1 Mɛ̃ nkoo k'eyɛɛn ɛ̃nywã ɛ̃ baal ye mi ãnzwel. Kɛn okɛɛn mɛ̃ ke ndi ye dzii wɛ, mɛ̃ ŋe ndi kɛn a bvieel li ebel wuo ãnzenza m'ãsa nkyal. 2 Mɛ̃ nkoo k'eliaal ɛ̃kiɛɛn ɛ̃ Nziã, mɛ̃ nkoo k'ekwaal otsɛn o mbueel m'ãli m'edziɔɔn, bvool ndi y'oyɛɛ bam bueel. Mɛ̃ nkoo k'ekal y'okiool b'esa kwɛn ãnkio ãmbal k'ãmboo ã mɔ̃, ãyi k'ãmboo ãnkyam. Okɛɛn mɛ̃ ke ndi ye dzii wɛ, mɛ̃ kɛn a mbuul wa ngwel ndi ndɛ. 3 Mɛ̃ nkoo k'ekab opfel o mɛ̃ ola baal bueel ba ye nzal, mɛ̃ hɛ̃ nkoo k'ewa nzuru a mɛ̃ kwɛn atsoo yɔ mbaa. Kɛn okɛɛn mɛ̃ ke ndi ye dzii wɛ, mɛ̃ oŋɔ̃ ki ebɔɔ pyɛ.

4 Mbuul wu adzii oli y'okuru b'ɔ̃kwal, bvool abewuaal a baal. Ndɛ k'ayoo mbuul ɔ̃kwal nsɔɔ wɛ, ndɛ k'ali ye nzal-a-nsia wɛ, ndɛ k'ali y'ondɛɛl o nzuru wɛ. 5 Mbuul wa ye dzii k'asa ndɔɔ yi opfuru wɛ, ndɛ k'abii kɛn obvɛ o ndyam wɛ, ndɛ k'aya mpuru wɛ, ndɛ k'awal mbuul ɔ̃lyɛn wɛ. 6 Ndɛ k'asia-mpaa me ndɔɔ yi mbi wɛ, ndɛ asia-mpaa me ndɔɔ yi taa-taa. 7 Mbuul wa ye dzii abedzeel mbueel, ndɛ akiool mbueel, ndɛ abeta kaã m'ãndɔɔ mbueel, ndɛ oli y'osɛ-mwiĩ m'ãndɔɔ mbueel.

8 Dzii k'ebefa bam wɛ. Ɛ̃kiɛɛn ɛ̃ Nziã kieel ɛ̃fa mfel, kab li ayɛɛn ɛ̃nywã ɛ̃kyam ekieel efa mfel, li oyɛɛ hɛ̃ ekieel efa mfel. 9 Ke ngwel wɛ, bia-byɛ k'eyɛɛ m'emfa ki ɔ̃koo wɛ, bia-byɛ k'ebeyɔɔ ɛ̃kiɛɛn ɛ̃ Nziã m'emfa ki ɔ̃koo wɛ. 10 Kɛn a ŋ'ekieel ekal mbueel ɔ̃koo, kyɛn k'eli ɔ̃koo wɛ ekieel efa mfel.

11 Ŋ'éli mɛ̃ ndyam kɛn ɔ̃bwee, mɛ̃ ékeyɛɛn onge muaan wu ɔ̃bwee, mɛ̃ éketsam onge muaan wu ɔ̃bwee, mɛ̃ éli y'ãyal mɛn onge mã muaan wu ɔ̃bwee. Ŋe ngyel mɛ̃, mɛ̃ ngyiri mbueel m'ãli mã baan b'abwee. 12 Nonɔ̃, bia-byɛ ebemwɛn onge b'amwɛn ongwel etɛɛl, k'emwɛn ngesɛ wɛ. Kɛn a bia-byɛ ekieel emwɛn nsɔ̃-a-nsɔ̃. Nonɔ̃, mɛ̃ ke ngyɛɛ m'emfa ki ɔ̃koo wɛ, kɛn a mɛ̃ ekieel eyɛɛ m'emfa ki ɔ̃koo onge b'eyɛɛ Nziã mɛ̃. 13 Meba ãndɔɔ anga-ãtyel mã ãli: Okiool, kaã, ye dzii. Kɛn a ndɔɔ yi enduru okuun onse mɔ̃, dzii.