1 Mɛ̃ wu Pool, mɛ̃ ndi ntam a Yeso Mãsia m'emfa ki edzii Nziã, me ndɔɔ yi etsal nsia a elaã li élieel Nziã ndiri awa baal onse Yeso Mãsia. 2 Mɛ̃ ngyuɔɔl ɔ̃nkaan wu ola yɛ wu Timote, muaan a mɛ̃ wu ɔ̃tio. Yɔɔl kwɛn Nziã wu Taal ye Mfam a bia-byɛ Yeso Mãsia asio yɛ nyiĩ, asa yɛ obvɛ bvool awa yɛ opi!

3 Mɛ̃ ebveel Nziã ãtuɛɛn wu ebesal mɛ̃ me ndɔɔ a ndɛ ɔ̃kwal tsɛtsɛ onge b'ési ankiɔɔn a mɛ̃, ke ngwel wɛ, tsia mwiĩ, mɛ̃ ebelɔ yɛ kɛn olɔ onse ãbuɛɛn ã mɛ̃. 4 Ŋ'ebeyeel mɛ̃ elel e yɛ, mɛ̃ ndi bam ye nzal a k'emwɛn yɛ, kwɛn mɛ̃ nduul m'esɛ. 5 Mɛ̃ ebesɛɛn okiool o yɛ bo taa-taa. Okiool obɔ b'óli tsɔɔn ye nkiɔɔn a yɛ wu ɔ̃kaal Loyise ye ngoo a yɛ Ehunis. Mɛ̃ nkiool bam wɛn bɔ hɛ̃ oli onse yɛ.

6 Obɔ otsɛn bɛn mɛ̃ ewa yɛ luo wɛn sa kwɛn kab e Nziã li onse yɛ esiool bvool ekaan onge mbaa yi afel. Kab olɔ li éyɔɔ yɛ ŋ'éndɔɔl mɛ̃ yɛ mviɔɔl. 7 Ke ngwel wɛ, Ɔ̃fel wu ewi Nziã bia-byɛ k'ali wa buɔ wɛ, ndɛ oli Ɔ̃fel wu aluul bia-byɛ me mpɛn, me dzii bvool m'okal onse onkyab. 8 Bee y'opfuru okal b'atsweel wɛn Yeso oli Mfam, bvool bee hɛ̃ y'opfuru okal me mɛ̃ wu ndi mbuul a bwal me ndɔɔ a ndɛ. Kɛn a mwɛn fool ye mɛ̃ me ndɔɔ a Nsia yi Ngesɛ me waan e Nziã. 9 Ndɛ wu ábvuul bia-byɛ bvool áti bia-byɛ mbel yi ngel. Ndɛ k'ási obobɔ me ndɔɔ ɛ̃sal ɛ̃ bia-byɛ wɛ, me ndɔɔ a m'éwɛɛ ndyam bvool me ndɔɔ a nyiĩ yi ésio ndɛ bia-byɛ onse Yeso Mãsio, ŋ'ɛ̃kwel ye k'ebɛɛn ɔ̃kiri. 10 Meba, ndɛ osuo nyiĩ oyɔ ŋ'eyi Ɔ̃mvuul a bia-byɛ Yeso Mãsia. Ndɛ wu osi kwɛn mpɛn a epfu efa, bvool me Nsia yi Ngesɛ, osi kwɛn baal ayɛɛ elaã lɛn ntɔ pyɛ. 11 Nziã osueel mɛ̃ ndyam me ndɔɔ yi etsal Nsia yi Ngesɛ oyɔ onge ntam bvool onge ɔ̃yiool. 12 Obɔ otsɛn b'ebemwɛn mɛ̃ ãmpal mã. Kɛn a mɛ̃ k'eyoo opfuru me mɔ̃ wɛ, ke ngwel wɛ mɛ̃ ngyɛɛ wu ndɔ mɛ̃ okiool onse ndɛ. Mɛ̃ hɛ̃ nkiool bam wɛn ndɛ oli ye waan li akwɛɛ m'éwi ndɛ mɛ̃ tiil tsoo olɔ. 13 Ãyɛɛn mã taa-taa m'eyɔɔ yɛ ola mɛ̃, dzuu m'emfa ki etam mɔ̃, m'okiool ye dzii onse bvoo a bia-byɛ ye Yeso Mãsia. 14 Opfel b'awi yɛ obɔ, kwɛɛ bɔ me mpɛn a Ɔ̃fel wu Ɔ̃nsensal wu oli onse yɛ. 15 Yɛ yɛɛ ngesɛ wɛn, baal bueel ba nsie yi Adzi ayiri mɛ̃. Onse baal obɔ, mɛ̃ nkoo m'otsiɔ Fidzel ye Hɛɛmodzɛn. 16 Yɔɔl kwɛn Nziã asio nzɔ a Onedzifɔɔl nyiĩ, ke ngwel wɛ ãlio bibi ndɛ owi mɛ̃ mpɛn, bvool ndɛ k'ayoo opfuru me ndɔɔ yi ndi mɛ̃ me bwal wɛ. 17 Ŋ'eyi ndɛ Lom, ndɛ obii mɛ̃ y'efua kyam, tiil k'emwɛn ndɛ mɛ̃. 18 Yɔɔl kwɛn Mfam asa kwɛn Nziã asio ndɛ nyiĩ me tsoo olɔ. Yam bam yɛɛ ngesɛ emfa ki ewueel ndɛ mɛ̃ k'Efedze.