1 Isayeli vwandaka mutindu

yinti ya vinu ya kitoko.

Yawu vwandaka lutila na kubuta

bambuma ya mingi.

Mutindu yawu vwandaka buta mingi,

ni mutindu yina mpe

Isayeli vwandaka yidika biyokolo mingi ya minkayulu.

Mutindu yinsi ya bawu

vwandaka lutila kitoko,

ni mutindu yina mpe bawu vwandaka

bongisa matadi ya bawu ya longo.

2 Bawu ke na bantima ya yimbi.

Ntangu yayi, bawu ke futa masumu ya bawu.

Yave, yandi mosi ke mwangisa

biyokolo ya bawu ya minkayulu.

Yandi ke mwangisa matadi ya bawu ya longo.

3 Ntangu yayi,

bawu ke na kutuba

mutindu yayi:

«Beto me zitisa ve Yave.

Ni yawu yina,

beto ke dyaka ve na ntinu.

Kasi bubu yayi,

yinki ntinu lenda kusala dyaka

samu na beto?»

4 Bawu ke na kwendaka zonza.

Bawu ke na kudya bandefi ya luvunu.

Bawu ke na kusala bangwisani.

Mpe ludedomo ke na kukuma na bawu

mutindu yinti yina ke na pwazon

yina ke na kumena na mikala ya bilanga.

5 Bantu yina ke zingaka na Samaliya

kele na boma, samu na kiteki ya mwana ya ngombe

yina kele na Bete-Awene.

Bantu na banganga-Nzambi

me kota bufwidi samu na kiteki yina.

Bawu lenda kuyangalala

samu na nkembo ya kiteki yina,

kasi nkembo ya yawu ke na kukwenda ntama na bawu.

6 Ba ke nata Kiteki yango na Asili.

Ba ke pesa yawu mutindu

dikabu na ntinu Yaleve.

Efalayime ke tala nsoni,

mpe Isayeli ke vwanda na nsoni

ya mambu yina bawu me sadila.

7 Yimeni samu na Samaliya.

Ntinu ya yandi ke na kufwa

mutindu kibuku ya yinti

na zulu ya maza.

8 Bisika ya luvunu ya lusambulu yina kele na zulu ya myongo,

bisika yina bantu ya Isayeli sumukaka, yawu ke mwangana.

Bayinti ya bansende na matiti

ya bansende ke mena na zulu ya biyokolo ya bawu ya minkayulu.

Na yina, bawu ke tuba:

«Myongo, beno fuka beto!»

«Myongo ya fyoti, beno bwidila beto!»

9 «Kubanda na mambu ya yimbi

yina salamaka na Ngibeya,

Isayeli ke na kutatamana

na kusala masumu.

Yandi ke na kusoba ve.

Mvita samu na bantu ya yimbi,

ke bwidila ve bawu kuna na Ngibeya?

10 Mu ke semba bawu mutindu mu zola.

Na yina, bantu ya bayinsi ke vukana

na kunwanisa bawu.

Ba ke kanga bawu na bampanga,

samu na yimbi ya bawu yina ba salaka bambala zole.»

11 «Efalayime vwandaka mwana

ya ngombe ya nkento ya kutumama.

Yandi vwandaka zola kusala kisalu

ya kudyata bambuma ya faline*.

Kasi mu ke kanga yandi kipusu-pusu ya kisalu

na laka ya yandi ya kitoko.

Yuda ke balula ntoto,

Yakobi ke benda bansengo.

12 Beno kunda mambu ya kudedama,

beno yonzika bambuma ya bumbote.

Beno sola bilanga ya malu-malu.

Ya me kuma ntangu ya kusosa Yave.

Beno sosa yandi tii ntangu yandi ke kwiza,

yandi ke nokisina beno ludedomo.

13 Beno kundaka mambu ya yimbi,

beno yonzikaka mambu ya kudedama ve.

Beno kudyaka mbuma ya luvunu ya beno.

«Beno tulaka kivuvu ya beno

na banzila yina beno vwandaka landa,

mpe na lutangu ya binwani ya beno.

14 Ni yawu yina,

makelele ke wakana na kati ya bantu ya nge.

Bambanza ya nge yina kele na bibaka ya lukengolo,

ke mwangana,

mutindu ntinu Salemane

mwangisaka Bete-Alebele,

na kilumbu ya mvita yina,

ba nikaka bamama

na zulu ya bana ya bawu.

15 Ni mambu yayi ke kumina beno

samu na Betele,

samu na yimbi ya beno ya kulutila

yina beno salaka.

Na suka-suka,

ba ke kufwa ntinu ya Isayeli.»