1 Enɔɔn nkuul e mɛ̃, onge b'ebenɔɔn mɛ̃ nkuul e Mãsia.

2 Mɛ̃ etuɛɛn byɛ me ndɔɔ yi ebetsam byɛ mɛ̃ m'ãndɔɔ mbueel, byɛ hɛ̃ ebesa mbueel m'emfa ki ntam mɛ̃ byɛ osa. 3 Kɛn a mɛ̃ nzii kwɛn byɛ eyɛɛ bubu: Mãsia oli Mfam a bɔɔl lueel. Ɔ̃lam oli mfam a ɔ̃kal a ndɛ. Nziã oli Mfam a Mãsia. 4 Bɔɔl lueel li ebuɛɛn wuo li eyɛɛn ɛ̃kiɛɛn ɛ̃ Nziã ɔ̃tswɛ m'ofoo, awa Mfam a ndɛ opfuru. 5 Kɛn ɔ̃kaal wueel wu abuɛɛn wuo wu ayɛɛn ɛ̃kiɛɛn ɛ̃ Nziã ɔ̃tswɛ kal, awa ɔ̃lam a ndɛ opfuru. Ndɛ oli onge ɔ̃kaal wu akie ɔ̃tswɛ. 6 Okɛɛn ɔ̃kaal k'afoo ɔ̃tswɛ wɛ, yɔɔl kwɛn ndɛ atsɔɔ mfu hɛ̃! Okɛɛn eli ndɔɔ yi opfuru me ndɔɔ ɔ̃kaal k'atsɔɔ wuo k'akie mfu, yɔɔl kwɛn ndɛ afoo ɔ̃tswɛ. 7 Bɔɔl k'ebvaan afoo ɔ̃tswɛ wɛ, ke ngwel wɛ ndɛ oli emfa bvool oli lweel e Nziã, kɛn ɔ̃kaal oli lweel li ɔ̃lam. 8 Ke ngwel wɛ, Nziã k'ási bɔɔl m'ɔ̃kaal wɛ, ndɛ ási ɔ̃kaal me bɔɔl. 9 Nziã k'ási bɔɔl me ndɔɔ ɔ̃kaal wɛ, ndɛ ási ɔ̃kaal me ndɔɔ a bɔɔl. 10 Obɔ otsɛn bɛn, me ndɔɔ ãnzwel, ɔ̃kaal ebvaan afoo ɔ̃tswɛ. Okyɛ eliĩ ki esuo omfam b'eli ndɛ ke nsɛn a bɔ. 11 Ke yam, ke nkwel a Mfam, ɔ̃kaal k'akoo m'okal wɛ, okɛɛn bɔɔl pyɛ, bɔɔl hɛ̃ k'akoo m'okal wɛ, okɛɛn ɔ̃kaal pyɛ. 12 Ke ngwel wɛ, emfa ngemɔ̃ kyɛn Nziã ábuo ɔ̃kaal me bɔɔl, emfa kiki hɛ̃, wu abeburu bɔɔl eli ɔ̃kaal. Kɛn a bɔ bueel afi ola Nziã.

13 Byam oŋɔ̃ ebwɛɛl m'eyɛɛn mɛ̃ ngesɛ: Eli ngesɛ kwɛn ɔ̃kaal abuɛɛn Nziã ɔ̃tswɛ kal? 14 K'ɔ̃kiri ndyam k'asuo byɛ kwɛn eli ndɔɔ yi opfuru me bɔɔl k'akal ye mfu yi nda wɛ? 15 Kɛn me ndɔɔ ɔ̃kaal, eli ndɔɔ yi dzuun kwɛn ndɛ akal ye mfu yi nda. Ke ngwel wɛ, áwi ɔ̃kaal mfu yi nda kwɛn yɔ ekal onge etambal ki ela. 16 Okɛɛn mbuul odzii k'ata enkyam me ndɔɔ oyɔ, ebvaan ndɛ ayɛɛ kwɛn bee k'eli y'epfuũ okyɛ wɛ, ãbvɔɔn ã Nziã hɛ̃ k'ãli ye kyɛ wɛ.

17 Me b'otal ãndɔɔ me nzii k'eyɛɛn mɛ̃ bvool, mɛ̃ k'etuɛɛn byɛ wɛ, nzal-a-ŋɛn byɛ ŋ'ebebvɔɔn byɛ, obvɔɔn o byɛ k'obebiri byɛ ke ndɔɔ yi enduru obvie wɛ, bɔ obebiri byɛ kɛn a ke ndɔɔ yi enduru obii. 18 Ŋ'ɛ̃kwel, mɛ̃ ngyoo ndiri, ŋ'ebebvɔɔn byɛ onse Ebvɔɔn, okab obekal onse byɛ. Mɛ̃ nkiool ndɔɔ oyɔ etsi-tsiri. 19 Ke yam, ebvaan kwɛn okab okal onse byɛ. M'emfa okyɛ, akiool b'asɛn ãnã onse ɔ̃mbio ondɛ amɔɔn. 20 Oŋɔ̃ ŋɛn, obvɔɔn b'ebebvɔɔn byɛ, k'oli me ndɔɔ yi edza ɔ̃laan a Mfam wɛ. 21 Ke ngwel wɛ, me lio li edza byɛ, mbuul bwɛn a mbuul abedzuul k'adza bvi-odza e ndyam. M'emfa okyɛ, bakyɛ akɛɛn me nzal, kwɛn ŋɛn bakyɛ mbal ãbɔɔ. 22 Byɛ k'eli y'ãnzɔ kwɛn byɛ eyedza wuo eyenywã wɛ? Wuo, byɛ ebesa obobɔ me ndɔɔ yi epfiɔɔl Ebvɔɔn e Nziã, bvool ewa bɛn eluɔ pyɛ opfuru? Mɛ̃ byɛ omã eyɛɛn? Ntuɛɛn byɛ? Me ndɔɔ yi, mɛ̃ k'etuɛɛn byɛ wɛ.

23 Ke ngwel wɛ, etal m'ébɔɔ mɛ̃ ola Mfam, bu nkaal byɛ mɔ̃: Mfam Yeso, me tsia wu átiɔ ndɛ, áwel mampa. 24 Ke mbee a ŋ'ebveel ndɛ Nziã ãtuɛɛn, otsiil mampa ondɛ, bu alieel bubu: «Yi bu eli nzuru a mɛ̃, yɔ eli yi byɛ. Ebesa obobɔ me ndɔɔ yi etsam mɛ̃.» 25 Ke mbee odza, Mfam owel bvool mbiɔ a mbal ã bvine, bu alieel ndiri: «Mbiɔ yi eli ondoo b'alili b'atɛn m'ãkel ã mɛ̃. Esa obobɔ, me ndɔɔ yi etsam mɛ̃, lio lueeel li enywã mɔ̃.» 26 Ke ngwel wɛ, lio lueel li èdza byɛ mampa wu bvool ènywã mbiɔ yi, byɛ ŋ'ebetsal nsia epfu e Mfam, tiil ye k'èya ndɛ.

27 Obɔ otsɛn bɛn wu adza mampa wuo anywã mbiɔ a Mfam m'emfa kyɛn k'ebvaan wɛ, ndɛ abɔɔ etsob me ndɔɔ a nzuru y'ãkel ã Mfam. 28 Yɔɔl kwɛn mbuul bwɛn a mbuul ametsam ngesɛ emfa ki ekal ndɛ, ŋ'ɛ̃kwel ye k'edza ndɛ mampa bvool anywã mbiɔ oyɔ. 29 Ke ngwel wɛ, wu adza mampa bvool anywã mbiɔ oyɔ, kwɛn ŋɛn ndɛ k'ayɛɛ otsɛn o nzuru a Mfam wɛ, ŋ'awi nzuru a ndyam etumbu. 30 Obɔ otsɛn bɛn eli ye baal ba y'ãluu ye ba y'elyam bibi onse byɛ, baal bibi hɛ̃ akwi. 31 Okɛɛn bia-byɛ etal epfuũ e bia-byam ngesɛ, Nziã k'awa bia-byɛ etumbu wɛ. 32 Ke yam, Mfam abeyiaan bia-byɛ me ndɔɔ yi abveel bia-byɛ me nkuul. Kwɛn bia-byɛ ebee etumbu obɔɔ mboo mɔ̃ y'ɔ̃kiri. 33 Obobɔ, andoo, ŋ'ebvɔɔn byɛ me ndɔɔ yi edza ɔ̃laan a Mfam, ekiaal bakyɛ. 34 Okɛɛn mbuul oli ye nzal, yɔɔl kwɛn ndɛ adza ke nzɔ. M'emfa okyɛ, ŋ'ebvɔɔn byɛ, Nziã k'awa byɛ etumbu wɛ. Me b'otal ãndɔɔ m'ãsiil, mɛ̃ èsoo mɔ̃, ŋ'ekieel eya mɛ̃.