1 Pedro 3

एदमी एने बायकु

1 ✝ 3:1 इफिसीयो 5:22; कुलीसियो 3:18 एय बायकु, तुमू बी तुमरा एदम्यान ताबाम रिवो, काहाकाय ज्याम रेन एगदो बोगवानान वचन पोर बुरहो नाह किरेत ताहार तुमरा वेवारा केरीस ने तुमू ता बोरहा केरीन जिक सेकतेह ज्यानकेरता तुमूह ता हेऱ्या वातु केरनेन बी जोरेवरी ना सोती। 2 काहाकाय ता देखती काय तुमरो वेवारो चोखो एने बोक्ती माय एय। 3 ✝3:3 1 तीमुथीयुस 2:9तुमरी होबा फोक्‍तो बाहेर रेन देखाड़नो नाय जुवे, जिहकेरीन लेट्या गुथणे, एने होनान गेयणो पेरने, एने बात बातीन फाड़का पेरने, 4 केरीन ज्यो तुमरो मायवालो व्यक्तिगत जुवे, जा गेरबोड़ा एने मोनान गेरबोड़ायीन खेतेम नाह एणार होबा केरीन हिंगारेल जुवे, काहाकाय बोगवानान नेजरी माय ज्यान किमोत मोठो हे। 5 काहाकाय पेल्ला काला माय बोगवाना पोर आसा मेलनार्‍यु बोक्ती केरनार्‍यु बायकु बी त्यु आप आपणा एदम्यान ताबाम रेयीन सोताह इहीचकेरीन हिंगारताल्यु। 6 जिहकेरीन सारा तीन एदमी अब्राहाम ने उकुम मानताली। तिहेच केरीन तुमू बी हाजो किरो एने बिवो मा, ते तुमू सारान बेट्युख ठेराहो।