1 Ko te kite a Opāria.

Ko te kupu tēnei a te Ariki, a Ihowā, mō Ēroma:

Kua tae mai he kōrero i a Ihowā,

kua oti anō he karere te unga ki ngā tauiwi, hei mea:

"Whakatika, kia whakatika atu hoki tātou ki a ia ki te whawhai!"

2 "Nanā, kua oti koe te mea e ahau kia iti i roto i ngā tauiwi;

nui atu te whakahāwea ki a koe.

3 Kua oti koe te tinihanga e te whakapehapeha o tōu ngākau,

e koe e noho nā i ngā kapiti o te kāmaka,

kei runga nā tōna nohoanga.

E mea nā i roto i tōna ngākau,

‘Ko wai hei whakahoki iho i ahau ki raro ki te whenua?’

4 Ahakoa i rite tōu kakenga ki tō te ēkara,

ahakoa i hangā e koe tōu kōhanga ki ngā whetū,

ka whakahokia iho koe e ahau i reira,"

e ai tā Ihowā.

5 "Me i tae he kaitāhae ki a koe,

he kaipāhua rānei i te pō –

taukiri e, tōu ngaromanga!

E kore rānei rātou e tāhae,

kia maha rā anō ngā mea mā rātou?

Me i tae he kaiwhawhaki karepe ki a koe,

e kore rānei ētahi karepe e whakatoea e rātou?

6 Taukiri e, te rapunga atu o ngā mea a Ēhau,

te kimihanga o āna mea ngaro!

7 Ko ngā tāngata katoa o tāu kawenata,

kua riro koe i a rātou, tae rawa ki te rohe;

ko ngā tāngata i mau nei tā rātou rongo ki a koe,

kua tinihanga ki a koe, ā, taea ana koe e rātou;

ko te hunga i kai i tāu taro kua takoto i a rātou he māhanga ki raro i a koe –

kāhore he mātauranga i a ia.

8 "He teka ianei," e ai tā Ihowā,

"ka kore i ahau i taua rā ngā tāngata whakaaro nui i roto i Ēroma,

me te mātauranga o te maunga o Ēhau?

9 Ā, ka wehi ōu mārohirohi, e Temana,

he mea e hātepea atu ai ngā tāngata katoa o te maunga o Ēhau, tukituki rawa."

10 "Ka taupokina koe e te whakamā

hei utu mō te mahi tutū ki tōu teina, ki a Hākopa,

ka hātepea atu anō koe ā ake ake.

11 I te rā i tū hāngai mai ai koe,

i te rā i whakaraua ai ōna rawa e ngā tautāngata,

i tapoko ai ngā tāngata iwi kē ki ōna kūwaha,

i kōkiri nui ai mō Hiruhārama,

i rite rawa anō koe ki tētahi o rātou.

12 Otiia, kaua koe e titiro ki te rā o tōu teina,

i te rā o tōna aituā,

kaua hoki koe e koa ki ngā tama a Hūrā

i te rā o tō rātou whakangaromanga;

kaua hoki e whakanuia tōu māngai

i te rā o te raru.

13 Kaua e tomo ki roto ki te kūwaha o tāku iwi

i te rā o tō rātou aituā;

āe rā, kaua koe e mātakitaki ki tō rātou matenga

i te rā o tō rātou aituā,

kaua anō hoki koutou e pā ringaringa ki ō rātou rawa

i te rā o tō rātou raru.

14 Ā, kaua koe e tū ki te pekanga o te ara

ki te hātepe i ōna mōrehu e mawhiti;

kaua hoki e tukua ōna mōrehu

i te rā o te raru."

15 "Kua tata hoki te rā o Ihowā ki ngā tauiwi katoa.

Ka rite ki tāu i mea ai ka meatia ki a koe;

ka hoki tāu utu ki runga ki tōu māhunga.

16 Ka rite hoki ki tā koutou inumanga i runga i tōku maunga tapu;

ka pēnā anō te inu a ngā tauiwi katoa ā ake nei, ake nei;

inā, ka inu rātou, ka horomia anō e rātou,

ā, me te mea i kore rātou."

17 "Otiia, tērā anō ngā mea ka mawhiti i Maunga Hiona,

ā, ka tapu tērā;

ā, ka riro ō rātou wāhi i te whare o Hākopa.

18 Ā hei ahi te whare o Hākopa,

hei mura anō te whare o Hōhepa,

hei kakau wīti hoki te whare o Ēhau.

Ka ngiha rātou i roto i a rātou, ā, pau ake,

kāhore hoki he mōrehu o te whare o Ēhau;

nā Ihowā nei hoki te kupu."

19 Nā, ka riro te maunga o Ēhau i te hunga o te tonga;

me ngā Pirihitini i te hunga o te mānia;

ka riro anō i a rātou ngā māra a Ēparaima me ngā māra o Hamaria;

mō Pineamine hoki a Kireara.

20 Nā, ko ngā whakarau o tēnei ope,

o ngā tama a Īharaira, ko ērā i roto i ngā Kanaani,

ka riro i a rātou tae noa ki Harepata;

ā, ko ngā whakarau o Hiruhārama, ko ērā i Teparara,

ka riro i a rātou ngā pā o te tonga.

21 Ā, ka tae ake he kaiwhakaora ki Maunga Hiona

hei whakawā mō te maunga o Ēhau;

ā, ka riro i a Ihowā te kīngitanga.