1 Mɛ̃ wu Pool, mɛ̃ ndi mbuul a bwal me ndɔɔ a Yeso-Mãsia. Mɛ̃ ye ndoo a mɛ̃ Timote, bee eyuɔɔl ɔ̃nkaan wu ola yɛ wu Filemɔ̃, ndoo a bee wa dzii wu abesal ye bee. 2 Bee eyuɔɔl ndɛ hɛ̃ ol'Apya wu nkyel a bee, ol'Aaswipe, wu ndoo a bee wu eta, bvool ol'Ebvɔɔn li eli ebebvɔɔn onse nzɔ a yɛ. 3 Yɔɔl kwɛn Nziã wu Tal a bia-byɛ ye Mfam a bia-byɛ Yeso Mãsia asio byɛ nyiĩ, bvool awa byɛ opi!

4 Filemɔ̃, ãlio mbueel m'ebebuɛɛn mɛ̃, mɛ̃ k'ebeyɔɔl k'etuaal nkuũ a yɛ wɛ, bvool ebebveel Nziã a mɛ̃ ãtuɛɛn me ndɔɔ a yɛ. 5 Ke ngwel wɛ, mɛ̃ ebeyoo baal abeyɛɛn me dzii li eli a yɛ me baal ba ngel bueel, y'okiool o yɛ me Mfam Yeso Mãsia. 6 Mɛ̃ ebebuɛɛn me ndɔɔ yɛn okiool o bia-yɛ bo bvoo osal ye mpɛn onse yɛ, kwɛn bɔ osuul yɛ yɛɛ ngesɛ-ngesɛ obvɛ bueel b'eli a bia bia-byɛ onse elaã e bia-byɛ li bvoo ye Mãsia. 7 Ndoo a mɛ̃ wa dzii, mɛ̃ ngyoo esɛ bibi bvool mbɔɔ mpɛn me ndɔɔ a dzii li eli a yɛ, nzal-a-ŋɛn yɛ bweel ɛ̃kwal ɛ̃ ba ngel.

8 Obɔ otsɛn bɛn, onkyam ŋɛn onse Mãsia mɛ̃ ndi ndii k'etam yɛ k'asa ndɔɔ yi ekoo, 9 kɛn a me nkuũ a dzii, mɛ̃ mwɛn ngesɛ k'eluɔɔn yɛ, mɛ̃ wu Pool wu ngii ekukwel, bvel-bvel meba, mbuul a bwal me ndɔɔ a Yeso Mãsia. 10 Mɛ̃ nduɔɔn yɛ me ndɔɔ Onedzime. Ndɛ wu oyii muaan a mɛ̃ onse bwal ŋã. 11 Ndɛ tsɔɔn k'áli y'otsɛn wɛ me ndɔɔ a yɛ, kɛn a meba ŋã, ndɛ oyii y'otsɛn bibi me ndɔɔ bia-yɛ ange-buaal. 12 Mɛ̃ ebveel yɛ ndɛ, ndɛ wɛn meba oyii onge ɔ̃kwal a myam. 13 Mɛ̃ bam ékedzii k'étɛɛl ndɛ ola mɛ̃, kwɛn ndɛ awuaal a mɛ̃ ke mboo a yɛ, ŋe ndi mɛ̃ onse bwal me ndɔɔ a Nsia yi Ngesɛ. 14 Kɛn a mɛ̃ k'edzii k'esa ndɔɔ si ngamɔ̃ wɛ yɛn, bia-yɛ k'ekuru yɔ wɛ, kwɛn obvɛ b'esa yɛ, yɛ sa bɔ ɔ̃kwal ngɔmɔ̃, ebee okal onge ndɔɔ yi eywɛɛn mɛ̃ yɛ m'oywɛɛn. 15 Ke ngwel wɛ, owɛɛl ndɛ wu Onedzime ákab nzuru ye yɛ me muaan-lio, kwɛn oŋɔ̃ yɛ bvool yɔɔ ndɛ ɔ̃bu. 16 Meba, ndɛ k'abekal kɛn ɔ̃nkyal wɛ, ndɛ bam onduru ɔ̃nkyal. Ndɛ oyii ndoo a dzii wu ɔ̃tio, ke kɛn ola mɛ̃ wɛ, bvel-bvel ola yɛ, ekal onge mbuul, ekal onge ndoo onse Mfam. 17 Oŋɔ̃ okɛɛn yɛ abewal mɛ̃ onge ndoo a yɛ, yɔɔ ndɛ, onge bɛn yɛ yɔɔ myam. 18 Okɛɛn ndɛ ási yɛ obi wuo oli y'ebiin e yɛ, suul kyɛ ekal nkal a mɛ̃. 19 Mɛ̃ wu Pool nswɛn ãndɔɔ mã me kuɔɔl e myam. Myam mbuul wu èfuru yɛ ebiin okyɛ. Mɛ̃ ke nzii k'eyeel yɛ wɛn yɛ hɛ̃ li y'ebiin e mɛ̃ wɛ, ebiin okyɛ ki elaã e yam. 20 Taa-taa, ndoo a mɛ̃, wuaal a mɛ̃ me ndɔɔ oyɔ onse Mfam. Suul ɔ̃kwal a mɛ̃ abva efyɛ me nkuũ a Mãsia. 21 Mɛ̃ nkel yɛ, me ndɔɔ yɛn mɛ̃ ndi ye kaã me yɛ wɛn yɛ àsa ndɔɔ yi nduɔɔn mɛ̃ yɛ, bvool mɛ̃ ngyɛɛ wɛn yɛ àsa m'ãnduru be ndieel mɛ̃. 22 Mɛ̃ bvool nduɔɔn yɛ wɛn faal mɛ̃ lɔɔ, ke ngwel wɛ mɛ̃ ndi ye kaã wɛn, me ndɔɔ ãbuɛɛn ã byɛ, ol' abveel mɛ̃ ola byɛ.

23 Epafalas wu ndoo a mɛ̃ wa bwal me ndɔɔ a Yeso Mãsia, obio yɛ. 24 Maak y'Alisitak, ye Demas, ye Luk b'andoo a mɛ̃ b'ɔ̃sal, abio yɛ hɛ̃. 25 Yɔɔl kwɛn Mfam a bia-byɛ Yeso Mãsia asio byɛ nyiĩ!