1 Mɛ̃ wu Pool, mɛ̃ ndi ɔ̃sal a Nziã, bvool ndi ntam a Yeso Mãsia me ndɔɔ yi ebiri baal b'ésueel ndɛ wu Nziã k'okiool, bvool esuul bɔ ayɛɛ otaa-taa b'obiri baal k'akuru nzuru me ndɛ. 2 M'emfa okyɛ, bɔ akal ye kaã li elaã li ɔ̃bu nkal ɔ̃bu. Elaã olɔ, Nziã wɛn k'apfuru wɛ, ŋ'ɛ̃kwel ye k'ebɛɛn ɔ̃kiri, álieel ndiri ndɛ àwa bia-byɛ lɔ. 3 Ŋ'ékoo lio li éwɛɛ Nziã wu Ɔ̃mvuul a bia-byɛ, ndɛ áyɛɛl Endɔɔ e ndɛ onse ãtee m'éwi ndɛ mɛ̃, m'emfa ki ontam o ndɛ. 4 Mɛ̃ ngyuɔɔl ɔ̃nkaan wu ola yɛ wu Tite wu muaan a mɛ̃ wa taa-taa onse okiool b'obvool bia-byɛ. Yɔɔl kwɛn Nziã wu Tal a bia-byɛ ye Mfam Yeso Mãsia wu Ɔ̃mvuul bia-byɛ asio yɛ nyiĩ bvool awa yɛ opi!

5 M'ésiil yɛ k'esanga ki Kelete kwɛn oŋɔ̃ yɛ faal ãndɔɔ m'ãsiil. Me bviil bwɛn a bviil, suaal akuul-kuul b'ebvɔɔn, m'emfa ki étam mɛ̃ yɛ osa. 6 Ɔ̃kuul a ebvɔɔn ebvaan akal mbuul wɛn elyal pyɛ, akal ɔ̃lam wu ɔ̃kal kɛn a ngɔmɔ̃. Baan a ndɛ ebvaan akal akiool. K'ebvaan bɔ akal baan b'abetuaal ndiri bɔ ali y'epfuũ bvi ebi-ebi bvool aywɛn a lweel wɛ. 7 Ke ngwel wɛ, ɔ̃kuul a ebvɔɔn ebvaan akal elyal pyɛ, me ndɔɔ yɛn ndɛ wu atal ãndɔɔ ã Nziã. Ndɛ ebvaan akal ondɛɛl o nzuru pyɛ, ebvaan ndɛ akal mpuru pyɛ, k'ebvaan ndɛ akal ɔnywã-mbal wɛ, k'ebvaan ndɛ akal mbuul wa ye kɔɔ-kɔɔ wɛ, k'ebvaan hɛ̃ ndɛ akal mbuul wu abii nzi m'ãnkuul m'ãbi-ãbi wɛ. 8 Kɛn a ndɛ ebvaan ayɛɛ k'ayɔɔ baal ngesɛ, mbuul wu odzii ãndɔɔ mã ngesɛ, wu oli y'ombuul, wa dzu, wa ngel bvool wu oli y'okuru b'ɔ̃kwal. 9 Ebvaan ndɛ akuru nzuru m'Endɔɔ li taa-taa m'emfa ki átee ndɛ lɔ. Obobɔ, ndɛ okoo k'awɛɛl bakyɛ m'ãtee mã taa-taa, bvool okoo k'akuru ɛ̃nywã ɛ̃ b'ali onse otaal ye ndɛ.

10 Ke ngwel wɛ, eli ye baal bibi b'aywɛn a lweel, bɔ ali ye ndiaal yi ngwel-a-ngwel bvool ali emfuru-baal, bvel-bvel onse baal bɛn átsiil bɔ. 11 Ebvaan yɛ akuru bɔ ɛ̃nywã. Ke ngwel wɛ, bɔ abetsal ãyam ã baal bibi m'oyiool b'ãndɔɔ mɛn k'ebvaan ayiool wɛ, me ndɔɔ yi abii furu li ebi-ebi. 12 Ngɔmɔ̃ onse bam, wu oli ɔ̃liaal-ɛ̃kiɛɛn a álieel ndiri:

«Baal a Kelete ali kɛn a anga-mfya, anyam b'abi, anga-ɔ̃tam, anga-obwal b'abetsam kɛn ɔ̃la a bam.»

13 Ãndɔɔ m'éyɛɛn ndɛ omɔ̃ ãli taa-taa. Obɔ otsɛn bɛn, pɛɛn bɔ bam kɔkɔ, me ndɔɔ yɛn bɔ akal y'okiool bo taa-taa. 14 Abee nzuru okuru m'esesam bvi Ayuda y'ãngel ã baal b'abee otaa-taa. 15 Eluɔ bvieel eli tsɛtsɛ me ndɔɔ a baal bueel ba tsɛtsɛ. Kɛn eluɔ si emɔ̃ ki tsɛtsɛ pyɛ me baal bɛn k'ali tsɛtsɛ wɛ bvool aywɛn okiool. Ãyal y'ãtsam mi ɛ̃kwal ɛ̃ bɔ ãli ye mbiin. 16 Bɔ abeyɛɛn ndiri bɔ ayɛɛ Nziã, kɛn ãndɔɔ m'ebesa bɔ ãsuo kwɛn bɔ k'ayɛɛ ndɛ wɛ. Bɔ k'alweel ndɛ wɛ. Bɔ baal b'anduru obi, bvool k'akoo k'asa ndɔɔ si ngamɔ̃ yi mvɛ wɛ.