1 Baal abeyɛɛn ãmboo mbueel ndiri ola byɛ baal bakyɛ ali onse ãndɔɔ m'esio, m'emfa kyɛn onkyam baal bɛn k'ayɛɛ Nziã wɛ k'asa obobɔ wɛ. Ngɔmɔ̃ onse byɛ ndiri abedzuu y'ɔ̃kal a tal. 2 Kɛn a byɛ eluul m'ondɛɛl o nzuru. Ke yam, byɛ kɛn b'ekeekal y'ãwua, tiil k'etswɛɛl byɛ mbuul wu asa ndɔɔ yi obobɔ onse byɛ! 3 Me b'otal mɛ̃, onkyam ŋɛn me nzuru mɛ̃ ke ndi ye byɛ wɛ, m'ɔ̃fel mɛ̃ ndi ye byɛ. Mɛ̃ emeetsiil ndɔɔ a mbuul wu osi obobɔ, olɔ yɛɛn wɛn mɛ̃ eli oŋɔ̃. 4 Ŋ'èbvɔɔn byɛ me nkuũ a Yeso Mãsia, mɛ̃ èkal ye byɛ m'ɔ̃fel, waan e Mfam a bia-byɛ Yeso èkal ye byɛ. 5 Oŋɔ̃ etiɔ mbuul wa m'emfa okyɛ me mviɔɔl ɛ̃ Satana. M'emfa okyɛ, nzuru a ndɛ èbii, kɛn ɔ̃fel a ndɛ àbvuul me tsoo li èya Mfam. 6 Otsɛn b'akal y'ondɛɛl o nzuru k'oli wɛ! Byɛ k'eyɛɛ wɛn lebviil etsi-etsiri esa kwɛn pɔtɔ-pɔtɔ afel wɛ? 7 Embaal lebviil wa tsɔɔn, kwɛn byɛ ekal pɔtɔ-pɔtɔ wa alili, me ndɔɔ yɛn byɛ k'ebekal ye lebviil wɛ. Ke ngwel wɛ, Mãsia wu Onduru o bia-byɛ áwi ndɛ kab. 8 Obobɔ, ebɛɛl pfuun li Onduru, ke ye lebviil wa tsɔɔn wɛ, ke ye lebviil wu obi wuo ãndɔɔ m'ãbi-ãbi wɛ, y'amampa bɛn k'abiin wɛ b'otsɛtsɛ ye b'otaa-taa.

9 Onse ɔ̃nkaan a mɛ̃ ɔ̃kyam, mɛ̃ ekel byɛ wɛn ebee okal y'ondoo ye baal b'awa nzuru m'ãndɔɔ m'esio. 10 Mɛ̃ ke ngyiɛɛn wɛn ebee y'ondoo ye baal b'asa ãndɔɔ omɔ̃ onse ɔ̃kiri wu okal wɛ. Baal obɔ baal a pfuul, ba ye nzal a obɔɔ, b'abebuɛɛn etiɔ. Ke ngwel wɛ, al'okɛɛn obobɔ, byɛ ol'ekeepal onse ɔ̃kiri. 11 Be nkel mɛ̃ byɛ, bɛn byɛ ebee y'ondoo okal ye mbuul ndyam wueel wɛn kwɛn k'ɔ̃nywã ndiri ndoo, kɛn a ndɛ owi nzuru m'ãndɔɔ m'esio, me nzal a obɔɔ, m'obuɛɛn b'etiɔ, m'etoo b'ɛ̃tswɛ, m'obɔɔ o mbal, wuo owi nzuru me pfuul. Ebee onkyam k'edza ye mbuul wu obobɔ. 12 Wu atsiil ãndɔɔ ã baal ke ba Mãsia wɛ mɛ̃? B'atsiil ãndɔɔ ã baal b'Ebvɔɔn ke byɛ wɛ? 13 Baal bɛn ke ba Mãsia wɛ, wu àtsiil ãndɔɔ ã bɔ Nziã. Ke ngwel wɛ, ákel bubu: «Etswɛɛl mbuul wu ɔ̃bi onse byɛ.✝»