1 Busa bomɔti, Kumu abala na Yona, mwana moomi ɔ Amitai boo: 2 «Emaa, kɛɛ ta ibonga inɛnɛ la Niniwe ko kebedja bato ba lu boo obe ba bobo boimei odii mbai.» 3 Bea Yona aemaa. Endolo tina ɛ otia ta Talasisi ohali na Kumu. Akɛɛ ta ibongu la Yafo ko atanea masua imakɛkɛ ta Talasisi; aputa tike ɛ nde ko atitea engbanga emɔti na basali ba masua tina ɛ otia Kumu ohali. 4 Endolo Kumu aloma ta ibeke ilinɔi na onɛnɛ lungu epipo. Ko lungu ena ɛngaledja mula monɛnɛ mbuti na odindedja masua. 5 Basali ba masua baluma na bɔɔ, moto na moto abanga obea ndjambe ɔ nde. Na bea, babanga odumba leka la bobo ta ibeke ilinɔi na onɛnɛ tina ɛ ohahanedja masua. Endolo Yona aingea ta kɔbɛ ɛ masua, asaama ko ahwɛɛ hiɔ ipipo. 6 Bea kumu ɔ basali ba masua abatama mbuti na nde ko abala boo: «Ɛdii yee? Ohwɛli! Emaa, bea ndjambe ɔ wɛ alokɔmɛdjae! Ehole ekina ndjambe ona alokealea ndjokwa ko alokinetelea boo lagwɛ.» 7 Basali ba masua basabaleana boo: «Doani! Labome djonga bɛngɛ boo ladjebe moto olokolei monɔngɔ muu.» Baboma djonga, ko ɛkwa odii Yona. 8 Na bea bamohɔdjaa boo: «Lotɔndɔɔ moto olokolei monɔngɔ muu. Ekasale wɛ ye? Ɔdongake wɛ hɔɔ? Ekomi ɛ wɛ nda ko ibota la wɛ nda?» 9 Yona abasɔmbɛdja boo: «Nadii Moebele, ko nakaongɔɔne Kumu ona odii ta busa ko ona ɔyoa ibeke ilinɔi na onɛnɛ na kpɔtɔ.» 10 Abatɔndɔɔ boo natiake ohali na Kumu. Bea basali ba masua baluma na bɔɔ bonɛnɛ ɔdjeba bo boo atiake Kumu. Bamohɔdja boo: «Tina ekɔi wɛ bea nda?» 11 Ta ehole ena mula maatɔmbɔkɔ oko otɔmbɔ. Bea bamohɔdja boo: «Eboani so okɔ na wɛ yee bɛngɛ boo ibeke ilinɔi na onɛnɛ lapɔpɔne mbuti na su?» 12 Yona asɔmbɛdja boo: «Tombanini ko maanini ta ibeke ilinɔi na onɛnɛ ko lipɔpɔnɔlea. Nadjebaka boo edii mbai moto ookoleini lungu hee enɛnɛ.» 13 Bato ba masua bapetaka sapa oko na olinda masua na kai bɛngɛ baimee ta ibongo; endolo baihɔnɔ tina ɛ boo lungu ɛdaka oko epipo. 14 Bea baongɔɔnɔ Kumu ko babala boo: «Ooo! Kumu , pɛpɛ olowa diko la moto hoo. Pɛpɛ olobakea mandi ma makia ma nde tina ɛ boo lotadjebaka noko modjɔ momɔti. Kumu edii wɛ mɛɛnɛ moto odii na kpati ɛ okɔ moda imapalaka wɛ.» 15 Ngɔngɔ djia batomba Yona ko bamomaa ta madiba, ambuku kɛlɛ ɛ ibeke ilinɔi na onɛnɛ ɛsia. 16 Bea bato bia badaa na bɔɔ bonɛnɛ odii Kumu, bamotumbea mbeka ko bamopa mbuno.