1 Boadji akɛɛ adaa ta modipe mo ngando enɛnɛ*. Ngɔngɔ dji moo ehole mokɛkɛ, mosikoi o ibota di Elimɛlɛkɛ iyona obalaka Boadji adoa anɔɔ ena. Boadji amobea: «Wɛ pete doa adae iya». Iyo aso adoa ko adaa na mobondo. 2 Iboa Boadji abea baami doomi ta tei e basuku ba ngando enɛnɛ badae na bu. Ibo baso badaa na mobondo. 3 Boadji awadja na mosikoi ibo: «Naomi ahuli ta ekomi e Moabi. Apalakadea atɛkise mokpɔtɔ mo mwange e biso Elimɛlɛkɛ. 4 Mbi nasepi nabale na wɛ modjɔ momina ko naotɔndee osombe mokpɔtɔ momina boso bo basuku ko na boso bo bato ibibi basusu badii iya edɛdiyeye. Okapala bosomba somba, emiti bɔngɔ tɔndea mbi, modjɔ mo ngɔngɔ dji wɛ edii mbi moto abwani botomba ikoki dimina.» Moomi omina asɔmbedja bo: «Napalakadea namosombe.» 5 Boadji abala bo: «Busa bosombadea na wɛ mokpɔtɔ momina ta dii Naomi, otungi bosikoa pongono Luta moto o Moabi, mwali o mwange e biso ogwa obote na nde bɛngi mokpɔtɔ momina modikame mo muma nde o gwa*.» 6 Mosikoi omina asɔmbedja bo: «Ekadaa iboa naloni, nitasikoakadea midjɔ mimina, nasaka bedja bodieli bo mbi. Wɛ mɛnɛ sikoa midjɔ mimina, modjɔ mo mbi nita hɔnɔ.»

7 Ndelo ekina ta Isalɛlɛ, bɛngi basukedje modjɔ mosusu moindji bosomba eka emɔti kaoko bosandja eka emɔti ta polo e eka ekina, moto omɔti ta tei e bobo aiwaka sapato dji nde ko adjipaka ta dii okina bɛngi basukedje modjɔ. Ikambo dimina diinedjaka bo badhimeani. 8 Ta tina emina ta ehole ebalaka mosikoi na Boadji asombe mokpɔtɔ, aiwa sapato dji nde ko aso amopa. 9 Iboa, Boadji abala na basuku ko na bato basusu badaa ena bo: «Ino bɛnɛ odiini ba temo busa ibubu bo nasombi ta dii Naomi leka losusu lodaki lo Elimɛlɛkɛ, Kiliɔni na Mahalɔni. 10 Natombi pongono Luta moto o Moabi mwali o Malɔni ogwa. Namobotee bana ibia basangoadea bodieli bo nde, ibota di nde adae pɛpɛ bolɛmɔ ta tei e denga di nde kaoko ta ngando enɛnɛ e nde. Ino bɛnɛ odiini ba temo busa ibubu.» 11 Basuku na bato ibia badaka ena babala bo: «Iso lodii batemo. Kina bo Kumu adjongoe mwali iyona osakwea ta ndako e wɛ; adae mondumba momɔti na Lasɛlɛ ko na Lea ibia babota bato ba Isalɛlɛ! Kina bo bodieli bo wɛ bodae bonɛnɛ ta ibota di Epalata* ko kombe e wɛ edjebame ta Bɛtɛlɛlɛmɛ esusu! 12 Kina bo Kumu aopɛ bana banɛnɛ na ndjea e moseka mwali ko ibota di wɛ didae ondingo ibota di Pelɛsi*, mwana o Yuda na Tamale!»

13 Iboa Boadji atomba Luta ko aimea mwali o nde. Kumu amodjongoa alwa deemi ko aso abota mwana moomi. 14 Bali babala na Naomi bo: «Kumu asɔe ekumu! Iyo akiniti busa ibubu bo otake mosikoi. Kina bo kombe e nde edie gala ta isalɛlɛ! 15 Asɔmbɔtɔnɔdea bomɔ bo wɛ ko aobaneadea ta ehole eimeadea wɛ mobange. Modjɔ mo bokiyo bo wɛ o mwali okaopale aboti mwana moomi, iyo anɔi kutu bana baami sambo.» 16 Naomi atomba mwana amobakea ta bupa bo nde* ko aso amobɔkɔ. 17 Bali badaka mbuti mbuti babala bo: «Babotei Naomi mwana moomi!» Bamobakea kombe e «Obɛdi». Obɛdi adaka sange Yisai iyona odaka sange e Dapiti.

18 Indja molɔngɔ mo motangi mo bakɔkɔ ba Dapiti bobanga ta dii Pelɛsi: Pɛlɛsi abota Hesolɔni, 19 Hesolɔni abota Lama, Lama abota Aminadaba, 20 Aminadaba abota Nasoni, Nasoni abota Salama, 21 Salama abota Boadji ko Boadji abota Obɛdɛ, 22 Obɛdɛ abota Yisai ko Yisai abota Dapiti.