1 ዬንሢ ቤርታ ሜታዼዞንሢ ጋዓንቴ ላሚ ሜታ ሄላዓኬ።

ሚናኣ ዎዶና ዛብሎኦኔንታ ኔፒታኣሌሜንታ ዓጫ ቶኦቺንቲ ናንጌኔ፤ ሙካ ዎዶይዳ ጋዓንቴ ሜዲቴራኒያ ባዞኮ ዓባ ኬስካ ባንፃፓ ዓርቃዖ ዴንዲ ዮርዳኖሴ ሱኮ ሄላንዳኣና ዓኣ፥ ባሼ ሜሌ ዴራ ማዢ ዴዔ ጌሊላ ዓጫ ቦንቺንታንዳኔ። ✝

2 ዹሞይዳ ናንጋ ዴራ

ሃሢ ዼኤፒ ፖዒ ዛጌኔ፤

ሃይቦ ሺቦ ዓጮይዳ ናንጋዞንሢማኣ ቢያ ፖዒ ኬስኬኔ። ✝

3 ናንጊና ናንጋ ጎዳሢዮ! ዴሮ ኔኤኮ ኔ ሚርጊሼኔ፤

ዔያቶም ዎዛ ኔ ዺቢሼኔ፤

ዓሲ ማኣሊ ቡራ ዎዶና

ሃንጎ ዔኤቢ ዲዒ ዔካኣና ዎዛዻሢጉዲ

ኔኤኮ ዴራኣ ኔ ማዼ ባኮና ዎዛዻኔ።

4 ሚና ቤርታ ኔ ሚዲያሜ ዓሶ ባሼሢጉዲ

ሃሢያ ኔኤኮ ዴሮ ባቃና ጌሢ ዎይሦ ቃንባሮንታ

ዔያቶኮ ጊኢሮ ጳርቃ ኮኦሎ ኔ ሜንሤኔ፤

ሃሣ ዴሮ ኔኤኮ ዋዪሲ ዎይሣሢያ ኔ ባሼኔ።

5 ዖሎ ዓሶኮ ዱርዛ ቢያ

ዔያቶኮ ሱጉፆ ሙላኮና ዓፒላኣ ቢያ

ታሚዳ ሚቺንታያ ማዓንዳኔ፤

ሃንፂሌጉዲ ማዒያ ዔኤሢንታንዳኔ።

6 ሃይሾ ናይ ኑኡም ሾይንቴኔ፤

ዓቲንቄ ናይያ ኑኡም ዒንጊንቴኔ፤

ዒዚያ ሱኡጌ ማዓንዳኔ፤

ሱንፃ ዒዛኮ፦ «ዞሪፆና ዲቃሢ ሄርሺሳያ፥ ዎልቄና ዼኤፒ ፆኦሲ፥

ናንጊና ናንጋ ዓዶ፥ ኮሹሞኮዋ ሱኡጌ» ጌይንታንዳኔ።

7 ዒዛኮ ካኣቱሞ ቢታንቶኮ ዛጲ ባኣሴ፤

ካኣቱማ ዒዛኮ ናንጊና ኮሹሞ ኩሜያ ማዓንዳኔ፤

ሃኖይዳፓ ዓርቃዖ ናንጊና ናንጊ ሄላንዳኣና

ዳውቴኮ ካኣቱሞ ዖይታ ዾቂንቲ ዶዳንዳጉዲ ማሃንዳኔ፤

ቢያ ባኮ ዎይሣ ጎዳ ማዔ ፆኦዛሢኮ

ፔ ጊዳፓ ሜሌ ካኣሽኪንቶም ኮዑዋ ዒና ዬያ ማዻኒ ማሊ ቱኬኔ። ✝

8 ናንጊና ናንጋ ጎዳ ያይቆኦቤ ዜርፆ ዒስራዔኤሌ ዑፃ ዎጋንዳ ዎጌ ቃኣላ ዳኬኔ፤ ዬይ ዎጋ ማዾይዳ ፔኤቃንዳኔ። 9 ዒስራዔኤሌ ዴሮና ሳማሪያ ካታማ ናንጋዞንሢ ቢያ ዬያ ማዼሢ ፆኦሲታሢ ዔራንዳኔ፤ ጋዓንቴ ዖቶርቃ ዓሲና ዋይዚ ዒፃ ዓሲ ማዒ፦ 10 «ፁኡቤ ጌይንታ ባኮይዳፓ ኮሺንቴ ኬኤላ ዶዔኔ፤ ኑኡኒ ጋዓንቴ ጊንሣ ዓርሲንቴ ሹቺና ኬልቃንዳኔ፤ ቦኦቦ ሚፆና ኮሺንቴ ቱርቱራ ሜቄኔ፤ ኑኡኒ ጋዓንቴ ዶኦሪንቴ ሊባኖኦሴ ሚፆ ቤዛ ዓኣሣንዳኔ» ጋዓንዳኔ።

11 ናንጊና ናንጋ ጎዳ ዔያቶኮ ሞርኮ ማዔ ዓሶ ዔቂሲ ዔያቶ ዖሊሻንዳኔ። 12 ሶኦሪያ ዓሶ ዓባ ኬስካ ባንፃፓ፥ ፒልስፄኤሜ ዓሶ ዓባ ጌላ ባንፃፓ ዳኪ ዒስራዔኤሌ ዓሶኮ ካራ ታይዚ ዓርቂሴኔ፤ ዬይ ቢያ ያዺ ማዔንቴ ፆኦሲኮ ዻጋ ሺሚባኣሴ፤ ዒዛኮ ዔያቶ ሜታሳኒ ዔቄ ኩጫ ማዒባኣሴ።

13 ዴራ ጋዓንቴ ዔያቶ ሜታሴ ናንጊና ናንጋ ጎዳ ባንሢ ማዒባኣሴ፤ ጊንሣ ዒዛ ኮዓያ ማዒያ ጴዺባኣሴ። 14 ዬያሮ ናንጊና ናንጋ ጎዳ ፔቴ ኬሊዳ ዒስራዔኤሌ ዓሶ ባኣካ ቶኦኪ ሃሣ ዑንኪ ማዔ ዓሶ፤ ጊንሣ ሃሣ ሜኤፄና ካኣፖናጉዲ ፓይዲንታዞንሢ ቲቂ ሺኢሻንዳኔ። 15 ቶኦኮ ጌዒንቴዞንሢ ጪሞና ቦንቺንታ ሱኡጎናኬ፤ ዑንኮ ጌይንቴዞንሢ ሉኡዙሞና ፆኦሲ ማሊፆ ኬኤዛዞንሢኬ። 16 ሃያ ዴሮ ዔኪ ዓኣዻ ዓሳ ዻቢሼኔ፤ ዴራኣ ጎይፃፓ ኬስኪ ዣኣሌኔ። 17 ዬያሮ ናንጊና ናንጋ ጎዳ ዼጌሢ ሜታሳንዳኔ፤ ላኣሎ ዜኤሮ ዒንዶንሢና ዲቻ ዓሳባኣ ዜኤሮ ናኣቶም ሚጪንቲንዱዋሴ፤ ፔቴ ፔቴሢ ቢያ ጋኣዳያና ፑርታ ማዻያ ማዔኔ፤ ፔቴ ፔቴ ዓሶ ዒንዲርዛፓ ጌስቲንታ ሃይሳ ጌኔ ኩሜያኬ፤ ዬይ ቢያ ማዔቴያ ፆኦሲኮ ዻጋ ሃጋ ሺሚባኣሴ፤ ዒዛኮ ዔያቶ ሜታሳኒ ዔቄ ኩጫ ማዒባኣሴ።

18 ዴሮኮ ፑርቱማ ታሚጉዲ ዔኤታኔ፤ ጋውዶንታ ዓንጊፆንታ ዴኤሎ ካዮዋ ሙዓኔ፤ ዬያኮ ጩባ ኬስካኣና ሙሊንቲ ቱርቱሪ ዔቄያ ማላኔ። 19 ቢያ ባኮ ዎይሣ ጎዳሢ ዻጋዼኔ፤ ዒዚ ዓጋ ሜታሢ ዓጬሎይዳ ቢያ ታሚጉዲ ዔኤታንዳኔ፤ ዴራ ዒማና ሃንፂሌጉዲ ማዓንዳኔ፤ ጌርሲ ጌርሲም ሚጪንቲንዱዋሴ። 20 ፔቴ ዛሎና ዔያታ ሙዓኔ፥ ጋዓንቴ ዔያታ ናይዼ ጎይሣኬ፤ ዬያጉዲ ባጎ ዛሎና ሹኡሪ ኩኡላኔ፥ ጋዓንቴ ዔያታ ሚሽኩዋሴ፤ ፔቴ ፔቴ ዓሳ ፔኤኮ ዒጊኖ ዓሽኮ ሙሙዓኔ። 21 ዬይያ፦ ሚናኣሴ ዔፕሬኤሜ፥ ዔፕሬኤሜያ ሚናኣሴ ሙዓንዳኔ፤ ላምዖ ፃጳ ዎላ ፔቴ ማዒ ዪሁዳ ዖላኒ ኬስካንዳኔ፤ ዬይ ቢያ ማዔንቴ ናንጊና ናንጋ ጎዳኮ ዻጋ ሃጊ ሺሚባኣሴ፤ ዔያቶ ሜታሳኒ ዒዛኮ ዔቄ ኩጫ ቤዛኣኬ።