ԲԱՐՈՒՔ 5

1 Ո՛վ Երուսաղեմ,

հանի՛ր քո սգի ու ողբի հանդերձը

և հավիտյա՛ն հագիր Աստծու փառքի վայելչությունը։

2 Գցի՛ր քեզ վրա արդարության վերարկուն Աստծուց

և դի՛ր քո գլխին Հավիտենականի փառքի խույրը։

3 Քանի որ Աստված երկնքի ներքո ցույց կտա քո ամբողջ պայծառությունը,

4 և քեզ հավիտենական անուն կդրվի Աստծուց՝

«Խաղաղություն, արդարություն և աստվածպաշտության փառք»։

5 Ելի՛ր, Երուսաղե՛մ,

կանգնի՛ր բարձունքի վրա,

նայի՛ր արևելք ու տե՛ս

Սուրբի խոսքով արևելքից մինչև արևմուտք հավաքված քո որդիներին՝

Աստծուց հիշված լինելու համար զվարճացած։

6 Քանի որ քեզնից դուրս ելան ոտքով՝

թշնամիներից քշվելով,

բայց Աստված նրանց քեզ մոտ կբերի փառքով բարձրացած,

ինչպես թագավորության գահը։

7 Արդ Աստված հրաման տվեց,

որ բոլոր բարձր լեռներն ու հավերժական բլուրները խոնարհվեն,

և ձորերը լցվեն՝ երկիրը հարթեցնելու համար,

որպեսզի Իսրայելն Աստծու փառքի համար ապահով ընթանա։

8 Եվ բոլոր անտառները և ամեն մի անուշաբույր ծառ

Աստծու հրամանով հովանի կլինեն Իսրայելին,

9 քանի որ Աստված կառաջնորդի Իսրայելին ուրախությամբ,

իր փառքի լույսով,

ողորմությամբ և իր արդարությամբ հանդերձ։