንቴኬ።

12 ማኣራ ታኣኮ

ቆልሞ ሄንቃ ዓሶኮ ዓፒሎና ማዦና ማኣራ ቱጊንቲ ሙሊንታሢጉዲ

ዹይንቲ ጋፑዋንቴ ዶርዜ ዓፒላ ቲቃሢጉዲ

ናንጊና ናንጋ ጎዳ ናንጎ ታኣኮ ቃሚሢ ጋፒሴያ ማሌንቴኬ።

13 ሳዓ ካራንዳያ ሄላንዳኣና ዒላቴ ጎይሣ ታ ዎርቃኔ፤

ዞቢጉዲ ሜጌፆ ኔ ታኣኮ ሜንሤኔ፤

ዋኣንቴና ሮኦሪና ዋኣዪሢም ዓኣሢ ኔ ታና ዒንጌኔ።

14 ቦዖጉዲ ታኣኒ ዖኦላኔ፤

ዶኦሌጉዲ ዖዪ ታኣኒ ኩኩታኔ፤

ጫሪንጮ ባንሢ ዼጊ ጌዒ ዛጊፆና ዓኣፓ ታኣኮ ሚርጌና ላቤኔ፤

ናንጊና ናንጋ ጎዳሢዮ! ሃዳራ ሃያ ሜታሢዳፓ ታና ዓውሴ!

15 ሃያ ቢያ ማዼሢ ናንጊና ናንጋ ጎዳታሢሮ

ታኣኒ ዓይጎ ጋዓኒ ዳንዳዓይ?

ታኣኮ ዖዪፆይዳፓ ዔቄያና ጊንዓ ታኣኮ ባይቄኔ።

16 ሼምፓሢ ኔጊዳፓ ታኣኮ ናንጊ ዴንቄኔ፤

ኔኤኒ ታኣኮ ዓያኖም ሃውሺሢ ዒንጌኔ፤

ኔኤኒ ታና ኮሺ ማሄኔ፤

ናንጊያ ታኣም ዒንጌኔ።

17 ሜታሢ ታና ሄሌሢ ጎኔና ታኣኮ ዻቂንታምኬ፤

ሜቶይዳፓ ቢያ ሼምፓሢ ኔኤኒ ታኣኮ ዓውሴኔ፤

ጎሞዋ ኔ ታኣኮ ቢያ ዓቶም ጌዔኔ።

18 ሃይቄ ዓሶ ዓጫ ኔና ጋላቱዋሴ፤

ሃይቄ ዓሳኣ ኔና ጋላታኒ ዳንዳዑዋሴ፤

ዱኡቴ ዓሳ ኔኤኮ ጉሙርቂንታያ ማዒፆ ዎዛ ማሂ ካፑዋሴ።

19 ታኣኒ ኔና ጋላታሢጉዲ

ኔና ጋላታኒ ዳንዳዓሢ ሼምፔና ዓኣዞንሢ ሌሊኬ፤

ዓዶንሢ ፔኤኮ ናኣቶም ኔኤኮ ጉሙርቂንታያ ማዒፆ ኬኤዛኔ።

20 ናንጊና ናንጋ ጎዳ ታና ዓውሳንዳኔ፤

ዬያሮ ኑኡኒ ኑኡኮ ናንጎ ዎዶይዳ ቢያ

ዴንሦና ሻሺ ዓኣ ጎኦላና

ፆኦሲ ቦንቾም ማዓ ዓይኑሞ

ፆኦሲኮ ጌኤዦ ማኣራ ኑ ዓይናዻንዳኔ።

21 ቤሌሶ ዓኣፓፓ ኮሺንቴ ቲሺና ካኣቲኮ ኪፄ ዱንጮይዳ ቲሽኬቴ ፓፃንዳያ ማዒፆ ዒሲያሴ ዬያኮ ቤርታ ዓሶም ኬኤዜኔ።

22 ካኣቲ ሂዚቂያሴያ፦ «ታኣኒ ፖዒ ጌኤዦ ማኣሪ ዓኣዻኒ ዳንዳዒፆ ዔርዛ ማላታ ዓይጎናንዳይ?» ጌዒ ዒሲያሴ ኮራ ዖኦጬኔ።