ኔሄሚያ ማፃኣፖ 10

1 ዱማሲ ዔርዛ ባኮ ዓይሤ ዓሳ ሃካሊያ ናኣዚ ዓጮ ዎይሣሢ ኔሄሚያ፥ ሴዴቂያሴ፤

2-8 ቄኤሶ ፃጳፓ፦

ሴራያ፥ ዓዛሪያ፥ ዔርሚያሴ፥

ፓሽሁሬ፥ ዓማሪያ፥ ማልኪያ፥

ሃፁሼ፥ ሼባኒያ፥ ማሉኬ፥

ሃሪሜ፥ ሜሬሞቴ፥ ዓብዲዩ፥

ዳኣኔኤሌ፥ ጊኔቶኔ፥ ባሩኬ፥

ሜሹላሜ፥ ዓቢያ፥ ሚያሚኔ፥

ሜዓዝያ፥ ቢልጋዬና ሼማዒያናኬ።

9-13 ሌዊ ዓሶ ፃጳፓ፦

ዓዛኒያ ናኣዚ ዒያሱ፥

ሄናዳዴ ናኣዚ ቶኦኮ ማዔሢ ቢኑዬ፥

ቃድሚዔኤሌ፥ ሼባኒያ፥ ሆዲያ፥

ቄሊፃ፥ ፔላያ፥ ሃናኒ፥

ሚካ፥ ሬሆቤ፥ ሃሻቢያ፥

ዛኩሬ፥ ሼሬቢያ፥ ሼባኒያ፥

ሆዲያ፥ ባኒንታ ቤኒኑንታኬ።

14-27 ዴሮኮ ሱኡጎ ፃጳፓ፦

ፓርዖሼ፥ ፓሃትሞዓኣቤ፥

ዔላኣሜ፥ ዛቱ፥ ባኒ፥

ቡኒ፥ ዓዝጋኣዴ፥ ቤባዬ፥

ዓዶኒያ፥ ቢግዋዬ፥ ዓዲኔ፥

ዓፄሬ፥ ሂዚቂያሴ፥ ዓዙሬ፥

ሆዲያ፥ ሃሹሜ፥ ቤፃዬ፥

ሃሪፔ፥ ዓናቶቴ፥ ኔባዬ፥

ማግፒዓሼ፥ ሜሹላሜ፥ ሄዚሬ፥

ሜሼዛቤሌ፥ ፃዶቄ፥ ያዱዓ፥

ፔላፂያ፥ ሃናኒ፥ ዓናያ፥

ሆሴዔ፥ ሃናኒያ፥ ሃሹቤ፥

ሃሎሄሼ፥ ፒሊሃ፥ ሾቤቄ፥

ሬሁሜ፥ ሃሻቢና፥ ማዕሴያ፥

ዓኪያ፥ ሃናኒ፥ ዓናኒ፥

ማሉኬ፥ ሃሪሜና ቤዓናኬ።

ጊኢጊ ዎላ ቱኮና ባኮ

28 ዓቴ ሃንጎ ዓሳ፥ ቄኤሳ፥ ሌዊ ዓሳ፥ ጌኤዦ ማኣሮ ካፓ ዓሳ፥ ጌኤዦ ማኣራ ፆኦሲ ቦንቾም ዓይኑሞ ዓይናዻ ዓሳ፥ ጌኤዦ ማኣሮይዳ ማዻ ዓሳ፥ ፆኦሲ ዎጎም ዓይሢንታያ ማዔ ኑ ዓሺኖይዳ ናንጋ ሜሌ ዓጮ ዴሮይዳፓ ፔና ዱማሴ ዓሳ ፔኤኮ ላኣሎንታ ዓቲንቆንታ ዉዱሮ ናኣቶንታ ዎላ፥ 29 ዬያታ ቢያ ፔኤኮ ጌርሲንሢ ማዔ ሱኡጎና ዎላ ፔቴ ማዒ ፆኦሲ ዓይላሢ ሙሴ ዛሎና ዒንጊንቴ ናንጊና ናንጋ ጎዳ ማዔ ኑ ፆኦዛሢኮ ዓይሢፆም፥ ዎጎና ዳምቦናም ቢያ ዓይሢንታያ ማዓኒ «ዓይሢንቲባኣቴ ኑና ባይዞም!» ጌይ ጫኣቄኔ።

30 ኑ ዓሺኖይዳ ዓኣ ሜሌ ዴሮም ኑኡኮ ዉዱሮ ናኣቶ ዔያቶኮ ዓቲንቆ ናኣቶም ኑ ዒንጋኑዋኣሢና ዔያቶኮ ዉዱሮ ናኣቶ ኑኡኮ ዓቲንቆ ናኣቶም ኑ ዔካኑዋኣሢያ ጫኣቃኔ። ✝10፡30 ኬሲ. ማፃ 34፡16፤ ላሚ. ዎማ 7፡3።

31 ሜሌ ዓጮ ዴራ ሃውሾ ኬሎና ማዔቴያ ሜሌ ቦንቾ ኬሎና ሃኣኮዋ ማዖም ሜሌ ኮርሞም ማዓ ባኣዚ ዔኪ ሙኬቴ ዔያቶይዳፓ ኑ ሻንቃዓ። ✝10፡31 ኬሲ. ማፃ 23፡10-11፤ ሌዊ. ዓኬ 25፡1-7፤ ላሚ. ዎማ 15፡1-2።

ሃሣ ላንካሳ ሌዖይዳ ሌዖይዳ ኑ ጎሽካ ሳዖ ጎሽኩዋዖ ሃሻንዳኔ፤ ኑ ዓሲም ታልዔ ጋሌ ዓኣቴያ ዒዞ ሌዖይዳ ኑ ሃሻንዳኔ።

32 ሌዓ ሌዓ ጌኤዦ ማኣሮ ማዾም ማዓንዳያ ኑኡኒ ፔቴ ፔቴሢ ኑኡኮ ዓኣ ቢራፓ ሃይሦ ኩቺፓ ፔቴማ ዔኪ ሙኪ ኑ ዒንጋንዳኔ። ✝10፡32 ኬሲ. ማፃ 30፡11-16።

33 ዬያጉዲ ሃሣ ጌኤዦ ማኣሮ ማዾም ሃካፓ ሊካ ዓኣ ባኮ ኑ ኩንሢ ሺኢሻንዳኔ፦ ዬይ ባካ ፆኦሲም ዱማዼ ካሦ፥ ቢያ ኬላ ኬላ ዒንጋኒ ኮይሳ ሃኣኮ ዒንጊፆ፥ ሚቺ ዒንጎ ዒንጊፆም ማዓ ቆልሞ፥ ሃውሾ ኬሎንታ ዓጊኖ ፄኤሮንታ ሜሌ ቦንቾ ኬሎም ሺኢሾ ባኮ፥ ፆኦሲም ዱማዼ ዒንጊፆ ሜሌሢ ቢያ፥ ዒስራዔኤሌ ዓሶኮ ጎሞ ጌኤሻኒ ዒንጊንታኒ ኮይሳሢና ጌኤዦ ማኣሮ ማዾም ኮይሳ ሜሌ ባኮ ቢያ ኑ ፓጪሳዓኬ።

34 ዎጎይዳ ሚቺ ዒንጎ ባኮ ዛሎኮ ፃኣፒንቴ ጎይፆና ናንጊና ናንጋ ጎዳ ማዔ ኑ ፆኦዛሢም ዒንጊንታ ባኮ ሚቾንዶ ሃንፂሎ ዎኖ ቶኦካ ዒንጋኒ ኮይሳቴያ ኑኡኒ፥ ዴራ፥ ቄኤሶንታ ሌዊ ዓሶንታ ሌዓ ሌዓ ዒፃ ዓጊሢና ኑ ዱማሳንዳኔ።

35 ማኣሎ ኑኡኮ ኑ ቡራኣና ዱማ ዱማ ሚፆኮ ዓኣፖ ኑ ማንፃ ዓጊኖና ቤርታ ካፄ ቲሻሢ ጌኤዦ ማኣሪ ዔኪ ሙኪ ሙኪ ኑ ዒንጋንዳኔ። ✝10፡35 ኬሲ. ማፃ 23፡19፤ 34፡26፤ ላሚ. ዎማ 26፡2።

36 ኑኡኒ ፔቴ ፔቴሢ ሾዓ ዓቲንቆ ናኣቶኮ ቶይዶ ዔኪ ጌኤዦ ማኣሮይዳ ማዻ ቄኤሳሢም ሺኢሺሢና ዎጋ ዓይሣ ጎይፆ ፆኦሲም ዱማዼያ ኑ ማሃንዳኔ፤ ሃሣ ኑኡኮ ባኣቶና ማራቶና ዋኣሮናይዳፓ ሾይንታ ናኣሮንታ ማራናኣቶንታ ዋናናኣቶንታኮ ቤርታሳዞንሢ ቢያ ፆኦሲም ኑ ዱማሳንዳኔ። ✝10፡36 ኬሲ. ማፃ 13፡2።

37 ኑኡኒ ቡኩሴ ሃኣኮኮ ቤርቶ ዺኢሎ ዔኪ ጌኤዦ ማኣራ ማዻ ቄኤሳሢም ኑ ዒንጋንዳኔ፤ ሜሌ ሃሣ ዎይኖ ዑዣ፥ ዛይቶ ሪሚቶንታ ዬያጉዴ ባኮ ዓኣፖኮ ቢያ ቤርቶ ፆኦሲም ዒንጋኒ ኑ ሺኢሻንዳኔ። ✝10፡37 ፓይ. ማፃ 18፡21።

ኑኡኮ ጎዦ ዛሎ ጊኢሮ ጊኢሪሻ ሌዊ ዓሶም ኑኡኮ ጎዣ ካፂሳ ሃኣኮይዳፓ ታጶኮ ፔቴ ኩቺ ኑ ዒንጋንዳኔ። 38 ታጳፓ ፔቴማ ዒንጊንታ ዎዶና ሾይንታ ዓኣሮኔ ፃጳፓ ማዔ ቄኤሳ ሌዊ ዓሶና ዎላኬ፤ ጌኤዦ ማኣሮ ማዾም ሌዊ ዓሳ ታጳፓ ፔቴማ ቡኩሲሳሢኮ ጊንሣ ታጳሢኮ ፔቴማ ኬሲ ኬሲ ጌኤዦ ማኣሮኮ ሜሆ ጌሦ ማኣሮ ጌልዛንዳኔ። ✝10፡38 ፓይ. ማፃ 18፡26። 39 ዒስራዔኤሌ ዴሮንታ ሌዊ ዓሶንታ ሃኣኮይዳፓ፥ ዎይኖ ዑዦና ሪሚቶ ዛይቶናይዳፓ ቡኩሶና ዒንጊፆ ጌኤዦ ማኣራ ማዾ ማዺንቶ ሜሃ ጌሢንታ ቤዞ፥ ዒኢካ ማዻ ቄኤሶንታ ካፓ ዓሶንታ ዓይኑሞ ዓይናዻ ዓሳኣ ዴይ ሃውሻ ቤዞ ማዔ ሜሆ ጌሦ ማኣሮ ዔኪ ዬዓንዳያ ኮይሳኔ።

ኑ ፆኦዛሢኮ ማኣሮ ፔቴታዖ ኑኡኒ ዋላዓኬ።