Isaías 63

ፆኦሲኮ ባሺፆና ዓውሳ ዎልቆና

1 ሃይ፥ ዔዶኦሜ ዓጫ ዓኣ ባሶራ ካታማፓ ዼኤፖ ዞቄ ዖዶዞ ማኣዓሢ ማይንቲ ሙካሢ ዖናዳይ? ሃይ ዼኤፖ ዎልቆና፥ ጊንሣ ሃሣ ዲቃሢ ሄርሺሳ ማኣዓሢ ማይንቲ ሙካሢ ዖናዳይ? «ፂሉሞና ጌስታያ፥ ዻቂሻኒያ ዎልቃ ዓኣሢ፥ ታና ናንጊና ናንጋ ጎዳኬ።»

2 «ኔኤኮ ማኣዓሢ ዎይኖ ሄርቂ ጩኡጳ ዓሶ ማኣዓሢጉዲ ዓይጋ ዞቄይ?»

3 ናንጊና ናንጋ ጎዳ ሂዚ ጌዒ ማሃኔ፦ «ታኣኒ ታኣሮ ሌሊ ዴሮ ቢያ ዎይኖጉዲ ሄርቄኔ፤ ዬያ ታኣኒ ማዻ ዎዶና ዴሮይዳፓ ታኣና ዎላ ዖኦኒያ ባኣሴ፤ ታኣኒ ታኣኮ ዻጎና ዔያቶ ሄርቄኔ፤ ታኣኮ ዱማ ዱማ ባይዛ ባኮና ታ ዔያቶ ጋኣጬኔ፤ ዬማና ዔያቶኮ ሱጉፃ ዓፒላ ታኣኮ ፑኡኪንቴኔ። ✝63፡3 ዮሃ. ፆፔዻ 14፡20፤ 19፡13፤ 15። 4 ታኣኒ ኮሞ ኮፃንዳ ኬሊ ሜንሤኔ፤ ታኣኒ ታኣኮ ዴሮ ዓውሳንዳ ዎዴ ሄሌኔ። 5 ታኣኒ ታኣኮ ኮሮ ዛጋንቴ ታና ማኣዳንዳይ ዖኦኒያ ባኣሴ፤ ዬያሮ ዲቃቲ ታኣኒ ሄርሼኔ፤ ታኣኮ ዼኤፖ ዻጎና ታኣኒ ታኣሮ ሌሊ ዖሊ ባሼኔ። ✝63፡5 ዒሲ. 59፡16። 6 ዓሶ ታኣኒ ታ ዻጎና ዓኪ ኬኤሬኔ፤ ታኣኮ ዼኤፖ ዻጎ ታ ዔያቶ ዔርዜኔ፤ ዔያቶኮ ሱጉፆዋ ሳዖይዳ ታኣኒ ላኣሌኔ።»

ናንጊና ናንጋ ጎዳ ዒስራዔኤሌ ዓሶ ሚጪንቴሢ

7 ናንጊና ናንጋ ጎዳኮ ኮሹሞ

ዒዚ ኑኡም ማዼ ባኮ ቢያ

ዒዛኮ ጋላቲሳ ማዾ

ዒዛኮ ናሹሞና ኮሹሞ ሚርጉሞጉዴያ

ዒስራዔኤሌ ማኣሮም ዒ ማዼ ባኮ

ሂዮ ዒ ማዼ ኮዦ ባኮ ታኣኒ ኬኤዛንዳኔ።

8 ናንጊና ናንጋ ጎዳ፦ «ጎኔና ዔያታ ታ ፃጲና ሉኡቁዋ ታኣኮ ዓቲንቆ ናኣቶኬ» ጌዔኔ። ዔያቶ ዒዚ ዓውሳሢ ማዔኔ። 9 ዔያቶኮ ሜታሢ ዎዶና ቢያ ዒዚ ሜታዼኔ፤ ዒዛኮ ቤርታ ዔቃ ኪኢታንቻሢ ዔያቶ ዓውሴኔ፤ ዒ ፔ ናሹሞና ፔ ማኣሪፆና ሄሊ ዔያቶ ማሂ ሻንቄኔ፤ ሚና ዔያቶ ዒ ሳዓፓ ዔኪ ኬዴኔ። 10 ጋዓንቴ ዔያታ ዒዛም ዋይዞ ዒፂ ጌኤዦ ዓያኖዋ ዖዪሴኔ፤ ዬያሮ ዒዚ ዔያቶ ባንሢ ሺሪ፥ ፔኤሮ ዔያቶ ዒ ዖሌኔ።

11 ዬካፓ ዴራ ናንጊና ናንጋ ጎዳ ዓይላሢ፥ ሙሴ ናንጌ ዎዶ ማሊ ጶቂሥሢና ሂዚ ጌዔኔ፦ ዒዛኮ ቆልሞ ሄንቃ ሱኡጎና ዎላ ባዛፓ ዔኪ ኬሴሢ ዓንካ ዓኣይ? ፔኤኮ ጌኤዦ ዓያኖዋ ኑ ባኣካ ማሄሢ ዓንካ ዓኣይ? 12 ዒዛኮ ቦንቺንቴ ዼኤፖ ዎልቆ ሙሴና ዎላ ዒ ማሄኔ፤ ዒዛኮ ናንጊና ናንጋ ሱንሢ ማዓንዳጉዲ ዋኣፆ ዔያቶኮ ቤርታ ዒ ፓቄኔ። ✝63፡12 ኬሲ. ማፃ 14፡21። 13 ፓራ ቦኦሊዳ ሃንታያጉዲ ዔያቶ ዒ ዼኤፖ ዋኣፆ ቁልቦና ዔኪ ፒንሤኔ፤ ዬያሮ ዔያታ ዹቂንቲባኣሴ። 14 ዶኦጫዻ ቤሲና ዓኣዻ ቆልሞጉዲ ናንጊና ናንጋ ጎዳኮ ዓያና ሃውሺሢ ዔያቶም ዒንጌኔ፤ ዒዛኮ ሱንፃ ቦንቺንታንዳጉዲ ዴሮ ዒዛሲ ዒ ዬያይዲ ዔኪ ዓኣዼኔ።

ማኣሪሢና ማኣዶና ዴንቃኒ ሺኢቂንቴ ሺኢጲሢ

15 ናንጊና ናንጋ ጎዳሢዮ! ኔኤኮ ዱማዼ ቤዞና ቦንቺንቴ፥ ኔኤኒ ናንጋ ጫሪንጫፓ ሊካ ዛጌ፤ ኔኤኒ ሌሊ ካኣሽኪንታኒ ኮዓ ማሊፆንታ ዎልቆንታ ኔኤኮ ዓንካ ዓኣይ? ኔኤኮ ኮሹሞ ማሊፆንታ ሚጪንቲፆንታ ዎካዳዖ? ዬንሢ ኑ ኮራፓ ሃኬኔ። 16 ዓብራሃሜ ኑና ዔሪባኣያታቴያ፥ ዒስራዔኤሌ ዓሳ ኑና ማሊ ጶቂሢባኣያታቴያ ኔኤኒ ኑኡኮ ዓዶኬ፤ ናንጊና ናንጋ ጎዳሢዮ! ኔ ኑ ዓዳሢኬ፤ ሚናኣፓ ዓርቃዖ ኑና ዓውሳሢ ኔ ሱንፆኬ። 17 ናንጊና ናንጋ ጎዳሢዮ! ኔኤኒ ዓይጎሮ ኔ ጎይፆ ኑና ዻቢሴይ? ኔና ኑ ዒጊጩዋጉዲያ ዒኖ ኑኡኮ ኔ ዓይጋ ባይዜይ? ኔ ዓይሎሮ ጌዒ፥ ኔ ዴኖሮዋ ጌዒጋፓ ሃዳራ ኑ ባንሢ ማዔ።

18 ዻካ ዎዴም ሌሊ ኔኤኮ ጌኤዦ ማኣራ ኔኤም ዱማዼ ዴሮሮ ማዔኔ፤ ሃሢ ጋዓንቴ ኑኡኮ ሞርካ ዒኢካ ጌሌኔ። 19 ኑኡኒ ኔኤና ቆሊንቲባኣያና ኔ ሱንፆና ዔኤሊንቲባኣ ፃጲጉዲ ማዔኔ።