1 K'osɛɛl, andoo a mɛ̃, esia mpaa onse Mfam. Mɛ̃ k'ewɔɔl m'okel o byɛ ãndɔɔ mãmã wɛ. Me ndɔɔ a byɛ, obobɔ enduru obvie. 2 Ekal y'onkyab me baal b'abi, ekal y'onkyab m'asal b'abi, ekal y'onkyab me baal b'aywɛɛn byɛ k'etsiil nzuru bo mfya! 3 Ke yam, b'ali y'otsiil o nzuru bo taa-taa eli bia-byɛ, bia-byɛ, b'ebebuɛɛn Nziã m'Ɔ̃fel a ndɛ, b'ebɛɛl ntwel me Yeso Mãsia, bvool bɛn k'ebeta kaã m'ombuul wɛ. 4 Mɛ̃ mpii ále mbuul wɛn kɛn ekeeta kaã hɛ̃ m'ombuul. Okɛɛn eli ye mbuul wu atsam ndiri ndɛ okoo k'ata kaã m'ombuul, mɛ̃ wu ekeeta lɔ li enduru: 5 Átsiil mɛ̃ nzuru me tsoo li mpuɔ̃ ke mbee a ŋ'áburu mɛ̃. Mɛ̃ ndi muaan a Isalayel wu emburu-ngoo, wa yam li Bɛnzamɛ̃. Ankiɔɔn a mɛ̃ áli Ayuda. Me b'otal okiaal o Ngel, mɛ̃ éli ɔ̃falisaye. 6 Me ndɔɔ ebal ki ɔ̃sal, mɛ̃ wu étueel Ebvɔɔn mpal. Me ndɔɔ emfa ki akal dzu m'olweel b'ãngel, mɛ̃ eywɛn elyal. 7 Kɛn ãndɔɔ omɔ̃ m'ã́li y'ɔ̃bvɛn me mɛ̃, mɛ̃ bvool ke bengwal mɔ̃ y'ɔ̃bvɛn wɛ, me ndɔɔ a Mãsia. 8 Onkyam ãndɔɔ mbueel, mɛ̃ ebewal mɔ̃ onge ãndɔɔ mɛn otsɛn pyɛ, me ndɔɔ obvɛ b'onduru okuun. Obvɛ obɔ oli oyɛɛ o Yeso Mãsia wu Mfam a mɛ̃. Me ndɔɔ a ndɛ, mɛ̃ nkiool k'eyɔɔl ãndɔɔ omɔ̃ mbueel, mɛ̃ bvool ebewal mɔ̃ mbueel onge nsɔɔl, kwɛn mɛ̃ mbɔɔ Mãsia, 9 bvool kwɛn mɛ̃ nkal me bvoo ye ndɛ. Ke mɛ̃ ekal dzu me myam m'olweel o Ngel wɛ, m'okal dzu me nkuul a okiool me Mãsia. Okal dzu obɔ, b'ofa ola Nziã me nkuul a okiool. 10 Ki nzii mɛ̃, k'eyɛɛ mɛ̃ Mãsia ye waan li osiool o ndɛ, k'esam mɛ̃ onse fool e ndɛ, bvool k'ekal mɛ̃ onge ndɛ onse epfu e ndɛ. 11 Mɛ̃ ndi ye kaã kwɛn mɛ̃ èsiool onse b'ákwi-ákwi, okɛɛn ekoo k'ekal obobɔɔ.

12 Ke mɛ̃ eyɛɛn wɛn mɛ̃ ŋ'emebɔɔ ebvakab wɛ, wuo wɛn mɛ̃ ŋe ngyii ɔ̃koo wɛ. Kɛn a mɛ̃ ebetsuu ntiin me ndɔɔ yi esa mpɛn yi ebɔɔ kyɛ, ke ngwel wɛ mɛ̃ hɛ̃ Yeso Mãsia ámaabɔɔ mɛ̃. 13 Andoo a mɛ̃, me b'otal mɛ̃, mɛ̃ k'etsam wɛn mɛ̃ ŋ'emeebɔɔ ebvakab wɛ. Kɛn a mɛ̃ ebesa ndɔɔ ngamɔ̃ yi: Mɛ̃ ebedzɛɛn ãndɔɔ mbueel m'ãli ke mbee a mɛ̃, bvool mɛ̃ ebewɛɛl mpɛn me mã ke nkwel. 14 Mɛ̃ ebetsuu ntiin tiil ntɔ, me ndɔɔ yi ebɔ ebvakab ki éti Nziã mɛ̃ mbel fa ywel me ndɔɔ a kyɛ, onse bvoo ye Mãsia. 15 Obobɔ, bia-byɛ bueel b'emeekwel onse okiool, ekal y'ãtsam omɔ̃. Okɛɛn me ndɔɔ ngamɔ bubu, byɛ etsam emfa ekyam, Nziã àyɛɛl byɛ yɔ. 16 Kɛn a ke mboo yi emeetɔ bia-byɛ, edzuu nkuul mɔ̃. 17 Andoo a mɛ̃, byɛ bueel esa onge mɛ̃, bvool etal baal b'abenɔɔn a kuul e bee. 18 Ke ngwel wɛ, baal bibi abedzuu onse otaal b'enkulusu e Mãsia. Nsa bibi mɛ̃ émeyɛɛn byɛ yɔ, meba ŋã mɛ̃ bvool ngyɛɛn byɛ yɔ y'elel kieel. 19 Bɔ àyesiɛɛn k'odziɔɔn, ke ngwel wɛ nziã wa bɔ, eli mwiĩ a bɔ. Bɔ abelɔ dzuun e bɔ m'ãndɔɔ m'ãwa bɔ opfuru, bvool bɔ abetsam kɛn a m'ãndɔɔ mã nsie. 20 Me b'otal bia-byɛ, bviil li bia-byɛ eli ke ywel, ku efa Mfam Yeso Mãsia wu Ɔ̃mvuul a bia-byɛ wu ebekiaal bia-byɛ. 21 Ndɛ akieel aswɛɛl nzuru a bia-byɛ yɛn otsɛn pyɛ me ndɔɔ yi asuul yɔ onge nzuru a ndɛ yi dzuun, me waan li eli a ndɛ li asuul eluɔ bvieel ke nsɛn a okwɛn o ndɛ.