Ihāia 17

He Poropititanga mō Ramahiku

1 Ko te poropititanga mō Ramahiku:

"Nanā, kua kore a Ramahiku hei pā;

ka pūranga kau.

2 Kua mahue ngā pā o Aroere;

mō ngā kāhui ērā, ka takoto rātou,

tē ai he kaiwhakawehi.

3 Ka kore anō he pā kaha mō Ēparaima,

he kīngitanga mō Ramahiku,

he toenga rānei o Hīria;

ka rite rātou ki te korōria o ngā tama a Īharaira,"

e ai tā Ihowā o ngā mano.

4 "Nā, i taua rā ka meinga te korōria o Hākopa kia tūpuhi,

ka hīroki haere hoki te ngako o ōna kikokiko.

5 Ā, ka rite ki tā te kaitapahi kohikohinga i te wīti,

ki te tapahanga hoki a ōna ringa i ngā hua wīti;

āe, ka rite ki te hamunga o ngā hua wīti

i te raorao i Repaima.

6 Otiia, e toe anō ētahi karepe hei hamunga;

ka rite ki te ruiruinga o te ōriwa –

e rua, e toru ngā ōriwa i te pito o tō runga rawa peka,

e whā, e rima

i te peka i waho rawa,

i te mea whai hua,"

e ai tā Ihowā, tā te Atua o Īharaira.

7 I taua rā ka titiro he tangata ki tōna Kaihanga,

ka anga ōna kanohi ki te Mea Tapu o Īharaira;

8 e kore anō e titiro ki ngā āta i hangā nei e ōna ringa,

e kore e anga ki te mea i mahia e ōna maihao,

ki ngā Aherimi rānei,

ki ngā whakapakoko rānei.

9 I taua rā ka rite ōna pā kaha ki te wāhi i whakarērea i te ngahere, i te tihi anō o te maunga, i whakarērea rā i te aroaro o ngā tama a Īharaira; nā, ko te ngaromanga.

10 Kua wareware hoki koe ki te Atua o tōu whakaoranga,

ā, kua kāhore i mahara ki te kāmaka o tōu kaha,

mō reira ka whakatupuria e koe he mea ātaahua,

ka whakatōkia anō ki te peka kē.

11 I te rā e whakatō ai koe, ka taiepatia e koe,

ā, i te ata matomato tonu tāu i whakatō ai;

i te rā ia o te pōuri, o te mamae ngau kino,

ka memeha atu te kotinga.

12 Ananā, te ngangau o ngā iwi maha,

e ngē ana ānō he haruru nō ngā moana!

Me te rere o ngā iwi, e wawā ana,

koia anō kei te turituri o ngā wai nunui!

13 Ānō ko te tāheke o ngā wai maha te haruru o ngā iwi;

otiia ka rīria rātou e ia, ā, ka rere ki tawhiti,

ka whāia, ānō he pāpapa nō ngā maunga i te upoko o te hau,

ānō he puehu āwhiowhio e āia ana e te tūpuhi.

14 I te ahiahi, nā, ko te pāwera!

Kīanō i pūao kua kore rātou.

Ko te wāhi tēnei mā te hunga e pāhua ana i a tātou,

ko te mea tēnei e wehea mā te hunga e muru ana i a tātou.