1 Me b'otal ɔ̃ta wu esa me ndɔɔ a ba ngel, mɛ̃ elieel ãbvɔɔn mã nsie yi Ngalati ãndɔɔ m'asa. Byɛ hɛ̃ èsa onge bɔ. 2 Yɔɔl kwɛn mbuul bwɛn a mbuul onse byɛ, ke nzɔ a ndɛ, bɛɛn tsoo li ɛ̃kwel li eyenge, asuul eluɔ kyɛn ndɛ okoo k'awa me pyɛ, m'emfa ki obɔɔ o ndɛ, kwɛn abee mɛ̃ okiaal m'osa b'ɔ̃ta. 3 Ŋ'ekieel eya mɛ̃ okɔ, mɛ̃ èyuɔɔl baal b'esueel byɛ Yelusalem. Mɛ̃ kieel ewa bɔ ɛ̃nkaan mi ewa bɔ nkuul yi abiri ãkab ã byɛ okɔ. 4 Okɛɛn ebvaan kwɛn myam eyi, bɔ akieel ayi ye mɛ̃.

5 Ŋ'ekieel eyebwel mɛ̃ me li Maseduaan, mɛ̃ èyetal byɛ, ke ngwel wɛ mɛ̃ ekieel ebwel m'ɔlɔ. 6 Owɛɛl mɛ̃ ekieel ekal ola byɛ, owɛɛl hɛ̃ lio e mfyɛ ekoo m'obwel mɛ̃ okɔ, kwɛn byam ewa mɛ̃ bvi ndi a mɛ̃ ye kɔɔ e bvɛ, me ndɔɔ yi enɔɔn mɛ̃ dzwɛ e mɛ̃. 7 Ke ngwel wɛ, mɛ̃ ke nzii kɛn a k'etal byɛ wɛ ŋ'èbwel mɛ̃. Okɛɛn Mfam owi nkuul, mɛ̃ etsam mpii mɛ̃ èyekal etso-tsoo ye byɛ. 8 Kɛn a mɛ̃ ekieel ekal k'Efedze tiil tsoo e Pantekote. 9 Ke ngwel wɛ, mɛ̃ mbɔɔ mpwee yi esa kwɛn mɛ̃ nsa ɔ̃sal wu ɔ̃nɛn, kɛn ataal ali bibi.

10 Okɛɛn Timote otɔ ola byɛ, esa kwɛn ndɛ abee ye buɔ okal, ke ngwel wɛ ndɛ abesa ɔ̃sal a Mfam onge mɛ̃. 11 Obobɔ, yɔɔl kwɛn mbuul si ɔ̃mɔ̃ abee ndɛ ngwel owal! Ewuaal a ndɛ me bvieel bvi eli a ndɛ ye kɔɔ e bvɛ, kwɛn ndɛ anɔɔn dzwɛ e ndɛ onse opi tiil k'eya ndɛ ola mɛ̃. Ke ngwel wɛ mɛ̃ y'andoo ebekiaal ndɛ.

12 Me b'otal ndoo a bia-byɛ Apolos, mɛ̃ bam ngwi ndɛ luo kwɛn ndɛ y'andoo ayetal byɛ, kɛn a ndɛ k'adzii k'aya okɔ meba wɛ. Ŋ'èbɔɔ ndɛ mpwee, ndɛ àya.

13 Ekal angɔ-mwiĩ, esɛn ãnã onse okiool, ekal y'onzɔɔ̃, ekal ye mpɛn! 14 Yɔɔl kwɛn bye esa mbueel ye dzii!

15 Byɛ eyɛɛ wɛn Sitefanas ye nzɔ a ndɛ ali akiool b'ɛ̃kwel b'Akayi, bɔ hɛ̃ asi ɔ̃sal me ndɔɔ ba ngel. M'emfa okyɛ, andoo, mɛ̃ nsɔɔ byɛ bubu osa: 16 Elweel baal b'obobɔ, ye baal b'abesal ye bɔ bvool abemwɛn fool m'ɔ̃sal.

17 Mɛ̃ esia mpal me ndɔɔ yi eli Sitefanas, ye Fɔɔtunatus, ye Akayikos ŋã. Bɔ awel mboo a byɛ ola mɛ̃. 18 Ke ngwel wɛ, bɔ amvieel ɔ̃kwal a mɛ̃ efyɛ, bɔ hɛ̃ amvieel wa byɛ efyɛ. Eyɛɛ k'etuɛɛn baal ba m'emfa okyɛ.

19 Ãbvɔɔn mã nsie yi Adzi ãbio byɛ. Akilas ye Pilisile, bwɛn ebvɔɔn li onse nzɔ a bɔ, bɔ bueel abio byɛ me bvoo a bia-byɛ ye Mfam. 20 Andoo bueel abio byɛ. Ebio bakyɛ m'ɔ̃bio wa ngel.

21 Mɛ̃ wu Pool, mɛ̃ nswɛn byɛ ɔ̃bio wu me kuɔɔl e myam.

22 Okɛɛn mbuul k'adzii Mfam wɛ, yɔɔl kwɛn abwel ndɛ enkɛɛ! Malanata*!

23 Yɔɔl kwɛn Mfam Yeso asio byɛ nyiĩ!

24 Mɛ̃ nzii byɛ bueel onse bvoo a bia-byɛ ye Yeso Mãsia.