ዒዮቤኮ ጋፒንፆ ሃይሶ
1 ዒዮቤ ኬኤዛዖ፦
2 «ታኣኮ ሃሣኣ ናንጋ
ፆኦሲ ታና ቤርታ ካፓ ዎዶጉዲ ማዔቴ
ዎዚ ታና ዎዛሳንዳይ!
3 ዬያ ዎዶና ዹማ ታ ዓኣዻኣና
ፆኦሲ ፔኤኮ ፖዖ ታኣም ፖዔም
ፖዒዳ ታ ሃንታኔ።
4 ፆኦሲ ታኣና ታ ማኣሮ ዓሶና ካፓ
ታኣኮ ዼጋቶ ዎዶጉዲታቴ
ታ ዓይጎ ጋዓንዳይ!
5 ቢያ ባኮ ዳንዳዓ ጎዳ ሃጊ ታጊዳፓ ዱማዺባኣሢሮ
ናኣታ ታኣኮ ቢያ ኮይላ ዓኣኔ።
6 ቶኮ ታኣኮ ታ ዲኢቂና ማስታንዳያ ሄላንዳኣና
ሚርጌ ዲኢቂ ታ ዴንቃኔ።
ታኣኮ ሪሚቶ ሚፃ ሃኣቾ ሳዖይዳ ቱኪንቴንቴታዖ
ዲጲጉዲ ዎታ ሚርጌ ዛይቴ ታ ዔካኔ።
7 ካታማ ዓሳ ቡኪንታ ጶኦኮ ታ ዓኣዺ
ዎጎ ዎጋ ቤዛ ዴዔ ዎዶና
8 ዼጌሢ ታና ዛጋዖ ቦንቾና ታ ቤርታፓ ሺሺኢካኔ፤
ጋርቾ ዓሳኣ ታና ቦንቺ ዴዔ ቤዛፓ ዔቃኔ።
9 ዴሮም ጌስቲ ጌስቲ ዓኣ ሱኡጋኣ ታና ዛጋኣና
ኩጮና ፔኤኮ ዻንጎ ዓርቂ ዚቲዮ ጋዓኔ።
10 ዓጮኮ ቢቶ ማዔ ዓሳ ታ ዓኣ ቤዞይዳ ዚቲ ጋዓኔ፤
ዒንዲርዛ ዔያቶኮ ቱኡቲ ጌስታኒ ዔያቶ ባሻኔ።»
11 «ዋይዜ ዓሲ ቢያ ታና ሄርሻኔ፤
ዛጌሢያ ቢያ ታና ጋላታኔ።
12 ዬይ ያዺ ማዔሢ፦
ማንቆ ዓሶኮ ዒላቶ ታ ዋይዚ ዓውሳያና
ዜኤሮ ናኣቶዋ ታ ማኣዳሢሮኬ።
13 ሃይቃኒ ዑኪ ዓኣ ዓሶ ታ ማኣዴሢሮ
ዔያታ ታና ዓንጄኔ፤
ዜኤሮ ዒንዶ ማዔ ላኣሎዋ ታ ማኣዳሢሮ
ዎዛና ዔያታ ፆኦሲ ቦንቾም ዓይኑሞ ዓይናዻኔ።
14 ፂሉሞ ዓዳ ማኣዖጉዲ ታ ማይንቴኔ፤
ፒዜ ዎጌያ ዓዳ ዼኤፒ ኮኦቴጉዲ
ቃሲ ታ ማይንቴኔ፤ ቆኦቤጉዲያኣ ቶኦካ ታ ዓጌኔ።
15 ዓኣፓ ባይቄሢም ዓኣፒ
ዎቦ ዓሶኮዋ ታኣኒ ቶኪኬ።
16 ማንቆ ዓሶኮ ታኣኒ ዓዶ፤
ታ ዔሩዋ ዓሶማኣ ታኣኒ ታርዤኬ።
17 ጌናሢኮ ባንጋሎ ታ ሜንሤኔ፤
ሙዓኒ ዒ ዓርቄሢ ዻንጋፓ ታ ኬይሲሴኔ።»
18 « ‹ታኣኮ ናንጎ ሌዓ ማኣሻላጉዲ ሚርጌም
ታ ማኣራ ቦንቾና ዓኣዖ ታ ሃይቃንዳኔ› ታ ጌዔኔ።
19 ፃጳ ታኣኮ ቢያ ዎዴ ዋኣሢ ዴንቃያና
ካኣፓኣ ዖልካዻ ሚሢጉዲኬ።
20 ቢያ ዎዴ ቦንቺንቴ ጎይሣ ታ ናንጋኔ፤
ዎልቃኣ ታኣኮ ቢያ ዎዴ ዓኪ ማዓኔ።
21 ዓሳ ታኣም ዋይዚ ዚቲ ጋዓኔ፤
ታ ዞሮ ዚቲ ጌይ ዒናፓ ዔያታ ዋይዛኔ።
22 ጌኤዛ ታኣሲ ዔያቶኮ ዼኤቦ ዛኣራያታሢሮ
ታ ጌስቴስካፓ ሜሌ ጌስታ ዓሲ ባኣሴ።
23 ጎሽካ ዓሲ ሌዔ ዒርዚ ዴንቃኒ ኮዓሢጉዲ
ዔያታ ታ ጌኤዞ ዋይዛኒ ዻንጎ ፔኤሲ ሃሺ ካፓኔ።
24 ታ ዓኣፖ ካሮ ፖዒሲ ታኣኒ ሙስታዛ
ካርቴ ዓኣፖ ካራ ዔያቶኮ ቡሊንቲ ፖዓኔ።
25 ታኣኒ ታ ኮዔሢ ጎይፆ ዔያቶ ዎይሣኔ፤
ዖሎ ዓሶ ፔኤኮ ዔኪ ዓኣዻ ካኣቲጉዲ
ታ ዔያቶ ዔኪ ዓኣዻኔ፤
ዔያታ ዖያ ዎዶናኣ ታ ዔያቶ ዶዲሻኔ።»