1 Andoo a mɛ̃, mɛ̃ nzii kwɛn byɛ ebee ndɔɔ yi odzɛɛn: Ankiɔɔn a bia-byɛ bueel áli ke nsɛn ebwii, bɔ bueel átsiil ãdza m’ɔ̃ngwa.✝10.1 Opa 13.13-21; 14.19-29 2 Bɔ bueel áwel opongo o Moyize, onse ebwii bvool onse ãdza m’ɔ̃ngwa. 3 Bɔ bueel ádzi bvi-odza abvi-bvi bvi ɔ̃fel, 4 bvool bɔ bueel ánywi ãdza amamã m’ɔ̃fel. Ngwanyã, bɔ ánywi ãdza ke nkɔɔn yi ɔ̃fel yi ékedzuu ye bɔ, nkɔɔn oyɔ éli Mãsia. 5 Kɛn a bibi onse bɔ k’ási Nziã esɛ wɛ, obɔ otsɛn bɛn ebiĩ e bɔ elaal abɔ-bɔɔ onse ɔ̃baan wa kɛɛ-kɛɛ✝10.5 Ɛ̃bv 14.16.

6 Ãndɔɔ omɔ̃ ãsuo bia-byɛ emfa ki edzuu. M’emfa okyɛ, bia-byɛ kieel k’ekal y’efua bvi ebi-ebi wɛ, onge bvi éli y’ankiɔɔn a bia-byɛ. 7 Byɛ ebee etiɔ obuɛɛn onge b’ési bakyɛ onse bɔ. Ákel onse Ɔ̃nkaan a Nziã ndiri: «Baal abvi nsɛn me ndɔɔ yi adza, bvool anywã, bu atɛɛn m’osa b’ɛ̃taan✝10.7 Opa 32.6.» 8 Bia-byɛ ebee nzuru m’ãndɔɔ m’esio owa onge b’éwi bakyɛ onse bɔ, bu ákwi amiil ãku-mbuaal y’atyel (23.000) tsoo ngelemɔ̃✝10.8 Ɛ̃bv 25.1-18. 9 Ebee Mãsia okie onge b’ési bakyɛ onse bɔ, antaal bu abam bɔ. 10 Ebee oŋwaã onge b’éŋwaã bakyɛ onse bɔ. Ãnzwel m’ãkebaan baal ãbam bɔ✝10.10 Ɛ̃bv 14.2,36; 17.6-14.

11 Ãndɔɔ omɔ̃ ã́yi onse bɔ, me ndɔɔ yi esuo bia-byɛ emfa ki edzuu. Ákel mɔ̃ me ndɔɔ yi ãwa bia-byɛ ãnkunkwa, bia-byɛ b’eyii ke lio li ntɔ. 12 Obobɔ, yɔɔl kwɛn wu atsam ndiri ndɛ oli tɛ, akal y’onkyab kwɛn ndɛ abee obva. 13 Ɛ̃mbio mvieel mi ɛ̃yi onse byɛ ɛ̃li mi ɛ̃beya onse baal bueel. Nziã oli wu obvaan m’okiool: Ndɛ k’àwa nkuul kwɛn ombio b’ambio byɛ obvel byɛ mpɛn wɛ. Me lio li ɔ̃mbio, ndɛ àwa byɛ mpɛn yi ekuru ɔ̃kwal bvool àsuo byɛ nkuul yi epal onse ndɛ.

14 Obobɔ, andoo a mɛ̃ a dzii, ebee etiɔ obuɛɛn. 15 Mɛ̃ eyɛɛn ye byɛ onge b’ayɛɛn ye baal b’ãyal. Oŋɔ̃ byam ebwɛɛl m’eyɛɛn mɛ̃ ngesɛ. 16 Emeetsam me ndɔɔ a mbiɔ yi ɔ̃laan a Mfam yi ebebveel bia-byɛ Nziã ãtuɛɛn me ndɔɔ a yɔ: Ŋ’ebenywã bia-yɛ yɔ, yɔ k’ebebvool bia-byɛ y’ãkel ã Mãsia wɛ? Mampa wu ebekab bia-byɛ: Ŋ’ebedza bia-byɛ ndɛ, ndɛ k’abebvool bia-byɛ ye nzuru a Mãsia wɛ? 17 Mampa oli kɛn a ngɔmɔ̃. Obobɔ, bia-byɛ b’eli bibi eli nzuru ngamɔ̃, ke ngwel wɛ bia-byɛ ebekab mampa ngɔmɔ̃.

18 Emeetsam me ndɔɔ a baal b’Isalayel: B’abedza ãtuo b’abewa Nziã ãmpɔɔ nkal a nkiin ali me bvoo ye Nziã. 19 Mɛ̃ oŋɔ̃ ŋe ngyɛɛn wɛn nki? Tuo li awi mpɔɔ ol’etiɔ oli ye dzuun? Etiɔ eli ye dzuun? 20 Hɛɛ̃-hɛ̃, bvi awa mpɔɔ, akab bvɛ ol’ɛ̃fel mi ɛ̃bi-ɛ̃bi, k’ola Nziã wɛ. Mɛ̃ ke nzii kwɛn byɛ ekal ye bvoo y’ɛ̃fel mi ɛ̃bi-ɛ̃bi wɛ. 21 Byɛ k’ekoo m’onywã mbiɔ a Mfam, bvool enywã mbiɔ a ɛ̃fel mi ɛ̃bi-ɛ̃bi wɛ. Byɛ hɛ̃ k’ekoo m’odza ke misa a Mfam bvool edza hɛ̃ ke misa a ɛ̃fel mi ɛ̃bi-ɛ̃bi wɛ. 22 Wuo bia-byɛ edzii k’epwee Mfam? Bia-byɛ enduru Mfam mpɛn?

23 «Awi nkuul yi asa mbueel.» Ngwanyã, kɛn a mbueel k’ãli ngesɛ wɛ. «Awi mɛ̃ nkuul yi esa mbueel», kɛn a mbueel k’ãwɛɛl baal wɛ. 24 Yɔɔl kwɛn mbuul si ɔ̃mɔ̃ abee kɛn obvɛ o ndyam obii, abii bo bakyɛ!

25 Edza bvieel bvi atiɔ ke yu, ebee ofuul wɛn bvɛ kwɛn efi, kwɛn ɛ̃kwal ɛ̃bee obii. 26 Ke ngwel wɛ, ákel ndiri: «Nsie ye bvieel bvi onse yɔ, eli bvi Mfam✝10.26 Ãnz 24.1.» 27 Ŋɛn mbuul wɛn k’ɔ̃kiool wɛ oti byɛ mbel yi odza, byɛ eyi okɔ, edza bvieel bvi ebuun ndɛ byɛ. Ebee ɔ̃mfuul si ngɔmɔ̃ ofuul wɛn bvi-odza bvi kwɛn efi, kwɛn ɛ̃kwal ɛ̃bee obii. 28 Kɛn a ŋɛn mbuul olieel byɛ ndiri: «Tuo olɔ, awi lɔ mpɔɔ ol’etiɔ», ebee lɔ odza, me ndɔɔ a wu owi byɛ nsia oyɔ, bvool me ndɔɔ yɛn ɛ̃kwal ɛ̃bee ɛ̃bii. 29 Ŋ’eyɛɛn mɛ̃ wɛn «me ndɔɔ yɛn ɛ̃kwal ɛ̃bee obii», mɛ̃ k’eyɛɛn me ndɔɔ ɛ̃kwal ɛ̃ byɛ wɛ, me ndɔɔ ɔ̃kwal a ndɛ. Otsɛn omã bɛn ãtsam m’ɔ̃kwal a mbuul ɔ̃kyam ãkoo k’ãluo mɛ̃ k’esa benzii mɛ̃? 30 Okɛɛn mɛ̃ ebveel Nziã ãtuɛɛn me ndɔɔ a ki edza mɛ̃, otsɛn omã bɛn ol’apfiɔɔl mɛ̃ bvool me bvɛn mɛ̃ bam emeebveel ãtuɛɛn? 31 M’emfa okyɛ, ekal ŋ’edza byɛ, ekal ŋ’enywã byɛ, wuo ŋ’esa byɛ ndɔɔ yueel, esa yɔ me ndɔɔ a lweel e Nziã. 32 Ebee mbuul si ɔ̃mɔ̃ obal m’obi: Ekal Ayuda, ekal bɛn k’Ayuda wɛ, ekal Ebvɔɔn e Nziã. 33 Esa onge b’ebesa mɛ̃: M’ãndɔɔ mbueel, mɛ̃ ebesa mpɛn yi ewa mbuul wueel esɛ. Mɛ̃ k’ebii obvɛ o myam wɛ, mɛ̃ ebebii obvɛ b’ɔ̃bobɔ a baal, kwɛn bɔ abvuul.