Mateus 21

Yesu aengena mu Yerusalema

1 O kwa kokera ku Yerusalema, a kumine mu diumbo dya Betifage, pa mukinya wEtondo yo Miywera. Podiyo a tumenine Yesu idi kwirongwa yenthzi, 2 no ku i ambera ci: "Mu thze mu diumbo edi di di pa rupara rwenu, kenge mu ka wana thsindongi ethsi thsi na fungereriwa no mwanathso ku mbadi, mu ka i puture, mu ka i ni retere kuno. 3 Ngeci waa ka mipure munu, mu ka mu ambere ci: ‘Fumu na i foto,’ popo kenge a ka mi tawethza ku i shimba."

4 Eyi shime ya tendaharire ci i citombore neyi a ambire mukwakukethza ci:

5 "Mu tongwere mbongi thza Sione ci:

O mone, Fumu woe aa keya ku koe,

na cihuthsa kushi, na pahama pa thsindongiana,

mwana thsindongi."

6 Erongwa ya thzire no ku ka tenda dyodi a i tongwerire Yesu. 7 Ya ka retire thsindongi no mwana thso, a na yarirepo ekoveyo yo, Yesu ayepo pahamapo. 8 Mbunga thza yarire ekoveyo yo mu dikuñwa, amweya a ka tetire mite thzetondo ku na yara mu dikuñwa. 9 Anu amweya awa endire ku rupara no ku nyima thza Yesu a tatekire ku kuerera ci,

"Hosana*21.9 Ku shangariwe. Mwana Davida!

‘Wa thsiyauthzi oyu keya mu dithzina dya Fumu!’

Hosana mu diwiru!"

10 Yesu ou engenine mu Yerusalema, thsikuña thsothsihe thsemanine shakashaka no kwipura ci: "Edye oyu?"

11 Mbunga thza tawire ci: "Yodiyo Yesu mukwakukethza o ku Nazareta mu ditunga dya Galilea."