2 Pedro 2

Ayiool ba mfya

1 Kɛn a tsɔɔn-tsɔɔn, aliaal-ɛ̃kiɛɛn ba mfya áli onse yam li Isalayel. Emfa kiki hɛ̃, onse byɛ, ayiool ba mfya akieel apal. Bɔ akieel alɔ ãtee m’ãdzeel baal onse byɛ m’ãyal, bvool abee Ɔ̃tee wu ásuun bɔ. Bɔ akieel asa kwɛn odziɔɔn b’enseel oya nkal a bam. 2 Baal bibi akieel anɔɔn a bɔ onse ãndɔɔ ã bɔ m’opfuru, bvool me ndɔɔ a bɔ, akieel asiaan nkuul yi otaa-taa. 3 Me ndɔɔ a nzal a nzi yi eli a bɔ, bɔ akieel apfuru byɛ m’esesam bvi eburu bɔ m’oburu. Kɛn etel-nziil, etumbu e bɔ ámaayɛɛl, bvool odziɔɔn o bɔ k’òbeyiil wɛ. 4 Ke ngwel wɛ, Nziã k’ákwɛɛn k’awa ãnzwel m’ã́si obi etumbu wɛ, kɛn a ndɛ átyel mɔ̃ onse ywɛn e mbaa. Oyɔ mboo yi ákwee mɔ̃ m’okuru onse lempeel, me ndɔɔ a tsoo li akieel atsiil ãndɔɔ ã baal. 5 Ndɛ hɛ̃ k’ákwɛɛn k’awa ɔ̃kiri wa tsɔɔn etumbu wɛ, kɛn a ŋ’éyuɔɔl ndɛ mpel yi nɛn onse ɔ̃kiri ondɛ wɛn baal k’ákelweel ndɛ wɛ, ndɛ ábvuul kɛn a Nowa ye baal nsiaan akyam. Ndɛ wu Nowa wu áketee ãndɔɔ mã dzu✝2.5 Obɛ 6.1–7.4. 6 Nziã hɛ̃ áwi bviil li Sodom ye li Gomɔɔl etumbu me mbaa yi ékaal mɔ̃ lefuru. M’emfa okyɛ, ndɛ ŋ’ásuul mɔ̃ ndɔɔ yi esuo baal b’abesa ãbi ndɔɔ yi ekieel eya✝2.6 Obɛ 19.24. 7 Kɛn ndɛ ábvuul Lot, wu mbuul wa dzu wu áyoo ãwua bibi me ndɔɔ epfuũ bvi opfuru bvi baal b’edzyal✝2.7 Obɛ 19.1-16. 8 Ke ngwel wɛ, ndɛ wa dzu wu ákekal onse bɔ, tsoo bwɛn a tsoo, ákeyoo mpal onse ɔ̃kwal a ndɛ wa dzu, me ndɔɔ ãndɔɔ m’ãbi-ãbi m’ékemwɛn ndɛ bvool m’ékeyoo ndɛ. 9 Obobɔ, Mfam oyɛɛ emfa ki abvuul baal b’akuru nzuru me ndɛ onse ɔ̃mbio, bvool oyɛɛ k’asuul b’asa ãbi me pyɛ me ndɔɔ yi awa bɔ etumbu me tsoo li àtsiil ãndɔɔ ã baal. 10 Ndɛ bvel-bvel awa etumbu me baal b’abenɔɔn efua e bam bvi ebi-ebi bvool abesiaan omfam o Nziã. Ayiool ba mfya obɔ ali ye nzal a nsia y’ondɛɛl o dzuru bvool k’abebal k’atoo eluɔ e lweel bvi ke ywel wɛ. 11 Onkyam ãnzwel m’ãli ye mpɛn ye waan bibi, mɔ̃ k’ãbefɛn eluɔ e lweel obvɛ wɛ, k’ãbetoo bvɛ hɛ̃ ke nkwel a Mfam wɛ. 12 Kɛn a baal obɔ ali onge anyam bɛn ãyal pyɛ, b’ábuo me ndɔɔ yi abekwɔɔl m’abɛɛ bvool me ndɔɔ yi abebam. Bɔ abetoo bvɛn bɔ k’ayɛɛ wɛ, obobɔ bɔ àkwa onge anyam. 13 Bɔ àbɔɔ obi onge furu li obi b’ési bɔ. Bɔ ayoo esɛ m’osa b’ãndɔɔ m’etam efua e nzuru, mwiĩ lɛ. Bɔ asa ãndɔɔ mã mbiin ye m’opfuru. Ŋ’ebebɛɛl bɔ ãpfuun ye byɛ, bɔ abeyoo esɛ ki apfuru byɛ. 14 Mviil ã bɔ ãluul m’esio bvool bɔ k’abeyool m’osa b’obi wɛ. Bɔ abedzuru baal b’eli okiool nkuaal-a-nkuaal. Ɛ̃kwal ɛ̃ bɔ ɛ̃luul m’ɔ̃tam, bɔ baan b’ápuul ali. 15 Bɔ amaasiil nkuul yi dzu, amaatwal wuaan, ŋ’enɔɔn a bɔ nkuul yiyi onge Balam wu muaan a Bosɔɔl. Balam wu ádzii furu li ebi-ebi. 16 Kɛn a ndɛ ábɔɔ mbyel me ndɔɔ obi o ndyam. Ke ngwel wɛ, ane, wu nyam wu ɔ̃mbiri ãpfuũ wɛn k’ali y’ɔ̃nywa wu ayɛɛn wɛ, áyɛɛn me nkii yi mbuul, bu atɛɛl owool b’ɔ̃liaal-ɛ̃kiɛɛn Balam.✝2.16 Ɛ̃bv 22.4-35 17 Ayiool ba mfya obɔ ali onge ɛ̃tswɛ mi amvieel mi ɛ̃ywɛn a ãdza bvool onge epɛn bvɛn mfel a mpuru abetsɛɛn. Ákwee bɔ mboo onse lempeel li tsia. 18 Bɔ abeyɛɛn ãndɔɔ m’ondɛɛl o nzuru bvool mɛn otsɛn pyɛ. Bɔ abewal efua e nzuru onge elii ki edzuru baal b’apal alili oŋɔ̃ onse nkel a adzɛɛn. 19 Atee obɔ abeliaal baal obɔ ndiri bɔ apaal bɔ onse onkyal, ŋ’asa kwɛn bam ali ankyal b’efua bvi ebiri bam k’obii. Ke ngwel wɛ, eluɔ enyam mbuul, ndɛ oyii ɔ̃nkyal a kyɛ. 20 Ke ngwel wɛ, ke mbee a ŋ’epal bɔ onse ãndɔɔ m’ãbi-ãbi m’ɔ̃kiri me nkuul yi oyɛɛ o Mfam y’Ɔ̃mvuul a bia-byɛ Yeso Mãsia, bɔ bvool ayɔɔl ãndɔɔ omɔ̃ ãbiri bɔ bvool ãnyam bɔ. Fool e bɔ li alili enduru li tsɔɔn. 21 Ngesɛ bɔ akaabee nkuul yi dzu oyɛɛ, ye kwɛn bɔ ayɛɛ yɔ bvool ayiri ngel yi ɔ̃nsensal yi áwi bɔ. 22 Mboo élieel taa-taa me ndɔɔ a bɔ ndiri: «Mva okɔɔl k’eloo e ndyam✝2.22 Ãmb 26.11», bvool ndiri: «Nguru wu afi osuɔɔl, okɔɔl oyekeel nzuru onse tɔɔl.»