Apocalipse 4

Joŋ yɛŋ ba nyaa mbɛɛŋsɛ Nyo le fɛwe

1 Ajiŋ a mwɛɛ mwɛɛ, ŋka mbijɛ, nɛ n’yɛŋ kimbuŋ fɛwe kiyɛse. Jɛ yɛɛ yì mbe n’ya yu wa yi jɛme mɛne njɛ soŋ, yi ka yi jɛmɛ mɛne lɛ, "Kɛ̂ŋsɛ tô fɛnɛ ndûnyɛ wo mwɛɛ mù kɛme ki mu kôoshɛ ajiŋ a kife kinɛ le." 2 Kimimia, nja ntu chiaaŋ yi Kiyo ki Nyo le, mɛ mo n’yɛŋ kala le wu nyu fɛwe, muh shii yu. 3 Muh wù gɛ̀ shilɛ wuyu gɛ̀ lale njɛ kfuu chi ata amu a tɛɛme kwa ba tɛŋe lɛ jasba mo a ba tɛŋe lɛ Kanelia, kila daa ki kɛnɛ kala wuyu, ki lale tɛ njɛ tɛdɛ chì ba tɛŋe lɛ ɛmelal. 4 Bakala bamu mbaanfiɛɛ ncho banɛh gɛ̀ bee bo kɛnɛ kala wuyu, bachɛ bamu shiiyɛ yu mbaanfiɛɛ ncho banɛh bo jiiyɛ njú yì baaŋ, bo booŋ bifo bi bvunfoŋ ba kɛnyɛ bɛ kichwa ki bige kì yɛɛde. 5 Jaŋ yì lale gɛ̀ bude yi kala wɛɛ le, yi ŋgbwame, yi kfuunɛ, bin’yesɛ bɛɛde a kala wuyu fwe bvusooshwi bì nyume biyo bi Nyo bì bvusooshwi. 6 Fiɛɛ fimi gɛ̀ bee tɛ a kala wɛɛ fwe fi fiɛɛnɛ joo yì baaŋ yimi yì yuude nɛ walala njɛ mijoo.

Mwɛɛ mu wuŋe mumu munɛh gɛ̀ bee mu lɛɛŋ mu kɛnɛ kala wuyu bimbe bichii ajii yisɛ lo yi mu le fwe bɛ ajiŋ. 7 Fiɛɛ fi wuŋe fì fwe gɛ̀ fiɛɛnɛ bvule, fì bii fo fiɛɛnɛ naa wù jwɛŋsɛ, fi ka bii fo kɛme bvushi njɛ bvu muh lɛ, fì ajiŋ fiɛɛnɛ nfa fɛ wu fuune. 8 Mwɛɛ mu wuŋe munɛh muyu gɛ̀ kɛme bibɛɛ bvusoo, bvusoo, mu yisɛ lo bɛ ajii we bɛ kuu. Mwɛɛ muyu to mu yɛɛne antaŋ bɛ fɛnshɛ mu luu gɛ. Mu gɛ̀ yɛɛne lɛ,

"Nyo yuude lo! Nyo yuude lo! Nyo yuude lo!

Le wu wù Tada Nyo wù Kɛme Bvuŋga Bvuchii.

Le wu wù gɛ̀ bee wa, wu nyume wu ge wu tô."

9 Mwɛɛ mu wuŋe muyu gɛ̀ doo mu tume maŋkuŋ ma Nyo, mu nyaa ŋgvunɛ bɛ kiyone muh wuyu wù le wu shii yi kala le, wù le yu segechii wu kage gɛ, 10 bachɛ ba mbaanfiɛɛ ncho banɛh baa mo bo gwe bo gɛɛŋ fwe a wu wù le wu shii yi kala le, bo nyaa mbɛɛŋsɛ wù baaŋ wuwɛɛ wù le yu segechii wu kage gɛ. Bo doo bo gee noo bo mo bo tu bo baayi bifo biboo bi bvunfoŋ lɛ, bo giŋse a kala fwe bo yɛɛne lɛ,

11 "Wo wù le Tada, wo le Nyo wese,

wo le wo kojɛ wù ba tume maŋkuŋ muŋ,

ba nyaa ŋgvunɛ wo le,

ba bɛɛŋse bvuŋga bwuŋ,

nje le wo wù gɛ̀ fɛ mwɛɛ munchii,

gɛ̀ koŋ wo ki wo fɛ̂ mu, fɛ mu nyume yu."