1 Me b'otal tuo li awi mpɔɔ ol'etiɔ, bia-byɛ bueel eyɛɛ ndɔɔ oyɔ, onge b'ebeyɛɛn byɛ. Oyɛɛ obɔ osuul mbuul akal y'ondɛɛl o nzuru, kɛn a dzii ewɛɛl baal. 2 Okɛɛn mbuul atsam ndiri ndɛ oyɛɛ ndɔɔ, ŋɛn ndɛ kɛn k'ayɛɛ yɔ m'emfa kyɛn ebvaan ndɛ akaayɛɛ yɔ wɛ. 3 Kɛn a wu odzii Nziã, Nziã oyɛɛ ndɛ. 4 Obobɔ, me b'otal odza o tuo li awi mpɔɔ ol'etiɔ, bia-byɛ eyɛɛ wɛn etiɔ m'ɔ̃kiri pyɛ, bvool eyɛɛ wɛn Nziã oli kɛn a ngɔmɔ̃. 5 Ngwanyã, baal bakyɛ abeyɛɛn ndiri eli y'anziã ke ywel ye nsie. Eli taa-taa, m'ãtsam ã bɔ, eli y'anziã bibi y'amfam bibi. 6 Kɛn a me ndɔɔ a bia-byɛ, Nziã oli kɛn a ngɔmɔ̃. Ndɛ wu Taal wu ábuo eluɔ bvieel, bvool wɛn me ndɛ bia-byɛ eli y'omwiĩ. Mfam oli kɛn a ngɔmɔ̃: Eli Yeso Mãsia, wɛn me nkuul a ndɛ ábuo eluɔ bvieel, bvool wɛn me ndɛ bia-byɛ eli y'omwiĩ.

7 Kɛn a baal bueel k'ali y'oyɛɛ obɔ wɛ. Bakyɛ tiil meba ali y'epfuũ ki abebuɛɛn etiɔ. Ŋ'ebedza bɔ tuo li awi mpɔɔ ol'etiɔ, bɔ abekiool ndiri eli mpɔɔ yam yi awi ol'etiɔ obvɛ. Onge bɛn bɔ kɛn awam onse ãndɔɔ ã Nziã wɛ, bɔ abetsam ndiri bɔ ali ye mbiin me ndɔɔ anyam obɔ. 8 Ŋ'esa oŋɔ̃, bvi-odza k'esiaal bia-byɛ tsotsoo ye Nziã wɛ: Ŋɛn bia-byɛ k'edzi bvɛ wɛ, bia-byɛ ki eywɛn pyɛ, ŋɛn bia-byɛ edzi bvɛ, bia-byɛ ki ebɔɔ hɛ̃ pyɛ.

9 Ekal y'onkyab! K'ebvaan kwɛn mɛn byɛ ekoo k'esa ãbal akiool bɛn kɛn awam wɛ. 10 Ke ngwel wɛ, yɛ wa y'oyɛɛ, ŋɛn mbuul wɛn kɛn awam onse ãndɔɔ ã Nziã wɛ omwɛn yɛ adza onse nzɔ yi abuɛɛn etiɔ, ol'esɛn bwɛn? Ol'esi kwɛn ndɛ hɛ̃ atɔ k'odza o tuo li awi mpɔɔ ol'etiɔ. 11 Obobɔ, me ndɔɔ oyɛɛ o yɛ, ɔ̃kiool wɛn kɛn awam wɛ àbva, ndɛ wu ndoo wu ékwi Mãsia me ndɔɔ a ndɛ. 12 Ŋ'esi byɛ andoo obi m'emfa okyɛ, bvool etɛn ɛ̃kwal ɛ̃ bɔ bɛn kɛn awam wɛ, byɛ ŋ'esi obi ke nkwel a Mãsia. 13 Obɔ otsɛn bɛn okɛɛn bvi-odza ebal ndoo a mɛ̃, mɛ̃ k'edza tuo bam wɛ, kwɛn mɛ̃ mbee k'ebal ndoo a mɛ̃.