João 21

Yesu aa hokoka kwirongwa yenthzi

1 Munyima thzeyi, Yesu wa hokokire karo kwirongwa yenthzi ku Diviya dya Tiberiya. Shime a cihokorire kenge: 2 Simoni Peturu, Tomasi (oyu wethsiwire o Marambi*21.2 Didimasi mu Thsigerike.), Natanaele o mu Kana o mu Galilea, ana Zebedea, namweya aidi kwirongwa yenthzi shime ekarire pofoci. 3 Simoni Peturu wa wa amberire ci: "Naa thza mu kuyamba." A mu amberire ci: "Natwe twaa thza noe." Ngou a thzire no ku ka yomama mu wato, unone uya othsiku kwithsa ethsi a wanine.

4 Mu ruura, Yesu wemanine pa dikambo, unone erongwa ka ya dimukire ci Yesu. 5 Yesu wa i amberire ci: "Andengenu, ene ka mu diko no thsi nji?" Ya mu tawire ci: "Kwithsa." 6 Wa i amberire ci: "Mu kuhere dituwa ku rudyo ro wato, kenge mwipaa!" Ngou ya kuherire dituwa, unone ka ya twethsire ku di koka mukaci ko thsi ongi.

7 Thsiya thsirongwa a shimine nene Yesu, thsa amberire Peturu ci: "Fumu!" Simoni Peturu ou a yuvire ci Fumu, wa vatire thsikoveyo thso peuru pakuninga ci shime a thsi cishupurire, wa reerire mu meyu no ku thza pa dikambo. 8 Unone erongwa imweya ayo ya thsiarire mu wato o ku i koka dituwa dyo ku yara dyo thsi, inene ka yekarire kokure no dikambo, nedi manambo o ku fota ku kwana makumi o dikumi. 9 Ou ya kumine pa dikambo, ya monine mudiro o pa makara no thsi po no dikende ku mbadi. 10 Yesu wa i amberire ci: "Mu rete ku thsi ethzi mu nepaa ñanyiñanyi."

11 Simoni Peturu ngou a shamukerire mu wato no ku kokera dituwa pa dikambo, edi dya yarire ethsi thzothzikuru thzo ku kwana 153. Shaanga ci shime pa rwire ethsi thzothzingi kengeyo, edyo dituwa ka dya yatukire.