ፓይዲ ማፃኣፔ 34

ዒስራዔኤሌ ዓሶ ዓጮኮ ዛጶ

1 ናንጊና ናንጋ ጎዳ ሙሴም፦ 2 «ዒስራዔኤሌ ዓሶም ሂዚ ጌይ ዓይሤ፤ ‹ታኣኒ ዒንሢም ዒንጋ ካኣናኔ ዓጬሎ ዒንሢ ጌሌ ዎዶና ዒንሢ ዓጮኮ ዛጳ ሃካፓ ሊካ ኬኤዚንታ ጎይፆ ማዓንዳኔ፤ 3 ዓጮኮ ዾኦሎ ዛሎ ዛጳ ዓሲ ናንጉዋ ፂኢኔ ዳውላፓ ዔቃዖ ዔዶኦሜ ዓጮኮ ዛጶማ ዓርቂ ዓኣዻያ ማዓንዳኔ፤ ዬይ ዓርቃንዳሢ ዓባ ኬስካ ዛሎና ሶኦጌ ባዚኮ ዾኦሎ ዛላፓኬ። 4 ዬይና ጌዒ ኮርናሢ ቶኦሎ ባንሢ ሊካ ዓኣዺ፥ ፂኢኔይዴና ዴንዲ ቃዴሴ ባርኔ ሄላኔ፤ ዬካፓ ሃሣ ሃዳርዓዳሬ ጌይንታ ቤዞኮ ኬዶ ዛላ ዓባ ጌላ ባንፆና ጌዒ ያፂሞኔ ሄላንዳኔ፤ 5 ጊንሣ ሃሣ ጊብፄ ዓጮይዳ ዓኣ ዛሮና ሺሪ፥ ሜዲቴራኒያ ባዞ ሄሊ ጋፓያ ማዓንዳኔ። 6 ዓባ ጌላ ዛሎ ዛጳ ሜዲቴራኒያ ባዞ ማዓንዳኔ። 7 ኬዶ ዛሎ ዛጳ ሜዲቴራኒያ ባዞ ዓጮ ዓርቂ ዴንዲ ሆኦሬ ዹኮ ጊዴና ጌዒ፥ 8 ሃማቴ ባንሢ ዴንዳ ጎይፆ ሄላንዳኣና ማላታ ማዓ ባኣዚ ጌሡዋቴ፤ ዬካፓ ዛጳ ፄዳዴ ሄላንዳኣና ዓኣዻዖ፥ 9 ዚፒሮኔና ፒንቂ ጋፒንፃ ሃፃርዔናኔይዳ ማዓንዳኔ፤ ዬይ ዒንሢኮ ኬዴኖ ዛጶኬ። 10 ዓባ ኬስካ ዛሎ ዛጶኮዋ ሃፃርዔናኔይዳፓ ዴንዲ ሼፓሜ ሄላንዳኣና ማላታ ማዓ ባኣዚ ጌሡዋቴ፤ 11 ዬካፓ ዓይኔ ጌይንታ ቤዞኮ ዓባ ኬስካ ባንፆና ሪብላ ሄላንዳኣና ዓኣዺ ጌሊላ ባዞኮ ዓባ ኬስካ ዛሎና ዓኣ ጌሜሮ ሄላንዳኣና ዓኣዻዖ፥ 12 ዮርዳኖሴ ዎሮ ሄሊ፤ ጋፒንፃ ሶኦጌ ባዚ ማዓንዳኔ። ዬይ ዒንሢ ዛጶ ማዓንዳኔ› » ጌዔኔ።

13 ዬያሮ ሙሴ ዒስራዔኤሌ ዓሶም፦ «ታዞጳና ዛላና ማዔ ፃጶ ማኣሮም ዒፃ ዓጊ ዒንጊንታንዳጉዲ ናንጊና ናንጋ ጎዳ ዓይሤ ሳዓ ያዺኬ፤ 14 ሮኦቤኤሌና ጋኣዴና ዓሳ፥ ሃሣ ሚናኣሴ ዓሶኮዋ ዛላ ፔ ማኣሮ ዓሶና፤ 15 ዮርዳኖሴ ዎሮኮ ሶ ሱካ፥ ዒያርኮኮ ሆታ፥ ዓባ ኬስካ ባንፆይዳ ዓኣ ሳዖ ጊሽቲ ዔኬኔ» ጌዔኔ። ✝34፡15 ዒያ. 14፡1-5።

ሳዖ ጊሽካንዳጉዲ ቢታንታ ዒንጊንቴ ዓሶ

16 ናንጊና ናንጋ ጎዳ ሙሴም፦ 17 «ቄኤሳሢ ዓላዜሬና ኔዊ ናኣዚ ዒያሱና ዓጬሎ ዴሮም ጊሽኪ ዒንጎንጎ፤ 18 ዔያቶ ማኣዳንዳጉዲ ፔቴ ፔቴ ፃጳፓ ፔቴ ፔቴ ሱኡጌ ዔኬ» ጌዔኔ።

19 ዬና ዓሳ ሃካፓ ሊካ ፓይዲንታ ዓሶኬ፦ ዪሁዳ ማኣራፓ ዪፑኔ ናኣዚ ካኣሌቤ፤ 20 ሲሞኦኔ ፃጳፓ ዓምሁዴ ናኣዚ ሴላሚዔኤሌ፤ 21 ቢኢኒያሜ ፃጳፓ ኪስሎኔ ናኣዚ ዔልዳዴ፤ 22 ዳኣኔ ፃጳፓ ዩግሊ ናኣዚ ቡቂ፤ 23 ዮሴፔ ናኣዚ ሚናኣሴ ፃጳፓ ሱፒዴ ናኣዚ ዓንዔኤሌ፤ 24 ዮሴፔ ናኣዚ ዔፕሬኤሜ ፃጳፓ ሺፕፃኔ ናኣዚ ቄሙዔኤሌ፤ 25 ዛብሎኦኔ ፃጳፓ ፔርናኬ ናኣዚ ዔልሳፒኔ፤ 26 ዪሳኮኦሬ ፃጳፓ ሆዛ ናኣዚ ፔፂዔኤሌ፤ 27 ዓሴኤሬ ፃጳፓ ሴሌሜ ናኣዚ ዓሂሁዴ፤ 28 ኒፕታኣሌኤሜ ፃጳፓ ዓምሁዴ ናኣዚ ፒዳሄሌ ጌይንታዞንሢኬ።

29 ዬና ዓሳ ዒስራዔኤሌ ዴሮም ካኣናኔ ዓጮይዳ ማዓ ሳዖ ሳዖ ጊሽኪ ዒንጋንዳጉዲ ናንጊና ናንጋ ጎዳ ዓይሤ ዓሶኬ።