1 Ŋ'ɛ̃kwel kɛn ebii k'ekal ye dzii. Ekal y'efua ki bibi me ndɔɔ ãkab m'Ɔ̃fel, bvel-bvel kab li aliaal ɛ̃kiɛɛn ɛ̃ Nziã. 2 Ke ngwel wɛ, ŋ'eyɛɛn mbuul wa ye kab li ayɛɛn ɛ̃nywã, ndɛ ke ye baal abeyɛɛn wɛ, ndɛ ye Nziã abeyɛɛn. Mbuul k'akwaal m'eyɛɛn ndɛ otsɛn wɛ. Me waan li Ɔ̃fel wu Ɔ̃nsensal, ndɛ ayɛɛn ãndɔɔ mã m'edziɔɔn. 3 Kɛn a mbuul wu aliaal ɛ̃kiɛɛn ɛ̃ Nziã, ye baal abeyɛɛn: Ndɛ abvool baal, awa bɔ mpɛn, bvool abweel bɔ. 4 Wu ayɛɛn ɛ̃nywã awɛɛl okiool o ndyam, kɛn a wu aliaal ɛ̃kiɛɛn ɛ̃ Nziã awɛɛl Ebvɔɔn.

5 Mɛ̃ nzii bam kwɛn byɛ bueel eyɛɛn ɛ̃nywã, kɛn a bvel-bvel mɛ̃ nzii bam kwɛn byɛ aliaal ɛ̃kiɛɛn ɛ̃ Nziã. Wu aliaal ɛ̃kiɛɛn ɛ̃ Nziã onduru wu ayɛɛn ɛ̃nywã, yɛɛn wɛn nsɔɔ̃ wu ayɛɛn ɛ̃nywã akaal myɛ̃, kwɛn Ebvɔɔn ewam. 6 Andoo, ŋɛn mɛ̃ ngyi ola byɛ, bu mvi ɛ̃nywã oyɛɛn. Ŋɛn ãyɛɛn ã mɛ̃ k'ãsa byɛ ndɔɔ wɛ, k'ãyɛɛl byɛ ndɔɔ wɛ, k'ãwa byɛ oyɛɛ wɛ, k'ãliaal byɛ ɔ̃kiɛɛn wu ofi ola Nziã wɛ, k'ãyiool byɛ ndɔɔ wɛ, mɛ̃ oŋɔ̃ ŋe ngueel a byɛ?

7 Eli emfa kiki me ndɔɔ eluɔ bvi asio mpaa onge nsiɛɛn wuo nguɔ̃. Okɛɛn ɔ̃kam k'ali mpɛ̃-a-mpɛ̃ a nkii a eluɔ obvɛ wɛ, obobɔ ayɛɛ bwɛn a bwɛn wɛn yi nkii a nsiɛɛn, yi ye nguɔ̃? 8 Okɛɛn nkii a mvel-a-mvel k'eli kal-a-kal wɛ, wu awal ɔ̃yɛɛl wu ayedzwaan mvel nã? 9 Emfa kiki hɛ̃ me ndɔɔ a byɛ, okɛɛn m'ɛ̃nywã ɛ̃ byɛ, byɛ k'eyɛɛn ndɔɔ yi y'otsɛn wɛ, ayɛɛ m'eyɛɛn byɛ bwɛn? M'emfa okyɛ, ãyɛɛn ã byɛ ãkal mã ngwel! 10 Ɛ̃nywã ɛ̃li bibi m'ɔ̃kiri, bvool onse myɛ̃ wu oywɛn a otsɛn pyɛ. 11 Okɛɛn mɛ̃ k'eyoo ɔ̃nywã a mbuul wu ayɛɛn ye mɛ̃ wɛ, mɛ̃ olɔ ngyii onge ɔ̃nzii ke nkwel a ndɛ, ndɛ hɛ̃ ol'oyii onge ɔ̃nzii ke nkwel a mɛ̃. 12 Eli emfa kiki hɛ̃ me ndɔɔ a byɛ. Onge bɛn byɛ ebebii ãkab m'Ɔ̃fel, ebii mɔ̃ bvool bibi, kɛn ebvaan ekal me ndɔɔ yi esa kwɛn Ebvɔɔn ewam.

13 Obobɔ, yɔɔl kwɛn wu ayɛɛn ɛ̃nywã, abuɛɛn kwɛn Nziã awa ndɛ kab li akaal myɛ̃. 14 Ke ngwel wɛ, ŋ'ebuɛɛn mɛ̃ m'ɛ̃nywã, ɔ̃fel a mɛ̃ oli onse ãbuɛɛn, kɛn ãyal a mɛ̃ k'ãsal wɛ. 15 Oŋɔ̃ esa bwɛn? Mɛ̃ èbuɛɛn m'Ɔ̃fel, mɛ̃ hɛ̃ èbuɛɛn y'ãyal. Mɛ̃ èyam m'Ɔ̃fel, mɛ̃ hɛ̃ èyam y'ãyal. 16 Okɛɛn yɛ abveel Nziã ãtuɛɛn kɛn a m'ɔ̃fel, emfa emã kyɛn bɛn k'akwaal otsɛn wɛ ol'ayɛɛn ndiri: «Amɛn!» M'ebuɛɛn e yɛ? Ke ngwel wɛ, bɔ k'ayɛɛ m'eyɛɛn yɛ wɛ. 17 Ngwanyã, ebuɛɛn olɔ eli ngesɛ, kɛn a lɔ k'ewɛɛl bakyɛ wɛ.

18 Mɛ̃ ebveel Nziã ãtuɛɛn me ndɔɔ yɛn mɛ̃ nduru byɛ bueel m'oyɛɛn b'ɛ̃nywã. 19 Kɛn onse ebvɔɔn, mɛ̃ ebedzii k'eliaal ãyɛɛn ãtaan mã y'otsɛn me ndɔɔ yi ewa bakyɛ ãyal, ke mboo a k'eliaal mɛ̃ ãyɛɛn amiil kuun (10.000) m'ɛ̃nywã.

20 Andoo, ebee onge baan b'abwee okal m'emfa ki etaal byɛ ãndɔɔ. Me b'otal obi, ekal onge baan b'abwee. Kɛn a me b'otal otaal b'ãndɔɔ, ekal onge akuul. 21 Ke ngwel wɛ, ákel onse Ngel a Moyize bubu:

«Mfam olieel bubu: "Mɛ̃ ekieel eyɛɛn ye yam li me nkuul baal b'ɛ̃nywã ɛ̃kyam.

Mɛ̃ ekieel eyɛɛn ye bɔ m'ɛ̃nywã mi anzii.

Onkyam obobɔ, bɔ kieel k'ayoo mɛ̃ wɛ."✝»

22 M'emfa okyɛ, oyɛɛn b'ɛ̃nywã oli eliĩ me ndɔɔ a baal bɛn k'akiool wɛ, ke me ndɔɔ akiool wɛ. Kɛn oyɛɛn b'ɛ̃kiɛɛn ɛ̃ Nziã oli eliĩ me ndɔɔ akiool, ke me ndɔɔ a bɛn k'akiool wɛ wɛ.

23 Emeeta mboo yi: Ŋɛn Ebvɔɔn kieel ebvɔɔn, akiool bueel bu abvi ɛ̃nywã oyɛɛn. Ŋɛn akiool bɛn k'ayɛɛ ãndɔɔ omɔ̃ wɛ, wuo baal bɛn k'akiool wɛ, apal oŋɔ̃, bɔ mpii ol'abvi otsam ndiri byɛ eli y'owool! 24 Kɛn okɛɛn bueel ayɛɛn ɛ̃kiɛɛn ɛ̃ Nziã, mbuul wɛn k'ɔ̃kiool wɛ, wuo ɔ̃kiool wɛn k'ayɛɛ ãndɔɔ omɔ̃ wɛ aya oŋɔ̃, m'eyoo ndɛ ãsuo ndɛ kwɛn ndɛ oli mbuul nga-ãbi, bvool ndɛ akyɛɛl nzuru me ndɔɔ a mbueel m'eyoo ndɛ. 25 Ãndɔɔ mã m'edziɔɔn onse ɔ̃kwal a ndɛ ãmɔɔn. Obobɔ, ndɛ abva ãbuo mbwii me nsie, alweel Nziã ndiri: «Ngwanyã, Nziã oli onse byɛ!»

26 Andoo, oŋɔ̃ esa bwɛn? Ŋ'ebvɔɔn byɛ, mbuul ngɔmɔ̃ okoo k'ayam, wumɔ̃ okoo k'ayiool, wumɔ̃ bvool okoo k'ayɛɛl ndɔɔ, wumɔ̃ bvool okoo k'ayɛɛn ndɔɔ m'ɛ̃nywã, wumɔ̃ hɛ̃ okoo k'akaal yɔ. Kɛn ebvaan kwɛn omɔ̃ mbueel ãsa kwɛn Ebvɔɔn ewam. 27 Okɛɛn baal ayɛɛn ɛ̃nywã, yɔɔl kwɛn ekal ye baal buaal, ŋ'enduru bɔ olɔɔ atyel. Kɛn ebvaan kwɛn bɔ ayɛɛn m'ɔ̃mɔ̃ ɔ̃mɔ̃, bvool ebvaan ekal ye mbuul wu akaal. 28 Okɛɛn wu akaal pyɛ, yɔɔl kwɛn bɔ akal pi onse Ebvɔɔn, wu ayɛɛn, ayɛɛn ye ndyam bvool ye Nziã. 29 Me b'otal baal b'ayɛɛn ɛ̃kiɛɛn ɛ̃ Nziã, yɔɔl kwɛn ekal baal buaal wuo atyel, bakyɛ abwɛɛl m'eyɛɛn bɔ. 30 Okɛɛn mbuul ɔ̃kyam oli y'ɔ̃kiɛɛn a Nziã wu ayɛɛn, yɔɔl kwɛn wu akeyɛɛn tsɔɔn akal pi. 31 Ke yam, byɛ bueel ekoo k'eyɛɛn ɛ̃kiɛɛn ɛ̃ Nziã, m'ɔ̃mɔ̃ ɔ̃mɔ̃, kwɛn bueel akal y'ãyal, bvool awam. 32 Aliaal-ɛ̃kiɛɛn a Nziã ali y'okwɛn nkal ɛ̃fel ɛ̃ bɔ. 33 Ke ngwel wɛ, Nziã k'ali Nziã wu ɛ̃tswab wɛ, ndɛ oli Nziã wu opi.

Onge b'abesa onse Ãbvɔɔn mbueel mã ba ngel, 34 yɔɔl kwɛn akaal akal pi k'ãmboo m'obvɔɔn. Ke ngwel wɛ, k'awi bɔ nkuul yi ayɛɛn onse mɔ̃ wɛ. Yɔɔl kwɛn bɔ akal ye lweel, onge b'etam Ngel✝. 35 Okɛɛn bɔ adzii k'ayɛɛ ndɔɔ, yɔɔl kwɛn bɔ afuul alam k'ãnzɔ. Ke ngwel wɛ, k'eli ngesɛ wɛ kwɛn ɔ̃kaal ayɛɛn onse Ebvɔɔn.

36 Byɛ etsam wɛn Endɔɔ e Nziã ola byɛ efi? Wuo lɔ eyi kɛn ola byam atu? 37 Okɛɛn mbuul atsam ndiri ndɛ oli wu ayɛɛn ɛ̃kiɛɛn ɛ̃ Nziã, wuo Ɔ̃fel wu Ɔ̃nsensal abiri ndɛ, ebvaan ndɛ ayɛɛ kwɛn m'ekel mɛ̃ ãli m'etam Mfam osa. 38 Kɛn okɛɛn ndɛ k'ayɛɛ obobɔ wɛ, ŋɛn Nziã hɛ̃ k'ayɛɛ ndɛ wɛ.

39 Obobɔ, andoo, ekal ye nzal a k'eyɛɛn ɛ̃kiɛɛn ɛ̃ Nziã, kɛn ebee bakyɛ oluo k'ayɛɛn ɛ̃nywã. 40 Kɛn a yɔɔl kwɛn asa mbueel m'emfa ki ngesɛ bvool m'emfa ki eywɛn ɛ̃tswab.