1 M'emfa okyɛ, yɔɔl kwɛn baal awal bee onge asal a Mãsia, bvool b'atal ãndɔɔ ã Nziã mã m'edziɔɔn. 2 M'asɔɔ ola mbuul wu atal ãndɔɔ, bɛn ndɛ akal mbuul wɛn ebvaan ata kaã me ndɛ. 3 Me b'otal mɛ̃, ekal byɛ ekyɛɛl mɛ̃, ekal baal akyɛɛl mɛ̃, obɔ k'otal mɛ̃ wɛ. Mɛ̃ hɛ̃ k'ebekyɛɛl nzuru a myam wɛ. 4 Mɛ̃ ke ndi y'elyal ki ekyɛɛl mɛ̃ nzuru me ndɔɔ a kyɛ wɛ, ke ŋengyɛɛn wɛn mɛ̃ ndi ɔ̃nkinkyam wɛ: Mfam wu akyɛɛl mɛ̃. 5 Obobɔ, ebee ndɔɔ si ngamɔ̃ otsiil ye k'ekoo lio li éwɛɛ Mfam, ye k'eya ndɛ wu akieel apaal ãndɔɔ m'empeel ke mwiĩ. Ndɛ hɛ̃ akieel asuo ãtsam ã baal kal-a-kal. Obobɔ, mbuul bwɛn a mbuul akieel abɔɔ otuɛɛn o ndɛ b'ofa ola Nziã.

6 Andoo a mɛ̃, mɛ̃ nti mboo yi etal Apolos ye myam me ndɔɔ a byɛ. M'emfa okyɛ, byɛ eluɛɛn a kuul e bee m'oyio o ndɔɔ yi: «Ebee ɔ̃ndel wu ãndɔɔ m'ákel onduru». M'emfa okyɛ, mbuul onse byɛ k'akal y'ondɛɛl o nzuru, b'akal ɔ̃nguo ngɔmɔ̃ ye wu abyal wukyɛ wɛ. 7 Ke ngwel wɛ, ki enduru yɛ bakyɛ m'emã? Bvieel bvi eli a yɛ, wu ewi yɛ bvɛ Nziã, k'obobɔ wɛ? Okɛɛn awi yɛ bvɛ m'owa, k'otsɛn omã b'endɛɛl yɛ nzuru, olɔ yɛɛn wɛn k'awi yɛ bvɛ m'owa wɛ?

8 Byɛ emeebɔɔ bvieel bvi edzii byɛ! Byɛ eyii apfel! Byɛ eyii akwɛn, kɛn a bee, bee k'eli bɔ wɛ. Oŋɔ̃ ekal akwɛn bam taa-taa, kwɛn bee ekal m'okwɛn ye byɛ! 9 Ke yam, bee b'antam, Nziã osuul bee baal b'ãmbee, onge baal b'awi etumbu ki epfu. Ngwanyã, bee eli onge baal b'apaal ke taan ke nkwel ɔ̃kiri wueel, ke nkwel ãnzwel, bvool ke nkwel a baal. 10 Bee bam eli anga-laa me ndɔɔ a Mãsia, kɛn a byɛ bam eli anga-ãyal me bvoo a byɛ ye Mãsia. Bee bam eli y'okwal, kɛn a byɛ bam eli ye mpɛn. Byɛ bam eli ye dzuun, kɛn a bee bam, ambaal bee dzuun. 11 Tiil meba ŋã, bee ebemwɛn fool li nzal, li nzuaal, li odzuũ, li ɔ̃dzii ye li omwiĩ b'adzuu pwel-a-pwel. 12 Bee ebebam nzuru m'osal me mviɔɔl ɛ̃ bee-myam. Baal abetoo bee, kɛn a bee ebendɔɔl bɔ kuɔɔl, bɔ abetuaal bee mpal, kɛn a bee ebekuru ɔ̃kwal. 13 Abekwee bee, kɛn a bee ebewɛɛl baal. Tiil meba ŋã, bee eyii onge eluɔ bvi nsyel-nsyel bvi ɔ̃kiri, onge eluɔ bvi abetyal onse yal bvi baal bueel.

14 Mɛ̃ ke nkel ãndɔɔ omɔ̃ me ndɔɔ yi ewa byɛ opfuru wɛ, kɛn a mɛ̃ edzuru byɛ ãtswi onge baan a mɛ̃ ba dzii. 15 Ke ngwel wɛ, onkyam ŋɛn byɛ ebɔɔ ambiri amiil kuun (10.000) onse Mãsia, byɛ k'eli y'atal bibi wɛ: Mɛ̃ wu mburu byɛ onse Yeso Mãsia, ŋ'etee mɛ̃ byɛ Nsia yi Ngesɛ. 16 Obobɔ, mɛ̃ ewa byɛ luo wɛn, enɔɔn kuul e mɛ̃. 17 Obɔ otsɛn be ngyuɔɔl mɛ̃ byɛ Timote. Ndɛ oli muaan a mɛ̃ wa dzii bvool wu okuru nzuru me Nziã, onse Mfam. Ndɛ àyeel byɛ emfa ki edzuu mɛ̃ onse [Yeso*] Mãsia. Omɔ̃ ãndɔɔ m'ebesuo mɛ̃ ãmboo mbueel, onse ãbvɔɔn mbueel.

18 Onge bɛn baal bakyɛ áketsam ndiri mɛ̃ ol'olɔ ke ngyi byɛ otal wɛ, bɔ abvi nzuru ondɛɛl. 19 Kɛn okɛɛn Mfam odzii, mɛ̃ èya byɛ otal alili ŋã. M'emfa okyɛ, mɛ̃ k'èyɛɛ ãyɛɛn ã b'ali y'ondɛɛl o nzuru wɛ, mɛ̃ èyɛɛ ndɔɔ yɛn bɔ akoo m'osa. 20 Ke ngwel wɛ, Okwɛn o Nziã k'oli ndɔɔ a ãyɛɛn wɛ, bɔ eli ndɔɔ yi waan. 21 Ki edzii byɛ emã? Kwɛn mɛ̃ ngya byɛ otal ye sikɔrɔ, wuo mɛ̃ ngya y'ɔ̃kwal wa dzii y'efyɛ?