1 Diyuwa dimweya Yesu wa thzire karo mu sinagoge, omo kwekarire munu o ku kukutera dyoko. 2 Pakuninga ci nedi diyuwa dyo Savata, anu a rungamenine ci a mone Yesu o ku porithsa munu, ci nga a mu shangethze eamba mukaci ko ku kwama dyo Savata.

3 Yesu wa amberire oya munu o ku kukutera dyoko ci: "O keye no wimane ku rupara rwanu wahe." 4 Ngou epurire mbunga ci: "Ethsi thsi na tawethziwa mu murao o diyuwa dyo Savata ne thsipi? Ku tenda yoiwa nji ku tenda yoimango? Ku yoyithsa munu nji kwipaa?" Unone kwithsa oyu wa mu tawire thsimweya.

5 Wa wa tanekerire koanthzi no thsinyengo nene, mukaci ko mukanayuva o micima thzo. Ngou a amberire oyo mukwerume ci: "O orore dyoko dyoe!" Wa ororire dyoko dyenthzi, popo dya porire. 6 Afarithsi ngou a tundire mu sinagoge no ku ka ciwana no thsipani thsa Heroda ku ceka dyo kwipaa Yesu.

7 Yesu nerongwa yenthzi ngou a tundire kwanu no ku thza ku Diviya dya Galilea, mbunga thzothzikuru thza mu shupwerire ku tunda ku Galilea na Judea. 8 Amweya shime tundire ku Yerusalema, no ku Idumea, nakwa thsambwadiya thza Jorodani, nakwa matunga o pepi na Tire na Sidoni. Wahe a keyire kwa Yesu pa ku yuva yoihe eyi a kwamine.Yesu aa rongithsa anu o ku di mu wato

9 Mukaci ko mbunga ongi, wa amberire erongwa yenthzi ci a mu roithsereko wato ci mbunga katere thzi mu thsindakane. 10 Pakuninga ci shime a porithsire anu owangi, akwakukora wahe a cithsinenekethzire ku kwenthzi ci nga a mu kwate. 11 Akwamathzimu ou a mu monine, a wererire pa rupara rwenthzi no ku kumba ci: "Yowe o Mwana Nyambi." 12 Unone aye wa thzi kanithsire nene ci thza mu tongora kwanu.

13 Munyima thzeyo Yesu wa thzire ku mukinya, wethsire awa a fotire ci a thze nenthzi, a keyire ku kwenthzi. 14 Wa hangurire o dikumi naidi no ku wa ta ci tunganda, ci nga ekare nenthzi karo ci nga a wa tumange ku ka honga, 15 no ku wa pa okoro o ku cithza mathzimu. 16 Awa a hangurire po awa,

Simoni oyu a tire ci Peturu,

17 Jakovo na minenthzi Johani ana Zebedea awa a tire ci Bonagesi, ku amba ci Ana Mushika.

18 Andereasi na Filipu, na Batolomeu, na Mateu, na Tomasi, Jakovo mwana Alufea, na Tadea, na Simoni Zeloti, 19 no Judasi Isikariota oyu wa mu ombire.

20 Yesu ngou engenine mu nthzio, karo mbunga thza ciwanine kuninga ci Yesu nerongwa yenthzi a pirire shaanga thsikati thso ku dya. 21 Apenthzi ou a i yuvire, a keyireko ci na mu shimbe pakuninga ci shime a ambire ci: "Na thzaruka."

22 Arongithsi o murao awa tundire ku Yerusalema a ambire ci: "O di nokoro wa ñathsire o mathzimu oyu nethsiwa Beelezebule aye Satana! Kodiyo oku a wana okoro o ku cithza mathzimu."

23 Yesu ngou a wethsire no ku wa tera tuthsimo ci: "Satana ne ngepi edi nga a cithza Satana? 24 Ngeci kutumina kwaa cia ko ku cirwithsa kothsinda, oko kutumina tumba ku tanara. 25 Mofoci nakwa mwanda ofoci o kwikareranga ku cirwithsa, oo mwanda tumba u tanara. 26 Ngeci Satana aa cirwithsa thsinda no ku cia, tumba a tanara, unone kupwa kwenthzi ku na kumu. 27 Unone kwithsa munu o ku twethsa kwingena mu nthzio thzo ndwarume ku mwithzera etere yenthzi, shime a tange tango ku mwanga mbeci nga a twethse ku i shimba.

28 "Naa mi tongwera yoshemwa ci evi yoihe no kuyengwera kokuhe kwanu kenge ya ku teteriwa. 29 Unone yomuhe o ku yengwera Mupepo Oukenu mbera ka a teteriwa, ethso po thsivi thso diyere." 30 Yesu wa ambire eyi pakuninga ci anu amweya shime ambire ci: "Wa mupepo oumango."

31 Amina Yesu na mama wo a na kumine ci na mu mone. Emanine pora no ku tuma munu ku ka mwithsa. 32 Mbunga thzekarire ku thzingwera Yesu, munu yumweya wa mu amberire ci: "Mama woe naminoe aa ku fota pora."

33 Yesu wa tawire ci: "Mama naminange ne adye?" 34 Ngou a tanekerire anu wahe awa a mu thzingwerire no ku amba ci: "Mu na mono, awa wodiyo amama naminange. 35 Inene yomuhe o ku kwama eshima ya Nyambi, yodiyo minange no ndumbuthzange no mama."