1 Beno kuwa mambu yayi, beno bantu ya Isayeli. Beno kuwa nzimbu ya mafwa yina mu ke yimbila samu na beno.

2 Isayeli me kubwa, yandi ke vumbuka dyaka ve.

Isayeli, ndumba ya kitoko.

Yandi me kubwa na ntoto ya yandi mosi,

ata muntu samu na kutelemisa yandi.

3 Ni yawu yina, na yina me tadila bantu ya Isayeli,

Yave Mfumu ke na kutuba mutindu yayi:

«Mbanza yina vwandaka baka funda mosi (1 000) ya babakala

samu na kukwenda na mvita,

yawu ke bikana kaka na babakala nkama (100).

Mbanza yina vwandaka baka babakala nkama (100),

samu na kukwenda na mvita,

yawu ke bikana kaka na babakala kumi.»

4 Yave ke na kutuba mutindu yayi na bantu ya Isayeli:

«Beno sosa munu mpe beno ke zinga!

5 Kasi beno sosa munu na mbanza Betele ve.

Beno sosa munu na mbanza Ngilengale ve,

beno meka ve na kulutila kuna.

Beno kota ve kuna na Beele-Seba,

samu ti ba ke nata na ngolo bantu ya Ngilengale na yinsi ya nzenza

mpe ata kima ya yimbi ke bikana na Betele.»

6 Beno sosa Yave mpe beno ke zinga.

Beno sala keba samu ti yandi bika

na kulakisa ngolo ya yandi

na bantu ya Yosefi mutindu tiya.

Tiya yina ke nyengisa bantu ya Yosefi,

mpe ya ke vwanda ve na muntu kuna na Betele,

samu na kufwa yawu.

7 Beno ke na kusala ti mambu

ya kusungama kuvwanda kima ya ndudi ya kulutila.

Beno me bwisa ludedomo na ntoto!

8 Ni yandi yidikaka bambwetete ya konso mutindu,

yandi ke kitulaka kitombe ya lufwa

na nsemo ya suka,

yandi ke bumbaka nsemo

samu ti mpimpa kuvwanda.

Yandi ke kutikaka maza ya mubu

samu na kumwangisa yawu na ntoto.

Nkumbu ya yandi kele Yave.

9 Ni yandi ke salaka ti

ba botola bimvwama ya muntu ya ngolo.

Ni yandi ke salaka ti

vwanzi kukota na mbanza

yina kele na bibaka ya lukengolo.

10 Na bisika ya lufundusu,

bawu ke yinaka mpe ke talaka yimbi

muntu ya kusungama

yina ke zonzaka mambu ya tsyelika.

11 «Mutindu beno ke vunaka muntu ya mpamba

mpe beno ke bakaka mwa ndambu ya bambuma ya faline

yina ke na yandi,

bayinzo yayi ya matadi yina beno tungaka,

beno ke zinga ve na yawu.

Bilanga yayi ya bayinti ya vinu ya kitoko

yina beno kundaka,

beno ke kunwa ve vinu ya yawu.

12 Samu ti mu me zaba mingi yimbi ya beno

mpe bunene ya masumu ya beno.

Beno bayina ke nyokolaka

bantu ya kudedama.

Beno ke ndimaka madeso ya bana.

Mpe na bisika ya lufundusu,

beno ke zolaka ve ti

bamputu kununga beno.»

13 Ni yawu yina,

na bantangu ya mutindu yayi,

muntu ya kulwenga

me lunga na kuvwanda swii,

samu ti ya kele bantangu ya mpasi.

14 Beno sadila mambu ya mbote

kasi ya yimbi ve, samu ti beno kuzinga.

Na mutindu yina,

Yave, Nzambi ya Binwani,

ke vwanda na beno

mutindu beno ke na kutuba yawu.

15 Beno kuyina mambu ya yimbi

mpe beno kuzola mambu ya mbote.

Na bisika ya lufundusu,

beno fundisa na mutindu ya kusungama.

Na kusalaka mutindu yina,

kuzaba ve kana Yave,

Nzambi ya lulendo, ke fwila kyadi

dikanda ya Yosefi yina me bikana.

16 Ni yawu yina,

Yave, Nzambi ya binwani,

Mfumu ya munu ke na kutuba:

«Na bisika nyonso yina

bantu ke yonzamaka,

ba ke kuwa bantu ke na kuyawula.

Na banzila nyonso, bantu ke banda

na kwendaka looka: "Kyadi! Kyadi!"

Na kulutisa bantangu ya kyadi,

ba ke bokila bayina ke salaka bilanga.

Samu na mikunga ya mafwa,

ba ke bokila bayina zaba

kuyimbila banzimbu ya mafwa.

17 Ntangu mu ke luta

na kati-kati ya beno,

beno ke banda na kwendaka dila

tii na kati ya bilanga nyonso ya bayinti ya vinu.

Ni Yave me tuba yawu.»

18 Kyadi na bayina ke na nsatu

ya kutala Kilumbu ya Yave!

Yinki beno ke kuzwa

na Kilumbu ya Yave?

Beno ke na kubanza ti

yawu ke vwanda kilumbu ya nsemo?

Ve, yawu ke vwanda kilumbu ya kitombe.

19 Yawu ke vwanda mutindu muntu

ke na kukima nkosi

kasi yandi ke na kubwabana uluse.

Yawu ke vwanda mutindu muntu

me kota na yinzo ya yandi,

yandi me tula diboko na kibaka

mpe nyoka me tatika yandi.

20 - Kilumbu ya Yave

ke vwanda kilumbu ya nsemo?

- Ve, yawu ke vwanda

kilumbu ya kitombe,

kilumbu ya mpimpa ya kulutila,

ata nsemo ke talana ve!

21 «Mu ke yinaka mikembo ya beno,

mu ke mangaka yawu.

Mu ke zolaka ve

balukutakanu ya beno ya lusambulu.

22 Ntangu beno ke pesaka munu minkayulu ya kuyoka,

munkayulu ya beno ya madya ya bilanga,

yawu ke yangidikaka munu ve.

Minkayulu ya beno ya kiwisa,

minkayulu ya beno ya bibulu yina ke na mafuta,

mu ke yinaka yawu.

23 Beno katula makelele ya banzimbu

ya beno na makutu ya munu.

Mu me manga na kuwa

muningu ya bansambi ya beno.

24 Beno bika ti lufundusu kusalama mbote,

mutindu maza ke tangaka,

ludedomo kuvwanda mutindu

muzumba ya maza yina ke yumaka ve!»

25 «Bantu ya Isayeli, na bamvula makumi yiya yina beno salaka na yinsi ya kuyuma, beno pesaka munu minkayulu mpe makabu? 26 Kasi beno nataka Sikute, ntinu ya beno ya kiteki, mpe Kiyune, kiteki ya nzambi ya beno, mbwetete ya banzambi ya beno yina beno yidikaka.»

27 «Ni yawu yina,

mu ke nata beno ntama

kuluta mbanza ya Damase.»

Ni Yave me tuba yawu.

Nkumbu ya yandi:

«Nzambi ya Binwani.»