1 Andoo, me b'otal mɛ̃, mɛ̃ ke ngyɛɛn ye byɛ onge b'ayɛɛn ye baal b'adzuu m'Ɔ̃fel wɛ. Mɛ̃ ngyɛɛn ye byɛ onge b'ayɛɛn ye baal b'adzuu m'emfa ki ombuul, onge b'ayɛɛn ye baan b'abwee onse Mãsia. 2 Mɛ̃ ngwi byɛ ãbiaal, mɛ̃ ke ngwi byɛ bvi-odza bvi ye mpɛn wɛ. Ke ngwel wɛ, byɛ al'olɔ k'ekoo k'edza bvɛ wɛ. Onkyam meba, byɛ olɔ k'ekoo wɛ. 3 Ke ngwel wɛ, byɛ kɛn ebekal m'emfa ki ombuul. Onge bɛn onse byɛ eli y'ɔ̃kwal-nsɔɔ y'obel, ke ŋɛn byɛ kɛn ebekal m'emfa ki ombuul wɛ? Emfa ki ebedzuu byɛ okyɛ, ke ki ombuul wɛ? 4 Ŋɛn ngɔmɔ̃ onse byɛ ayɛɛn ndiri: «Mɛ̃ wa Pool!» Wukyɛ ndiri: «Mɛ̃ wu Apolos!» Byɛ ke ŋ'esa ãndɔɔ m'emfa ki ombuul wɛ?

5 Apolos nã ali? Pool hɛ̃ nã ndi? Bee ange-buaal mpii kɛn asal a Nziã eli! Me nkuul a bee, byɛ eyii akiool. Ngɔmɔ̃-ngɔmɔ̃ asal m'emfa ki etam Mfam osa. 6 Mɛ̃ wu nkwɛn, Apolos wu oyiri ãdza, kɛn a Nziã wu osi kwɛn ekwɛn ekwel. 7 Obobɔ, wu akwɛn, k'ali y'otsɛn wɛ, wu ayiri ãdza hɛ̃, k'ali y'otsɛn wɛ, wu oli y'otsɛn eli kɛn a Nziã wu asa kwɛn ekwɛn ekwel. 8 Wu akwɛn ye wu ayiri ãdza ali nsiil, kɛn a mbuul bwɛn a mbuul akieel abɔɔ furu m'emfa ki ɔ̃sal a ndɛ. 9 Ke ngwel wɛ, bee eli b'ebesal ye Nziã. Byɛ eli nguun a Nziã, byɛ hɛ̃ eli nzɔ a Nziã. 10 M'emfa ki esio Nziã mɛ̃ nyiĩ a ndɛ, mɛ̃ ndɔ ãnkɔɔn ke nsɛn, onge ɔ̃tuu wu ɔ̃bvɛ. Mbuul ɔ̃kyam atuu ke ywel a mɔ̃. Kɛn a yɔɔl kwɛn mbuul bwɛn a mbuul akal y'onkyab m'emfa ki etuu ndɛ. 11 Ke ngwel wɛ, mbuul ɔ̃kyam k'akoo m'olɔ o nkɔɔn yi nkiin nkyam ke mboo yi amaalɔ tsɔɔn wɛ, nkɔɔn oyɔ eli Yeso Mãsia. 12 Mbuul okoo k'atuu nkal a nkɔɔn oyɔ me ɔɔl, me aadzã, m'ãnkɔɔn m'ɔ̃bvɛn, me nkwii, me nsyel wuo me bviĩ. 13 Ndɔɔ pyɛ! Kɛn ɔ̃sal a mbuul bwɛn a mbuul akieel amɔɔn, bvool baal akieel ayɛɛ ndɛ me tsoo li ekieel etsiil Nziã ãndɔɔ. Me tsoo olɔ, ekieel ekal ye mbaa, yɔ ekieel esuo emfa ki ɔ̃sal a mbuul bwɛn a mbuul. 14 Okɛɛn mbuul otuu nzɔ yɛn k'edzio wɛ, mbuul ondɛ akieel abɔɔ ebva-kab. 15 Kɛn okɛɛn ɔ̃sal a mbuul odzio, ndɛ àywɛn a ebva-kab. Ndɛ àbvuul, kɛn obvuul obɔ òkal olɔ yɛɛn wɛn mbuul wu opal onse mbaa. 16 Byɛ eli Nzɔ a Nziã, bvool Ɔ̃fel wu Ɔ̃nsensal abekal onse byɛ. Byɛ k'eyɛɛ obobɔ wɛ? 17 Mbuul abiil nzɔ a Nziã, Nziã àbiil ndɛ hɛ̃. Ke ngwel wɛ, nzɔ a Nziã eli ɔ̃nsensal: Nzɔ a Nziã oyɔ mpii byɛ.

18 Yɔɔl kwɛn mbuul si ngɔmɔ̃ abee nzuru a ndyam opfuru. Okɛɛn mbuul ngɔmɔ̃ onse byɛ atsam ndiri ndɛ oli y'ãyal m'emfa ki ɔ̃kiri wu, yɔɔl kwɛn ndɛ akal ye laa m'okal y'ãyal! 19 Ke ngwel wɛ, ãyal m'ɔ̃kiri wu ãli laa ke nkwel a Nziã. Obɔ otsɛn bɛn ákel onse Ɔ̃nkaan a Nziã ndiri: «Nziã abebɔɔ anga-ãyal me pfuru e bam.✝» 20 Bvool ákel ndiri: «Mfam oyɛɛ ãtsam m'ãnga-ãyal, ndɛ oyɛɛ kwɛn mɔ̃ otsɛn pyɛ.✝» 21 Yɔɔl kwɛn mbuul abee ntwel obɛɛl me ndɔɔ a angaburu-baal, ke ngwel wɛ bvieel eli bvi byɛ. 22 Ekal Pool, ekal Apolos, ekal Sefas, ekal ɔ̃kiri, ekal elaã, ekal epfu, ekal lio li meba, ekal lio li èya: Bvieel eli bvi byɛ. 23 Kɛn a byɛ, byɛ eli ba Mãsia, Mãsia oli wa Nziã.