1 Andoo, me ndɔɔ yi etal ãkab m'Ɔ̃fel wu Ɔ̃nsensal, mɛ̃ k'edzii kwɛn byɛ ekal onse odzɛɛn wɛ. 2 Byɛ eyɛɛ wɛn ŋ'éli byɛ tsɔɔn Nziã oyɛɛ wɛ, byɛ ekeyɔɔl kwɛn ábiri byɛ ol'anziã ba mfya bɛn k'ayɛɛn wɛ. 3 Obɔ otsɛn bɛn mɛ̃ eyɛɛn byɛ bam wɛn, mbuul wu adzuu m'Ɔ̃fel a Nziã k'akoo k'ayɛɛn wɛ ndiri: «Yɔɔl kwɛn abwel Yeso enkɛɛ!» Okɛɛn hɛ̃ mbuul k'adzuu m'Ɔ̃fel wu Ɔ̃nsensal wɛ, ndɛ k'akoo m'oyɛɛn wɛ ndiri: «Yeso oli Mfam.»

4 Ãkab ã nyiĩ a Nziã ãli bibi, kɛn Ɔ̃fel oli ndɛ wuwu. 5 Ɛ̃sal ɛ̃li m'emfa-m'emfa, kɛn Mfam oli ndɛ wuwu. 6 Emfa bvi asa ɔ̃sal a Mfam eli bibi, kɛn a Nziã oli ndɛ wuwu, ndɛ oli wu abesa ndɔɔ yueel onse baal bueel. 7 Ŋ'esa oŋɔ̃, me kab li eyɔɔ mbuul bwɛn a mbuul, Ɔ̃fel abesal onse ndɛ me ndɔɔ obvɛ o baal bueel. 8 Ke ngwel wɛ, ola mbuul ngɔmɔ̃, Ɔ̃fel owi kab li ayɛɛn y'ɔ̃nyiã. Ola mbuul wumɔ̃, Ɔ̃fel wuwu owi kab li ayɛɛn y'oyɛɛ. 9 Ɔ̃fel wuwu hɛ̃ owi ola mbuul ɔ̃kyam kab li okiool, ola mbuul wukyɛ, Ɔ̃fel wuwu owi kab li aboo anga-ãluu. 10 Ola mbuul wukyɛ, Ɔ̃fel owi mpɛn yi asa emvieel, ola wumɔ̃ ndɛ owi kab li aliaal ɛ̃kiɛɛn ɛ̃ Nziã, ola wukyɛ bvool, ndɛ owi kab li ayɛɛn ãndɔɔ m'ãfa ol'Ɔ̃fel wu Ɔ̃nsensal, ye mɛn k'ãfa ola ndɛ wɛ. Ola wukyɛ, ndɛ owi kab li ayɛɛn m'ɛ̃nywã ɛ̃kyam, ola mbuul bvool wukyɛ, ndɛ owi kab li akaal ɛ̃nywã omyɛ̃. 11 Kɛn Ɔ̃fel oli ndɛ ngɔmɔ̃ bvool oli ndɛ wuwu. Ndɛ wu asa ãndɔɔ omɔ̃, wu akab mbuul bwɛn a mbuul m'emfa ki ewɛɛ ndɛ.

12 Emfa ngemɔ̃ kyɛn nzuru eli ngamɔ̃, kɛn a yɔ eli m'elyam bibi, bvool onkyam ŋɛn bvɛ eli bibi, bvɛ bvieel ebuo kɛn a nzuru ngamɔ̃. Eli emfa kiki me ndɔɔ a Mãsia. 13 Ke ngwel wɛ, ekal Ayuda, ekal bɛn k'Ayuda wɛ, ekal ankyal, ekal bɛn k'ankyal wɛ, bia-byɛ bueel éwel opongo b'Ɔ̃fel ngɔmɔ̃ me ndɔɔ yi ebuo nzuru ngamɔ̃. Bia-byɛ bueel hɛ̃ énywi ãdza m'Ɔ̃fel wuwu.

14 Obobɔ, nzuru k'eli kɛn a m'elyam ngemɔ̃ wɛ, yɔ eli m'elyam bibi. 15 Okɛɛn kuul ebvi oliaal ndiri: «Mɛ̃ ke ndi kuɔɔl wɛ, ŋɛn mɛ̃ ke ndi elyam e nzuru wɛ», kyɛ olɔ ekwɛɛn k'ekal elyam e nzuru me ndɔɔ yi elieel kyɛ obobɔ? 16 Okɛɛn hɛ̃ tswi ebvi oliaal ndiri: «Mɛ̃ ke ndi dziil wɛ, ŋɛn mɛ̃ ke ndi elyam e nzuru wɛ», lɔ olɔ ekwɛɛn k'ekal elyam e nzuru me ndɔɔ yi elieel lɔ obobɔ? 17 K'okɛɛn nzuru yueel eli kɛn a dziil etu, yɔ bwɛn a bwɛn ekeeyoo? Okɛɛn yɔ eli kɛn a tswi etu, yɔ nswel bwɛn ekeeyɔɔ? 18 Ke yam, Nziã osuul elyam bwɛn elyam me nzuru, m'emfa ki edzii ndɛ. 19 Okɛɛn elyam e nzuru bvieel eli kɛn a elyam ngemɔ̃, nzuru kwɛn ekeekal? 20 Obobɔ, elyam eli bibi, kɛn a nzuru eli ngamɔ̃.

21 Ŋɛn dziil k'ekoo m'oliaal kuɔɔl wɛ ndiri: «Mɛ̃ ke ndi ye kɔɔ e yɛ wɛ!» Ɔ̃tswɛ hɛ̃ k'akoo m'oliaal ɛ̃mpal wɛ ndiri: «Mɛ̃ ke ndi ye kɔɔ e byɛ wɛ!» 22 Ŋ'esa oŋɔ̃, elyam e nzuru bvi eli onge bvɛn otsɛn pyɛ, eli y'otsɛn bibi. 23 Bvi emeewal bia-byɛ onge bvɛn dzuun pyɛ me nzuru, bia-byɛ ebewa bvɛ dzuun bibi. Obobɔ, elyam bvɛn k'ebvaan amwɛn wɛ, bia-byɛ ebefaal bvɛ bam nzyal-nzyal. 24 Elyam e nzuru bvɛn akoo m'omwɛn, k'eli ye kɔɔ kwɛn afaal bvɛ wɛ. Kɛn a Nziã ási nzuru me ndɔɔ yi awa elyam bvɛn k'eli y'otsɛn wɛ dzuun bibi. 25 M'emfa okyɛ, nzuru k'eli y'okab wɛ, kɛn elyam bvieel ebewuaal a bvikyɛ. 26 Okɛɛn elyam e nzuru ngemɔ̃ eluu, bvi esiil eluu ye kyɛ, okɛɛn awi elyam e nzuru ngemɔ̃ dzuun, bvi esiil esia mpaa ye kyɛ.

27 Byɛ bam eli nzuru a Mãsia, bvool mbuul bwɛn a mbuul onse byɛ oli elyam e nzuru oyɔ. 28 M'emfa okyɛ, onse Ebvɔɔn, ŋ'ɛ̃kwel, Nziã osuul antam, li mbuaal, ndɛ osuul aliaal-ɛ̃kiɛɛn, li atyel, ndɛ osuul ayiool. Ke mbee oŋɔ̃, ndɛ hɛ̃ osuul ba y'ãkab m'asa emvieel, m'aboo anga-ãluu, m'awuaal a bakyɛ, m'abiri baal, ye m'ayɛɛn ɛ̃nywã ɛ̃kyam. 29 Bɔ bueel antam ali? Bɔ bueel aliaal-ɛ̃kiɛɛn a Nziã ali? Bɔ bueel ayiool ali? Bɔ bueel asa b'emvieel ali? 30 Bɔ bueel aboo b'anga-ãluu ali? Bɔ bueel b'abeyɛɛn ɛ̃nywã ɛ̃kyam ali? Bɔ bueel b'abekaal ɛ̃nywã omyɛ̃ ali? 31 Ekal y'efua ki ekal y'ãkab m'ãnduru ɔ̃bvɛn. M'emfa okyɛ, mɛ̃ esuo byɛ nkuul yi enduru opal.