1 ዴራ ሂዚ ጋዓንዳኔ፦

«ኑኡኒ ኬኤዛ ባኮ ዖኦኒ ጎኔኬ ጌዔይ?

ናንጊና ናንጋ ጎዳኮ ዎልቃ ዖኦም ፔጋዺ ጴዼይ? ✝53፡1 ዮሃ. 12፡38፤ ሮሜ 10፡16።

2 ፆኦሲ ዓይላሢ ፃኣዺ ሳዓይዳ ባቃሌ

ባቃሊጉዲ ፃጲ ዳኪ ዑጌኔ፤

ኑ ዛጋንዳጉዲ ሚዛጱሞንታ

ቦንቾዋ ዒዛኮ ባኣሴ፤

ዒዛ ኑ ናሽካንዳጉዲ

ዒዛኮ ሱጉሢ ሚዛጱዋሴ።

3 ዒዚ ዓሲና ቦሂንቴያና ዒፂንቴያኬ፤

ዒዚ ሜታዻያና ዖዖያ ዓሲኬ፤

ዓሳ ዒዛ ዛጋኒ ዓኣፖ ሺርሻንዳያ ሄላንዳኣና

ዒዚ ቦሂንቴያኬ፥ ኑኡኒያ ዒዛ ቦንቺባኣሴ።»

4 «ጎኔና ዒዚ ኑኡኮ ዶርዓሢ ዔኬኔ፥ ሃርጎዋ ዒዚ ኑኡኮ ኬዴኔ፤

ኑኡኒ ጋዓንቴ ፆኦሲ ዒዛ ጳርቄም

ሎኦሜያና ኪፃዼያ ማሂ ዛጌኔ። ✝53፡4 ማቲ. 8፡17።

5 ዒዚ ጋዓንቴ ጫርጊንቲ ኪፃዼሢ ኑኡኒ ፑርቴሢሮኬ፤

ዒዚ ጋኣጪንቴሢያ ኑ ዻቢንቶሮኬ፤

ኑኡኒ ዻቄሢ ዒዚ ዔኬ ሜታሢናኬ፤

ዒዛ ኪፃዺፆና ኑ ፓፄኔ። ✝53፡5 1ጴፂ. 2፡24።

6 ኑ ቢያሢ ማራይጉዲ ዣኣሌኔ፤

ቢያሢ ኑኡኒ ኑ ማሊፆ ጎይፆ ዓኣዼኔ፤

ናንጊና ናንጋ ጎዳ ጋዓንቴ ኑና ቢያሢኮ ዻቢንቶ ዒዛ ኬዲሴኔ።» ✝53፡6 1ጴፂ. 2፡25።

7 «ዒዛ ጌኔ ማዾና ሜቶና ሄሌኔ፤

ያዺ ማዔቶዋ ዔኤቢያ ዒ ጌዒባኣሴ፤

ሹኪንታኒ ዔኪ ዓኣዺንታ ማራናይና

ዑፃፓ ጋፓኖ ታይዛ ዓሶ ቤርታ ዚቲ ጋዓ ማራይጉዲ

ዚቲ ጌዔያፓ ዓቴም ዔኤቢ ጌዒባኣሴ። ✝53፡7 ዮሃ. ፆፔዻ 5፡6።

8 ዻቤ ባኣዚ ባኣንቴ ጌኔ ዎጌና ዒ ሃይቄኔ፤

ዬይ ማዓንዳሢ ቤርታዺ ዔሪ ጶቂሣኒ ዖ ዳንዳዔይ?

ጋዓንቴ ታኣኮ ዴሮ ዻቢንቶሮ ዒ ጳርቂንቴኔ፤

ዓሳ ናንጋ ዓጫፓ ዒዚ ሺኢኬኔ። ✝53፡8 ዳኪ. ማዾ 8፡32-33።

9 ዔኤቢ ፑርታ ባኣዚ ማዹዋዖ

ዒዛኮ ዻንጋፓኣ ሉኡዙሞ ኬስኩዋንቴ

ዒዚ ሃይቦና ፑርቶ ዓሶ ባኣካ ፓይዲንቴኔ፤

ዖርጎጮናኣ ዎላ ዒዚ ዱኡቴኔ።» ✝53፡9 1ጴፂ. 2፡22።

10 ዬይ ጋኣጪንቲፆና ሜታዺፃ ዒዛ ሄሌሢ

ናንጊና ናንጋ ጎዳኮ ማሊሢ ማዔምኬ፤

ዒዚ ዒዛኮ ሼምፓሢ ጎሜሮ ዒንጎ ዒንጊሢ

ማሂ ሺኢሼቴያ

ዒዚ ፔ ዜርፆ ዛጋንዳኔ፥ ናንጎ ሌዓኣ ዒዛኮ ዖዶቃንዳኔ፤

ናንጊና ናንጋ ጎዳኮ ማሊፃ ዒዛና ኩማንዳኔ።

11 ታኣኮ ፂሎ ማዔ ዓይላሢ ዋኣዬስካፓ ናንጎ ፖዖ ዛጊ ዎዛዻንዳኔ፤

ፔኤኮ ዔራቶና ሚርጌሢ ዒ ፂሊሳንዳኔ፤

ዔያቶኮ ዻቢንቶዋ ዒዚ ኬዳንዳኔ።

12 ዒዚ ፔኤኮ ሼምፓሢ ሃይቢም ዓኣሢ ዒንጌኔ፤

ፑርቶ ማዻ ዓሶና ዎላ ዒ ፓይዲንቴኔ፤

ያዼ ማዔያታቴያ ዒዚ ሚርጌ ዓሶኮ ጎሞ ኬዴኔ፤

ዻቢንቶ ዓሶ ዛሎዋ ዒ ቃይሼኔ፤

ዬያሮ ታኣኒ ዒዛ ዼኤፖ ዓሶ ባኣካ ማሂ ዒዛ ሄላ ዛሎ ዒንጋንዳኔ፤

ዔርቴ ዓሶና ዎላ ዲዒንቴ ባኮ ዒ ጊሽታንዳጉዲ ታ ማሃንዳኔ። ✝53፡12 ማር. 15፡28፤ ሉቃ. 22፡37።