1 Andoo, mɛ̃ ŋ'eyeel byɛ Nsia yi Ngesɛ yi étee mɛ̃ byɛ. Nsia yi éyɔɔ byɛ, bvool ékuru nzuru me yɔ. 2 Byɛ ebvuul me yɔ, okɛɛn byɛ ekwɛɛ yɔ onge b'etee mɛ̃ byɛ yɔ. Okɛɛn k'obobɔ wɛ, okiool o byɛ otsɛn pyɛ. 3 Mɛ̃ éyiool byɛ ŋ'ɛ̃kwel ãndɔɔ m'éyɔɔ myam wɛn: Mãsia okwi me ndɔɔ ãbi ã bia-byɛ, onge b'ákel onse Ɔ̃nkaan a Nziã. 4 Adziool ndɛ, ndɛ osiool me tsoo li ãtyel, onge b'ákel onse Ɔ̃nkaan a Nziã. 5 Ndɛ opal ola Sefas, bvool opal ol'antam kuun ye buaal. 6 Ke mbee oŋɔ̃, ndɛ opal ol'andoo ɛ̃nkam ɛ̃taan (500) y'esiɔ ekuu emɔ̃. Bibi onse bɔ ali kɛn mwiĩ, bakyɛ ámaakwa. 7 Ke mbee oŋɔ̃, ndɛ opal ola Dzak, bvool opal ol'antam bueel.

8 Ke mbee a bɔ bueel, ndɛ opal ola mɛ̃, mɛ̃ wɛn onge muaan wɛn nswii k'ékoo wɛ. 9 Ngwanyã, mɛ̃ wu mvool mbee onse antam. Ke yam, mɛ̃ ke mvaan kwɛn ata mɛ̃ me ntam wɛ, ke ngwel wɛ mɛ̃ étueel Ebvɔɔn e Nziã mpal. 10 Kɛn a me nyiĩ a Nziã, mɛ̃ ndi m'emfa ki ndi mɛ̃ nonɔ̃, bvool nyiĩ a ndɛ ola mɛ̃ k'eli yi ngwel wɛ. Kɛn a mɛ̃ nsi ɔ̃sal wu onduru wa bɔ bueel. Ke yam, k'eli mɛ̃ wɛ, eli nyiĩ a Nziã yi eli ye mɛ̃. 11 Obobɔ, ekal mɛ̃, ekal bɔ, oyɔ Nsia yi Ngesɛ yi ebetee bee bueel, bvool yi ekiool byɛ.

12 K'okɛɛn abetee ndiri Mãsia osiool onse b'ákwi-ákwi, emfa emã kyɛn bakyɛ onse byɛ abeyɛɛn ndiri b'ákwi-ákwi k'asiool wɛ? 13 Okɛɛn b'ákwi-ákwi k'asiool wɛ, ŋɛn Mãsia k'asiool hɛ̃ wɛ. 14 Bvool okɛɛn Mãsia k'asiool wɛ, ŋɛn ãtee ã bee ãli mã ngwel, okiool o byɛ hɛ̃ oli bo ngwel. 15 Okɛɛn taa-taa b'ákwi-ákwi k'asiool wɛ, ŋɛn Nziã k'áseel Mãsia onse b'ákwi-ákwi wɛ. M'emfa okyɛ, bee ŋ'eli atsweel ba mfya, ke ngwel wɛ bee etsweel ke nkwel a Nziã wɛn ndɛ oseel Mãsia onse b'ákwi-ákwi. 16 Ke ngwel wɛ, okɛɛn b'ákwi-ákwi k'asiool wɛ, Mãsia hɛ̃ ŋɛn k'asiool wɛ. 17 Okɛɛn Mãsia k'asiool wɛ, okiool o byɛ oli bo ngwel, bvool byɛ eli kɛn onse ãbi ã byɛ. 18 Ŋɛn hɛ̃ b'ákwi onse okiool me Mãsia ayɛn nkel. 19 Okɛɛn kaã li eti bia-byɛ me Mãsia li ekal bia-byɛ kɛn a m'omwiĩ ba, bia-byɛ ŋ'eli baal b'anduru baal bueel me fool.

20 Kɛn a Mãsia osiool bam taa-taa onse b'ákwi-ákwi. Ndɛ oli mbuul wu ɛ̃kwel wu osiool onse b'ákwi-ákwi. 21 Ke ngwel wɛ, onge bɛn epfu eyi me mbuul ngɔmɔ̃, emfa kiki hɛ̃ osiool onse b'ákwi-ákwi oyi me mbuul ngɔmɔ̃. 22 Ke ngwel wɛ, emfa ngemɔ̃ kyɛn baal bueel akwa me ndɔɔ yɛn bɔ ali me bvoo y'Ãdam, emfa kiki hɛ̃ baal bueel akieel asiool, me ndɔɔ yɛn bɔ ali me bvoo ye Mãsia, 23 kɛn a mbuul bwɛn a mbuul m'ɔ̃nkaal a ndɛ: Mãsia mbuul wu ɛ̃kwel wu osiool onse b'ákwi-ákwi, ke mbee oŋɔ̃ ba Mãsia akieel asiool ŋ'èya ndɛ. 24 Ke mbee oŋɔ̃, bu eyii ntɔ yɛn Mãsia akieel abiil mpɛn yueel, ye waan lueel y'okwɛn bueel. Obobɔ, ndɛ àbveel okwɛn ola Nziã wu Taal. 25 Ke ngwel wɛ, ebvaan ndɛ akal y'okwɛn, tiil k'elɔ ndɛ ataal bueel ke nsɛn a ntaã e ndɛ✝. 26 Ɔ̃taal wu ambee wu akieel abiil, eli epfu. 27 Ngwanyã, «ndɛ olɔ mbueel ke nsɛn a ntaã e ndɛ✝.» Kɛn a ŋ'eyɛɛn ndɛ ndiri áwi ndɛ okwɛn nkal a mbueel, eli kal-a-kal kwɛn ŋ'ambaal wu áwi ndɛ okwɛn nkal a mbueel. 28 Ŋ'akieel awa ndɛ okwɛn nkal a mbueel, Muaan ndyam akieel akal ke nsɛn a wu owi ndɛ okwɛn nkal a mbueel, kwɛn Nziã akal y'okwɛn b'ɔ̃koo nkal a mbueel.

29 K'okɛɛn b'ákwi-ákwi k'asiool wɛ, b'abewal opongo me ndɔɔ a b'ákwi-ákwi asa emã? Okɛɛn b'áki-ákwi k'asiool wɛ, ke m'emã bɔ abewal opongo me ndɔɔ a bɔ? 30 Ke bee, otsɛn omã b'abebii bee obam ãlio mbueel? 31 Andoo, tsoo bwɛn a tsoo, mɛ̃ ebewa nkii a mɛ̃, mɛ̃ eyɛɛn byɛ otaa-taa ke ngwel wɛ mɛ̃ ebebɛɛl ntwel me byɛ onse bvoo ye Yeso Mãsia, wu Mfam a bia-byɛ. 32 K'Efedze, mɛ̃ nzwaan ye baal bɛn onge anyam a mpuru. K'okɛɛn mvel oyɔ kɛn a me ndɔɔ ãndɔɔ m'ãtal ombuul, oŋɔ̃ bvel emã li mbɔɔ mɛ̃? Okɛɛn b'ákwi-ákwi k'asiool wɛ, oŋɔ̃ «bia-byɛ edza bvool enywã, ke ngwel wɛ ɔ̃suu bia-byɛ èkwa», onge b'ebeyɛɛn baal.

33 Ekal y'onkyab! Ke ngwel wɛ, «andoo b'abi-abi abebiil epfuũ bvi ngesɛ». 34 Ebveel ãtsam ã byɛ mã ngesɛ, bvool ebee obi osa! Ke ngwel wɛ, baal bakyɛ onse byɛ k'ayɛɛ Nziã wɛ. Mɛ̃ ngyɛɛn obobɔ, kwɛn byɛ eyoo opfuru.

35 Kɛn a baal bakyɛ akoo k'afuul bubu: «B'ákwi-ákwi bwɛn-a-bwɛn asiool? Nzuru yi esiool bɔ ye yɔ, yi bwɛn-a-bwɛn?» 36 Yɛ mbuul wu oywɛn ãyal li! Ŋ'ekwɛn yɛ esia, ŋ'ɛ̃kwel kɛn lɔ ekwa ye k'ekɔɔl lɔ ɔ̃ti. 37 Ki ebekwɛn yɛ eli esia etu, ekoo k'ekal li bele, ekoo k'ekal esia ekyam, k'ɔ̃ti ndyam wu àyemɛn wɛ. 38 Ke mbee oŋɔ̃, Nziã awa esia olɔ nzuru, onge b'edzii ndɛ. Ndɛ abewa esia bwɛn esia nzuru yi ebvaan me lɔ. 39 Nzuru yueel k'efɛɛn a yinkyɛ wɛ: Nzuru yɛn yi baal, yɛn yi anyam, yɛn yi anywɛn, yɛn hɛ̃ yi answi. 40 Eli hɛ̃ y'ãnzuru mã ywel, ye mã nsie. Ongal b'ãnzuru mã ywel okam y'ongal b'ãnzuru mã nsie. 41 Tal eli y'ongal o lɔ, nswii y'ongal o ndɛ, angam-a-ngam y'ongal o bɔ. Onkyam ngam-a-ngam k'angal emfa ngemɔ̃ ye wukyɛ wɛ. 42 Eli emfa kiki me b'otal osiool o b'ákwi-ákwi: Adziool nzuru m'emfa ki ebwal, yɔ esiool m'emfa kyɛn k'ebwal wɛ. 43 Adziool yɔ onse opfuru, yɔ esiool ye lweel. Adziool yɔ onse okwal, yɔ esiool ye mpɛn yam. 44 Ŋ'adziool yɔ, yɔ eli nzuru yi ombuul. Ŋ'esiool yɔ, yɔ eli nzuru yi ɔ̃fel. Eli ye nzuru y'ombuul, eli hɛ̃ ye nzuru y'ɔ̃fel. 45 Obɔ otsɛn bɛn ákel bubu: «Ãdam wu mbuul wu ɛ̃kwel, oyii mbuul wa mwiĩ, y'omwiĩ b'ombuul✝.» Ãdam wu ãmbee oyii Ɔ̃fel wu awa elaã. 46 Ki eya ɛ̃kwel, eli ki ombuul, ke ki ɔ̃fel wɛ. Ki ɔ̃fel eya ãmbee. 47 Mbuul wu ɛ̃kwel wu ábuo m'ɔ̃fel a nsie oli mbuul wa nsie. Mbuul wa buaal ofi ywel. 48 Baal a nsie ali onge wu ébuo Nziã me nsie. Kɛn a baal ba ywel ali onge wu ofi ywel. 49 Emfa ngemɔ̃ ki eli bia-byɛ y'emfa e mbuul wu ási m'ɔ̃fel a nsie, emfa kiki hɛ̃ bia-byɛ ekieel ekal y'emfa e mbuul wa ywel.

50 Andoo, etal be nzii mɛ̃ oliaal: Eluɔ kieel ki eli ye tuo y'ãkel k'ekoo k'ewal ɔ̃swal wu Okwɛn o Nziã wɛ. Eluɔ ki ebwal k'ekoo k'ekal y'elaã lɛn ntɔ pyɛ. 51 Mɛ̃ ŋ'eyɛɛn byɛ ndɔɔ ngamɔ̃ yi m'edziɔɔn: Bia-byɛ bueel kieel k'akwa wɛ, kɛn a bia-byɛ bueel ekieel eswɛɛl emfa, 52 me lio etsi-tsiri, bam tswa-a-tswa, ŋ'ekieel ebel mvel-a-mvel wu ãmbee. Ngwanyã, mvel-a-mvel akieel abel, bvool b'ákwi-ákwi akieel asiool ye nzuru yɛn kieel k'ebekwa bvool wɛ, bvool bia-byɛ bam ekieel eswɛɛl emfa. 53 Ke ngwel wɛ, ebvaan kwɛn ki ebwal elaal nzuru yɛn k'ebwal wɛ, ki ekwa hɛ̃ elaal nzuru yɛn k'ekwa wɛ. 54 Ŋ'ekieel elaal ki ebwal nzuru yɛn k'ebwal wɛ, bvool ki ekwa elaal elaã lɛn ntɔ pyɛ, oŋɔ̃ kieel ŋ'asi m'ákel ndiri: «Abvel epfu mpɛn m'emfa ki ɔ̃koo.»

55 «Ee epfu, obvel o yɛ a bɔ?

Ee epfu, waan e yɛ a lɔ?✝»

56 Mpɛn a epfu eli obi, waan li obi eli Ngel. 57 Kɛn a yɔɔl kwɛn bia-byɛ elweel Nziã, ndɛ owi bia-byɛ obvel me Mfam a bia-byɛ Yeso Mãsia!

58 M'emfa okyɛ, andoo, esɛn ãnã bvool ebee otsiɔ̃! Eyi nkwel kɛn oyi onse ɔ̃sal a Mfam. Eyɛɛ wɛn ɔ̃sal a byɛ me ndɔɔ a ndɛ k'àkal wa ngwel wɛ.