1 Coríntios 6

आपसी राड़ीन फिसलो

1 काय तुमरा माय रेन कुणीह बी ज्यो ईमोत हे काय जुलबुखे दिहरा हेऱ्यी राड़ एय, ते फेसलान केरता जा माणहे बोगवानाह नाह जाणते ता फाय जाहो एने विश्वासी माणहा फाय नाय जाहो? 2 काय तुमू नाह जाणते काय बोगवानान माणहे दुनियान नियाव केरती? तान केरता जुलबुखे तुमूह दुनियान नियाव किरहो, ते काय तुमू आत्याम रेन आत्यी राड़ीन बी होमच्‍यो केरनेन लायेक नाह सोता। 3 काय तुमू नाह जाणते काय आपु हेरोगदुतान नियाव किरहो? ते काय दुनियान वातुन होमच्‍यो नाय किरहो? 4 केदी तुमूह दुनियान वातुन होमच्‍यो केरनु एय, ते काय ताहास बोहाड़हो जान मोंडली हेऱ्यो काय बी सेंगेत नाह सोती? 5 मी तुमूह लाजवाड़नेन केरता ज्यो केथु काय खेरीच तुमरा माय एक बी इकेलदार माणुह नाय मीले, जो आपणा बायाख ने होमच्‍यो केर सेकी? 6 तुमरा माय बाहख बाहख माय कोरटाम जाईन लेड़ाय केरतेह, एने तो बी विण बोरहावालान ओंगाण।

7 पुण खेरीच तुमरा माय मुठलो गुनो ते ज्‍यु हे काय एका दिहरा माय राड़ केरतेह, अन्याय काहा नाह सेहते? आपणो नुकसान काहा नाह सेहते? 8 पुण तुमू ते सोता अन्याय केरतेह एने नुकसान पोचाड़तेह, एने तो बी बायाख। 9 काय तुमू नाह जाणते काय अन्याय केरनारे माणहे बोगवानान राज ने वोस नाय एती, दोका माय मा रिहो नाह सिनालो केरनारे, नाह मुरती पुजा केरनारे, नाह दिहरी बायकु हेऱ्यो सिनालो केरनारे, नाह लुच्‍चाय केरनारे, नाह एदम्या हेऱ्यो सिनालो केरनारे, 10 चोर, लालच्‍या, पिणारे, जुलनारे, ठेगणारे, बोगवानान राज ने वोस नाय रेती। 11 एने तुमरा माय रेन कोलाक इहीचकेरीन जीवणे बाजरियेल एता, पुण तुमू मालीक यीशु मसीन नावा माय एने आमरा बोगवानान जीवा माय दोवायेल हेते, एने चोखाला ईयेल, एने नियाव केरनारे निवड़ाय जायेल हेते।

सेरीर बोगवानान बोड़ाय ने केरता

12 ✝ 6:12 1 कुरिंथीयो 10:23 आखी वोस्तु मार केरता हाजी ते हेत्यु, पुण आखी वोस्तु फायदान नाह सोत्यु आखी वोस्तु मार केरता हाजी हेत्यु, पुण मी काल्ली बी वातुन ताबा माय नाय रेव। 13 रूटो पेटान केरता एने पेट रोटान केरता हे, पुण बोगवान ज्याह एने ताह दुयाह खेतेम केर देय, एने सेरीर सिनालो केरनेन केरता नाह सोतो, पुण मालीकान सेवान केरता हे, एने मालीक सेरीरान चाकरी केरनेन केरता हे। 14 बोगवान तान ताकेत केरीन मालक्याह जिवाड़ेल हे, एने आपुह बी जीवाड़ी। 15 काय तुमू नाह जाणते काय तुमरो सेरीर मसीन सेरीरान आंग हे? ते काय मी मसीन सेरीरान आंग लेन ताह वेश्यान आंग बाणावो? केदीच नाह। 16 काय तुमू नाह जाणते काय जो कुण वेश्या हेऱ्यो सेंगेत किरेह, तो ती हिऱ्यो एक सेरीर एय जाथे? काहाकाय देरेम पुस्तेक माय लिखेल हे, "ता दुयू एक सेरीर एय जाती।" 17 पुण जो मालीकान जीवा हेऱ्यो जोड़ाय रिथे, तो ता हेऱ्यो एक जीव एय जाथे। 18 सिनालाह रेन वोचीन रिवो, जोला दिहरा पापे माणुह किरेह ता सेरीरान बाहेर हेते, पुण सिनालो केरनार ताच ने सेरीरान विरोद पाप किरेह। 19 ✝6:19 1 कुरिंथीयो 3:16; 2 कुरिंथीयो 6:16काय तुमू नाह जाणते काय तुमरो सेरीर चोखाला जीवान मोंदिर हे, जो तुमू माय बुहेल हे, एने तुमूह बोगवानान उगे रेन जुड़ेल हे, एने तुमू सोतास ने नाह सोता? 20 काहाकाय बोगवान किमोत आपीन वेचातो लेन सोड़ेव लियेल हे, तानकेरता तुमरा सेरीरान द्‍वारे बोगवानान बोड़ाय किरो।