1 Yona aisepaka nongo na modjɔ momina ko alemoaka mɛnɛ. 2 Abalaka na Yawɛ: «Aa, Yawɛ editi ta meako mondumba mu, misabaleaki mbi ehole edaki mbi nadi adi mbi? Na tina emina nahombaki botia ta ibonga i Talasisi. Tengasa nadjebaka bopele boo odi Ndjakomba o epaeli ko o ndjokwa, okadae na molema moyai, oluma na epaeli ko na ndjea emina, okahombedje malɛno ma wɛ, napɛ bosombedja mabe adi bato ta mabe makɔibo. 3 Edɛdi mɛnɛ, Eee Yawɛ, tomba mohelo mo mbi. Tengasa enɔi na bopele nagwɛ boo nadae pɛ boda ta mohelo.»

4 Endolo Yawɛ amosɔmbedjaka: «Odɛibo! Olɛdji boo okɔi bopele mondumba malemoaka wɛ?» 5 Yona aimaka sokolu e ibonga ko akɛkɛ asadedja ta pamba ekime moyi. Oho, asatongeaka ekpangba e ndjani emɔti ko asadedjaka ta etitimo emina tine boamba midjɔ i makwake ta ibonga i Niniwe. 6 Yawɛ Ndjakomba atɔedjaka mole momɔti ko amokandodjaka tine bopa piyɔ ta molo mo Yona, bɛngi amogɔledje molema. Mole momina mosepedjaka Yona. 7 Endolo aya busa, Ndjakomba aimedjaka egungi okayake mele, eyakaka mole momina ko mokakanaka. 8 Iyana aimaka moyi mopipo, Ndjakomba alomaka mopɛpɛ mo pamba ekime moyi mua, mopaka edjungu epipo*. Moyi mobomaka molo mo Yona na ngulu. Mokuku mo Yona moembɛkɛ, abeaka bogwa ko abalaka: «Enɔi na bopele nagwɛ, endolo te boo nadae na bomɔ!»

9 Ndjakomba abalaka na Yona: «Walɛdjɛkɛ boo wakɔkɔ bopele moda malemoaka wɛ tine mole mu?» Yona asɔmbedjaka: «Soti, edi okobea nakɔkɔ bopele moda malemoaka mbi mbunoko bobea nagwɛ!» 10 Yawɛ abalaka naikina: «Oki saya ta molema tine mole i modai wɛ pɛ bokandodja, mokandoi oko ta bulu bomɔti ko mokakani oko ta bulu bokina! Na tina emina omokei saya? 11 Na bea, mondumba ndani mbi nadae pɛ bookea Niniwe ndjokwa ta molema? Ibonga imina inɛnɛ idi na bato bonɔ koto mokama na tuku ibae, ibadi pɛ nongo bodjeba botikoanedja meako mipele kaoko mibe* ko edi na bingbɛndɛ binɛnɛ?»