1 Ruura mu diyuwa dyo kutanga mu sunda, o ku shimbi kwerawera pashi, Madiya Magadalena wa thzire ku thsidi. Wa wanine diwe o ku di na arumuniwa ku mengeneno o thsidi. 2 Ngou a cirerire kwa Simoni Peturu no thsiya thsirongwa a shimine nene Yesu. Wa ambire ci: "A na tundithsa erama ya Fumu mu thsidi, karo ka tu dimuka oku a na mu paka."

3 Peturu no thsiya thsirongwa thsimweya ngou a thzire ku thsidi. 4 Momu widi wo shime a thzire o cira, unone thsiya thsirongwa thsimweya thsa cirire nene ku thsia Peturu, no ku ka tanga ku ka kuma ku thsidi. 5 Thsa kotamine ku hokera mu thsidi, thsa monine mambatu o lineni aa ekariremo, unone ka thsengeninemo. 6 Ngou Simoni Peturu oyu wa thsi keyire munyima a kumine no kwingena mu thsidi. Wa monine mambatu o lineni o ku a dimo, 7 thsiya thsito thsa thzingiwire ku mutwi wa Yesu o ku thsi na cifundafundera papo, o ku thsi na tundithsiwa ku mambatu o lineni. 8 Ku hura thsiya thsirongwa thsa tangire ku kuma ku thsidi, nathso thsengenine mu thsidi. Thsa monine no ku tawa. 9 (Shaanga apo ka ya yuvithsithsire Mañoro ci Yesu aa roera ku pinduka kwafu.) 10 Erongwa ngou ya hukire ku diumbo.

11 Unone Madiya aye shime emanine pora thzo thsidi o ku dira. O ku dira kengeyo wa kotamine ku kenga mu thsidi, 12 wa monine tungeru twidi otu twa vatire evata yo kuvyakima, o ku tu nekara apa ya pakiwire erama ya Yesu, kamweya ku mutwi kamweya ku mauru. 13 Tungeru twa mwipurire ci: "Owe mbuyama, ine eyi o direra?"

Aye wa tawire ci: "A na shimbi Fumu wange, karo ka ni dimuka oku a na mu paka."

14 Munyima thzo ku amba eyo wa pirukire no ku mona oyu wemanine apo, unone ka a dimukire ci Yesu. 15 Yesu wa mwipurire ci: "Owe mbuyama, ine eyi o direra? Karo edye oyu o fota?"

Aye wa anekerire ci ngwa mukwakukwama mu dikanda, ngou a mu tawire ci: "Ñathsire wange, ngeci yowe na mu shimbi, o ni tongwere oku na ka mu paka, ni ka mu shimbeko." 16 Yesu wa ambire ci: "Madiya!" Madiya wa cithsetukire no ku mu tawa mu Thsiheveru* ci: "Raboni!" (ku amba ci "Murongithsi").

17 Yesu wa mu amberire ci: "Wa ni kundama, inene ni shime ku thzina mu wiru kwa Tata. Unone o thze kwaenthzange o ka wa tongwere ci naa thzina mu wiru kwa Tata aye Tata wenu namwe, Nyambi wange no Nyambi wenu namwe."

18 Madiya Magadalena wa thzire no ku ka tongwera erongwa ci: "Ni na mu mono Fumu!" Ngou a i tongwerire enu yoihe eyi a mu amberire Fumu.

19 Runguro o diyuwa dyo kutanga mu sunda, mathsero omu yekarire erongwa o ku a na patiwa mukaci ko ku yapa aendithsi o Majuda, Yesu wa keyire no ku nemana mu kaci kayo no ku i ambera ci: "Thsiyaro thsikare nenu!" 20 Ou a manine ku amba eyi, wa i monithsire nyara thzenthzi no maci thzenthzi. Erongwa yenthzi ya nyanyukire nene apa ya monine Fumu! 21 Yesu wa ambire karo ci: "Thsiyaro thsikare nenu! Eci dyodi naa ni tumu Tata, name naa mi tuma kengeyo." 22 Ou a manine ku amba eyi, wa wa puyerire mupepo no ku amba ci: "Mu tambure Mupepo Oukenu. 23 Ngeci amwepo mu tetera anu evi yo, kenge a ku teteriwa. Ngeci ka mu wa teterire, ka ku teteriwa."

24 Yumweya kowaya o dikumi naidi, o dithzina dyo Tomasi, oyu wethsiwire ci o Marambi* ka ekarireno Yesu ou a keyire. 25 Aenthzenthzi erongwa ya mu tongwerire ci: "Tu na mu mono Fumu!"

Unone aye wa tawire ci: "Ka ni i tawa shime ou nga ni mona etwa yo mambambo mu moko enthzi no kwingenithsamo munwe wange, no ku kwata ko dyoko dyange mu thsitwa thso mu maci thzenthzi."

26 Munyima thzo sunda, erongwa ya ciwanine pofoci karo mu nthzio, apo honi no Tomasi pa ekarire. Mathsero shime a patiwire, unone Yesu wa keyire no ku nemana mu kaci kayo. Wa ambire ci: "Thsiyaro thsikare nenu!" 27 Yesu ngou a amberire Tomasi ci: "O pake munwe woe omu, o kenge mu moko ange. O kwate ko dyoko dyoe mu thsitwa thso mu maci thzange. O thsie ku kana ku tawa, o tawe!"

28 Tomasi wa tawire ci: "Fumu wange no Nyambi wange!" 29 Yesu wa mu amberire ci: "O na tawa honi pakuninga ci o na ni mono. Akwathsiyauthzi awa tawa ko kukana ku ni mona."

30 Yesu wa tendire emonithso yo ku komokithsa imweya yoingi pa meho erongwa yenthzi, eyi i na kana ku ñoriwa omu mu vuka. 31 Uno honi eyi po shime ya ñoriwire ci mu tawe ci Yesu po yo Mesiya, Mwana Nyambi, ci pa ku tawa ku kwenthzi nga mu wane mwoyo ko dithzina dyenthzi.