1 ታ እሹን፥ ታ ኩን ዎዝናር ታ አሞትዛይኔ ጾሳ ዎስዛይ እስሬልታይ አቶድ ጋርከ። 2 ኡንቲ ጾስስ ምጭንትዛዝን፥ ቱማ ኤረት ቦር ምጭንቶዛና ታ ማርካትዛ። 3 ኡንቲ ጾስ ጽሎት ኦገ ኤራም እጺ፥ ፋ ኣዳ ጽሎት ካሌዛፕ አትን ጾስ ጽሎት ኮየካያ። 4 አስ ኡባይ አማኖር ጽሎድ ጋርክ ክርስቶሳ ህገስ ፎሎ ማቄዛ።

5 ሙሰ አስ ህገ ናጊ ኤክዝ ጽሎትባዝ፥ «ህገ ናግዝ ኦንካ የ ህጋ ናጌዛይ ጋርክ ደኦ የዞዳ»✝ ዬጌዛ። 6 ዝን አማኖር ኤክዝ ጽሎት ባጋ ጊንትንቴዛይ Ꮊያ፦ «ነ ዎዝናር፥ ‹ኦኒ ሳሎ ከዞዴ?» ዬግፐ፤ የይ ክርስቶሳ ዎዳይስ።✝ 7 ዎይ፥ «ሱለ ሳአ ኦሞ ዎዳይ ኦኖ?» ጊፐ፤ የይ ክርስቶሳ ዱፎፕ ከሶዳይስ። 8 ዝን ዬጊ ጻፍንቴዝ፦ «ቃላይ ነ ካለ የዛ፤ ነ ዶና ጋንጨኔ ነ ዎዝና ጋንጨ የዛ» ኑኒ ይንትስ ኦድዝ አማኖ ቃላይ Ꮊያ።

9 «የሱሳ ጎዳ» ግ ነ ዶናር ማርካትኮኔ ጾሳይ ኤዛ Ꮊይቆፕ ደንዛና ነ ዎዝናር አማንኮ፥ ነ አቶዳ። 10 አሲ ፋ ዎዝናር አማኒ ጽልዛ፤ ፋ ዶናር ማርካቲ አትዛ። 11 ማጻፋይ፥ «ኤዛ አማንዛ ኦንካ ዬላተና»✝ ዬጌዛ። 12 ፐቲ ጾሳይ ኡቢታይ ጎዳ ማቄዝ ግሾስ አይሁድታይ ጋንጨኔ አይሁደ ባ አስ ጋንጨ ዱማት ባያ። ኤ ፋና ጼግዝ ኡባይስ ጋመ ኬሃ። 13 ጎዳ ሱን ጼግዝ ኦንካ አቶዳ።

14 የዝን፥ ኡንቲ አማነካ የዝታር ዋይዚ ኤዛ ጼጎዳይስ ዳንዳኤ? ኡ ኤባዝ ስኤካ የዝታር ዋይዚ ኤዛ አማኖዳይስ ዳንዳእኔ? ማ ኡንትስ ቃላ ኦድዝ አስ ባዝን፥ ዋይዚ ስኦዳይስ ዳንዳእኔ? 15 ኪትንቴዝ አሲ ባዝን ቃላይ ዋይዚ ኦድንቶዳይስ ዳንዳኤ? ማጻፋይድ፥ «ኡፋይስ ዎንግለ ኦድዝ አስስ ቶክታይ ዋፋ ሎእነሻ»✝ ዬጊ ጻፍንቴዛ።

16 ዝን ኢስያሳ፥ «ጎዳዮ፥ ኑ ማርካት ኦኒ አማኔኔ?»✝ ዬጌዛይ ጋርክ፥ ኡቢታይ ዎንግለ አማነካያ። 17 የይ ግሾስ፥ አማናይ ስሳፕ ይእዛ፤ ስስ ክርስቶሳ ቃላፕ ይእዛ።

18 ማቆዝን፥ ኡ ቃላ ስኤካ ጉሶኔ? ዋኣ ስኤዛ። ማጻፋይድ፥

«ኡ ኦዳይ ቢታ ኡባይል ስንቴዛ፥

ኡ ቃላይ ሳአ ጋጻ ሄሌዛ»✝ ዬግንቴዛ። 19 ዝን እስሬለ አሳይ ኤረካያ ጉሶኔ? ሙሰ ቲና፥

«ታኒ ይንታን ለቂንቴዝ አሳይ ጋንጨ ቂርሶዳ፤

ማ አካኮዋ አሳይ ጋንጨ ይንታን ይሎሶዳ»✝

ዬጌዛ።

20 ማ ኢስያሳ፥

«ታና ኮየካ አሳይስ ታ በንቴዛ፤

ታና ኦይጨካ አሳይስ ታ ታና ቤዜዛ»✝

ዬጊ ያሽተካዛር ኦዴዛ።

21 ዝን ኢሳያሳ እስሬልታይ ባጋ ኦድታር፥

«ጋላስ ሙዳ ኪትንቶዋ አሳይስኔ

ታና እጽዛ አሳይስ ታ ኩሸ ሚጬዛ»✝

ዬጌዛ።