1 Yesu akatumbula kuvawula kavili kumwambu ya nyanja ya Galilaya. Ndava ya msambi uvaha wa vandu wewamtindili yaganikiwi ayingila muwatu na kutama, vandu voha vasigalili kundumba. 2 Ndi penapo avawuli mambu gamahele kwa miluhumu, akavajovela.

3 "Muyuwanila hoti! Mundu mmonga ahambili kumgunda kumija mbeyu. 4 Hinu paamijayi mbeyu, zingi zikagwilila munjila, videge vikabwela kuhola. 5 Mbeyu zingi zikagwilila palitalau, zikamela kanyata pandu pangali na ludaka lwamahele. 6 Lilanga palachonayi zanyalili na kuyuma, muni mikiga yaki yavi lepi na ludaka lwamahele. 7 Zingi zagwili pagati ya minga, minga yakulili na kuyihinya hati zapambiki lepi matunda. 8 Zingi zagwili paludaka lwa bwina, zikamela zikakula na kupambika yimonga selasini na yingi sitini na yingi miya yimonga."

9 Ndi akavajovela, "Mweavi na makutu gakuyuwana na amanyayi!"

10 Yesu peavili mwene, pagati ya vevamuyuwanili vala na vawuliwa kumi na vavili, vamuhambalili Yesu vakamkota, ndava ya miluhumu yila. 11 Akavajovela, "Nyenye mupewili kugamanya mambu ga mfiyu ga Unkosi wa Chapanga." "Nambu vevavi kuvala vala yati vakujiwula kwa miluhumu ndu, 12 muni,

‘Chakaka valolayi, nambu vilola lepi,

chakaka vayuwana, nambu vimanya lepi.

Manya vamuwuyila Chapanga,

namwene ngaavalekekisi.’ "

13 Kangi Yesu akavakota, "Ngati mwimanya lepi mana ya luhumu ulu? Mwihotola wuli kuyimanya mana za miluhumu yingi? 14 Mweimija mbeyu ndi imija Linenu la Chapanga. 15 Mbeyu zingi zagwilili munjila, ndi vandu vala vevayuwini linenu, Setani akabwela na kuliwusa linenu lenilo lelimijiwi mumitima yavi. 16 Mbeyu zila zezamijiwi palitalau ndi ngati vandu vala, veviyuwana linenu bahapo vakulipokela kwa luheku. 17 Nambu likuvayingila lepi nakuvya na mikiga mugati yavi, vakulikamula mulukumbi luhupi ndu. Na lukumbi lwa mang'ahiso peluhumila ndava ya linenu lenilo, vikuvanduka na kugwa. 18 Vandu vangi ndi ngati mbeyu zila zezagwilili pagati ya minga. Wenuwo ndi luhumu lwa vala veviyuwana linenu lenilo, 19 ndava ya mang'ahiso ga mulima uwu, mnogo wa kuvya na vindu vyamahele mnogo wa higa ukuvayingila na kulihinya linenu lenilo, na vene viyidikila lepi chila chelijova linenu. 20 Nambu vandu vangi ngati mbeyu zezimijiwi paludaka lwabwina. Venavo ndi veviyuwana linenu lenilo, vakuliyidakila na kupambika matunda. Vangi selasini, vangi sitini na vangi miya yimonga."

21 Yesu akavakota, "Mwaloli koki vandu vigubika hahi yeyiyaka na chiviga amala vivika kuhi kulusongwani? Lepi! Vivika panani pachibokoselu. 22 Hinu, goha gegafiyiki yati givya pawaka na goha gegagubikiwi yati gigubukuliwa. 23 Mweavi na makutu gakuyuwana na amanyayi!"

24 Akavajovela kavili, "Myuwanila chipimu chilachila chemukuvapimila vayinu, na nyenye yati mwipimiwa mewawa, na kuyonjokeswa. 25 Mundu yeyoha mweavi na chindu yati iyonjokesewa neju, nambu mweangavya na chindu hati chidebe ndi hati cheavi nachu yati inyagiwa."

26 Yesu akayendelela kuvajovela, "Unkosi wa Chapanga uvi ngati mundu mweimija mbeyu mumgunda waki. 27 Kilu igona, na muhi ivya mihu na lukumbi lwenulo mbeyu yimela na kukula. Mwene amanyili lepi chechihengeka. 28 Muni ludaka lwene lumelesa mbeyu. Yikula na kupambika. Yitumbula kumela linyai, yigelekela njechela na pamwishu mbeyu yikangala. 29 Mbeyu peyikangala mundu mwenuyo itola chikwakwa na kutumbula kubena muni lukumbi lwa mabenu luhikili."Mundu ibena kwa kuhengela chikwakwa

30 Yesu akajova kavili, "Unkosi wa Chapanga tiuwanangisa na kyani? Tiudandaulayi kwa luhumu lwoki? 31 Uwanangana ngati lumbeyu lwa haladali lweluvili ludebe kuliku mbeyu zoha zezimijiwa mumgunda. 32 Nambu yikamijiwayi, yimela na kuvya mkongo uvaha kuliku mikongo yoha mumgunda. Mambanda gaki gavaha hati videge vijenga hisakanilu mumambanda gaki."

33 Yesu avakokosili vandu ujumbi waki kwa miluhumu yingi yamahele ngati yeniyo, alongili nawu chavahotwili kumanya. 34 Lukumbi lwoha alongili nawu lepi chochoha changali miluhumu nambu paavi na vawuliwa vaki avadandaulili kila chindu.

35 Lilanga palatipimi ligono lilolo, Yesu akavajovela vawuliwa vaki, "Tikupuka kumwambu." 36 Hinu, vawuliwa vakaulaga msambi wa vandu, vakayingila muwatu weavili Yesu na kuwuka pamonga nayu. Na vandu vakayingila muwatu wungi vakamlanda. 37 Pavakupukayi, mpungu uvaha ukahumila manji gakutimbungana na kuutova watu na manji gakatumbula kumema muwatu.Watu mumanji gakutimbugana 38 Penapo Yesu avi mumbele ya watu kuni agonili pamsagamilu. Ndi vawuliwa vaki vakamuyimusa vakamkota, "Muwula, wuli, tifwaa ukutilolokesa ndu!"

39 Hinu, akayimuka, akauhakalila mpungu na kuujovela luyuga lwa manji, "Guna!" Ndi penapo mpungu wula ukaleka kubuma na nyanja yikavya nuu. 40 Yesu akavajovela vawuliwa vaki, "Mwiyogopa kyani? Wu, mwakona kusadika?"

41 Ndi penapo vavi na wogohi neju, vakatumbula kukotana, "Mundu uyu yani? Mbaka mpungu na manji gakutimbungana vikumyuwana na kuguna!"