1 अब्राहाम डायो एय जायेल इतो, एने तान वोय जुलूम एती एने बोगवान आखी वातुम ताह बोरकेत आपेल इतो। 2 एक दिह अब्राहाम तान ता पावराह, जो तान गेराम डायलो एने तान आखा मालदेन पोर आदिकारी इतो, ताह हादिन केयो, "तु तारो आथ मारी जांग पोर* मेल।✝ 3 एने मार हिऱ्यो हिरोग एने जुगाह बाणावणार बोगवानान ओंगाण ज्या बाराम सुगोण खा काय तु मारा सोरान केरता कनानी सोऱ्युम रेन जान विची माय मी रेथु, काल्लीस नाय लियावहे। 4 पुण तु मारा देसाम माराच गेरल्या फाय जाएन मारा सोरा इसाहाक केरता लाडी लेन आवजे।"

5 पुण पावोर ताह केयो, "केदी ती बायकु मार हेरी ज्या देसाम नाय आवणे होदी; ताहार काय माहु तारा सोराह जा देसाम रेन तु आयेल हे, ली जाणे पोड़ी काय?"

6 अब्राहाम ताह जापाप आप्यो, "चेकचिल्यो रे! मारा सोराह ताहरी केदीच मा लिजाहे। 7 हेरगावालो बोगवान यहोवा जो माहु मारा आबाख ने गेराम रेन एने मारी जेल्मान बुयीम रेन लेन आवीन मार हिऱ्यो सुगोण खाएन कियेल हे, काय मी ज्यो देस तारी वोसीह आपुह; तोच तान दुत तार ओंगाण ओंगाण मोकली, काय तु मारा सोरान केरता तारेन एक बायकु लेन आवहे। 8 एने केदी ती बायकु तार हेरी आवणे नाय हुदे ताहार तु ज्या सुगोण माय रेन सुट जाहे; पुण मारा सोराह ताहरो मा लिजाहे।" 9 तेवी तो पावोर तान मालीक अब्राहाम ने जांग पोर आथ मेल दिनो, एने ज्यान बाराम सुगोण खादो।

10 तेवी तो पावोर तान मालक्यान उटड़ाम रेन दोह उटड़ा निवाड़ीन, हाज हाजी वोस्तुम रेन थोड़ोक थोड़ोक लेन चाल पुड़नो; एने उत्तर उगे मेसोपोटामीया नाहोर ने हेयरान आहने पुचनो। 11 एने तो उटड़ाह हेयरान बाहेर वावड़ीन आहने बोहाड्यो, ती हांजीन टेम एती, ती टेम माय बायकु पाणी बोरनेन केरता ताहरी आवताल्यु। 12 तेवी तो केणे बाज गीयो, "एय मारा मालीक अब्राहामान बोगवान यहोवा, आज मारा कामाह पुरो किर, एने मारा मालीक अब्राहाम पोर गीण केर। 13 देख, मी ज्यी वावड़ीन आहने उबरिनोह, एने हेयराम रेणारान सोऱ्यु पाणी बोरनेन केरता आवणे बाज रेन्युह। 14 केरीन ओहलो एणे दे काय जी सोरीह मी केह, ‘तारी पाण्यान गागरी माय रेन रोचवीन माहु पाणी पिणेन केरता आप, एने ती केय, पिय ले ओवती मी तारा उटड़ाह बी पिवड़ाव देह;’ ज्यी तीच रेय जीह तु तारा चाकऱ्या इसाहाक ने केरता निवाड़ेल हे; इहकेरीन मी जाण लेह, काय तु मारा मालक्या पोर गीण किरेल हे।"

15 एने ओहलो एनो काय जेवी तो विन्ता केरनेच बाजरियेल इतो, तेवी अब्राहाम ने बाहख नाहोर एने मिल्कान बेटाख बतुएल ने बेटीख रिबीका खांदा पोर गागेर लेन आवी। 16 ती जुलूम हाजी एने कुवारली एती, एने एवी वोर तीन वाराड़ नाह इयेल एतो, ती वावड़ी माय उतरी गियी एने तीन गागेर बोरीन पोशी उपेर आवी। 17 तेवी तो पावोर तिह मिलने दुवड़नो, एने जाएन तीह केयो, "तारी गागरीम रेन थोड़ोक पाणी माहु पिवाड़ दे।"

18 तेवी रिबीका चालुच खांदो पोर रेन गागेर उतारीन केयी, "हे मालीक पिय ले," एने ती ताह पाणी पिवाड़ देनी। 19 जेवी ती ताह पाणी पिवाड़ देनी, तेवी पोशी ताह केयी, "मी तारा उटड़ाह बी पाणी पिवाड़ देह।" 20 तेवी ती गागरी वालो पाणी चालोच साठड़ाम रोचवीन पोशी वावड़ीम पाणी बोरने दोवडीन गियी; एने तान आखा उटड़ान केरता पाणी बोर देनी। 21 एने तो पावोर बोंगलायीन ठावकोच ती उगे देखती लेन ज्य सोचतालो काय बोगवान मारो फिरनाह पुरो किरेल हे काय नाह।

22 जेवी उटड़ा पाणी पिय लेदा, तेवी तो पावोर तीह आदा तोलान होनान मुंदी काढ़ीन तिह आप्यो, एने दोह तोलान होनान बांगड्यु तीन आथाम पेराव दिनो। 23 एने तीह फुशो, "तु कुणीन सोरी हे? तु माहु के, काय तारा आबाख ने गेराम आपु होमाय उलोग जागो हे?"

24 रिबीका ताह जापाप आपी, "मी ते नाहोर एने मिल्कान बेटाख बतुएल ने बेटीख हे।" 25 ती पोशी केयी, "होव आमु फाय उटड़ान केरता जुलूम चारो हे, एने बांदणेन केरता बी जुलूम जागो हे।"

26 तेवी तो पावोर निड़ो मुंड केरीन बोगवानान बोक्ती केरीन केयो, 27 "बोरकेत वालो हे, मारा मालीक अब्राहाम ने बोगवान यहोवा, जो तान गीण एने खेरायीह मारा मालक्या पोर रेन सेटी नाह किरेल सुतो। बोगवान माहु हाजाली वाटे चालाड़ीन मारा मालक्यान बाय बोन्दान गेर पोचाड़ दियेल हे।"

28 तेवी ती सोरी दोवड़ीन गेर गियी, एने तीन आईख आबाख आखी वात केय देनी। 29 तेवी लाबान जो रिबीकान बाहख इतो, बाहेर वावड़ीन आहनी दोवड़ीन गीयो जाहरी अब्राहाम ने पावोर इतो। 30 एने ओहलो एनो काय जेवी तो तान बोणीख रिबीका आथाम ता होनान बांगड्यु बी दिख्यो, एने तीन ज्यी वात बी हुमल्यो काय तो एदमी माहु ओहली वातु किऱ्यो, तेवी तो गेराम रेन निकलीन ता पावरान आहने गीयो; एने दिख्यो काय वावड़ीन जागे उटड़ा उब रेनाह। 31 तो केयो, "हे यहोवा बोगवाना उगे रेन बोरकेतवाला एदमी, माय आव तु काहा बाहेर उबरिनोह? मी गेराम उटड़ान केरता जागो बी तियार किरेल हे।"

32 तेवी तो पावोर गेराम गीयो एने लाबान उटड़ाह सोड़ीन चारो आप दिनो। एने ताह एने तान हातीह पाय दोवणेन केरता पाणी आप्यो। 33 तेवी अब्राहामान पावरान ओंगाण रूटो वाटो केरीन आप्या, पुण तो केयो, "मी जाह वोर जी मारी वात नाह केय देत, ताह वोर काय नाय खाव।"

तेवी लाबान ताह केयो, "ठिक हे केय दे।"

34 तेवी पावोर केयो, "मी ते अब्राहाम ने पावोर हे।" 35 बोगवान मारा मालक्याह जुलूम बोरकेत आपेल हे; केरीन तो मुठो एदमी बोण जायेल हे; एने बोगवान ताह मेंड्रा बोकड्या डोरे, गेदड़ा उटड़ा होनो चांदी, एने पावोर पावरेन्यु आपेल हे। 36 एने मारा मालक्यान बायकु साराह डायावाराम एक सुरो पायदा इयेल हे; एने ता सोराह मार मालीक अब्राहाम आखो काय आपेल हे। 37 एने मारो मालीक माहु ज्यो सुगोण खावाड़ेल कियेल हे, "काय मी तान सोरान केरता कनानीन सोऱ्युम रेन जान देसाम तो रिथे, ता रेन काल्ली बायकु नाय लियावो। 38 मी तान आबाख ने गेराणान, एने जातीन माणहा फाय जाएन तान केरता एक बायकु लेन आवुह।" 39 तेवी मी मारा मालक्याह केयो, "केदी ती बायकु मार हेरी आवणे नाय हुदे ते?" 40 तेवी तो माहु केयो, "बोगवान यहोवा जान सोमोर मी चालती आयेल हे, तो तार आरही तान दुताह मोकलीन तो तारी यात्रा पुरी केरी; एने तु मारा जातीन एने मारा आबाख ने गेराणाम रेन मारा सोरान केरता एक बायकु लियाव सिकहे। 41 तु तेवीच मारा ज्या सुगोणा माय रेन सुट हे, जेवी तु मारा गेराणान माणहा फाय पोच जाहे; एने केदी ता तुवाह काल्ली बायकु नाय आपी, ते तु मारा सुगोण माय रेन सुट जाहे।"

42 केरीन मी आज ती वावड़ीन जागे आवीन बोगवानाह विन्ता किऱ्यो, "एय मारा मालीक अब्राहाम ने बोगवान यहोवा, केदी तु मारो ज्य फिरनाह पुरो केरतेय। 43 ते देख मी पाण्यान जी वावड़ीन जागे उबरिनोह; एने ओहलो एय, काय जी कुवारली सोरी पाणी बोरनेन केरता आवी, एने मी तिह केव, तारी गागरीम रेन माहु थोड़ोक पाणी पिवाड़। 44 एने ती माहु केय, पिय ले, एने मी तारा उटड़ाह पिणेन केरता बी पाणी बोर देह, ती तीच बायकु रेय जीह तु मारा मालक्यान सोरान केरता ठेरायेल हे।" 45 मी मोनाम इह केरीन विन्ता केरतालोच, तेवी रिबीका खांदा पोर गागेर लेन पाणी बोरनेन केरता आवी, एने ती वावड़ीम उतरीन पाणी बोरने बाज गियी, तेवी मी तीह केयो, "माहु पाणी पिवाड़ दे।" 46 एने ती जेल्दीच तीन खांदा पोर रेन गागेर उतारीन माहु केयो, "ले पिय ले, ओवती मी तारा उटड़ाह पिवाड़ देह।" इह केरीन मी बी पिय लिदो एने ती उटड़ाह बी पिवड़ाव देनी। 47 तेवी मी तिह फुशो, "तु कुणीन बेटीख हे?" एने ती केयी, "मी ते नाहोर एने मिल्कान बेटाख बतुएल ने बेटीख हे।" तेवी मी तिह होनान नाथनी आप्यो, एने तीन आथाम बांगड्यु पेराव दिनो। 48 ओवतो मी मुंड बुई पोर टेकाड़ीन बोगवानान बोक्ती किऱ्यो, "काहाकाय तो माहु ठिक वाटे पोचाड्यो, काय मी मारा मालीक अब्राहाम ने सोरान केरता तान गेराणान सोरी लेन जाव। 49 केरीन एवी, केदी तुमू मारा मालक्या हेऱ्या गीण एने खेराय ने वेवारो केरने होदतेती, ते माहु किवो; एने केदी निह होदते, ते तीबी माहु केय दिवो; जाहसे मी विचार केर सेकु काय माहु काय केरनु हे।"

50 तेवी लाबान एने बतुएल ताह जापाप आप्या, "ज्यी वात बोगवाना उगे रेन इयेल हे; केरीन आमु तुवाह नाय ते हाजो केय सेकतेह नाय ते बाक्तो। 51 देख रिबीका तार सोमोर हे, तु तीह लिजा, एने तो बोगवानान वचनान गेत, तारा मालक्यान सोरान लाडी बोण जाए।" 52 तान ज्यी वात होमलीन, अब्राहाम ने पावोर बुई पोर पोड़ीन बोगवानान बोड़ाय किऱ्यो। 53 ओवतो तो पावोर होनान एने चांदीन गेयणो, एने फाड़का काड़ीन रिबीकाह आप्यो; एने तीन बायाख एने आईख बी तो मोंग मोंगाल्यु वोस्तु आप्यो।

54 तेवी तो तान हाती हिऱ्यो रूटो खादो, रात ताच काड्यो, एने तो विगोच उठीन ताह केयो, "माहु मार मालीक अब्राहाम फाय जाणेन केरता वाटे लागाड़ो।"

55 तेवी रिबीकान बाहख एने आहख केया, "सोरीह आमु फाय थोड़ाक दिह, मतलब कोम से कोम दोह दिह वोर रेणे दे; ओवती तान पासाण ती जात रेय।"

56 पुण तो ताह केयो, "बोगवान जो मारो फिरनाह पुरो किरेल हे; केरीन तुमू माहु मा रूको, एवी माहु वाटे लागाड़ दिवो काय मी मारा मालक्या फाय जाव।"

57 तेवी ता केया, "आमु सोरीह हादिन फुसतेह काय ती काय किथे।" 58 एने ता रिबीका हादिन फुशा, "काय तु न्या हेरी जाणेन तियार हे?" ती केयी, "होव मी जाणेन तियार हे।"

59 तेवी ता लाबान ने बोणीख रिबीका एने तीन पावेरनीह एने अब्राहाम ने पावराह एने तान हाथीह सोबाह वाटे लागाड़ देना। 60 एने ता रिबीकाह बोरकेत आपीन केया :

"एय आमरी बोणीख, तु एजारो लाखान डावाली आहख बुणे!

एने तारो वोस तान दुसमोनान हेयरान आदिकारी बुणे!"

61 ओवती रिबीका एने तीन हाती उटड़ा पोर बोहीन तान पासाण निकेलन्यु, इह केरीन तो पावोर रिबीकाह लेन अब्राहामा फाय जाणेन निकेलना।

62 ती टेम माय इसाहाक जो कनान ने नेगेब देक्षिण देसाम रेतालो, एने तो लेहरोई* नावान वावड़ी उगे हुंनाले जागे लागतो चालीन आवतालो। 63 तो हांज पोर खेत देखणेन केरता जायेल इतो, तेवी तो निजेर टाकीन दिख्यो ते ताह सेटाच रेन उटड़ा आवताला देखाना। 64 रिबीका निजेर टाकीन इसाहाकाह देखी, एने देखाताच उटड़ा पोर रेन उतरी गियी। 65 तेवी ती पावराह फुशी, "खेता उगे रेन आपुह मिलनेन आवणे बाज रेनोह, तो कुण हे," पावोर तिह केयो, "उयो, ते मारो मालीक हे," तेवी रिबीका गुंगटो केरीन मुयाह डाप लेदी।

66 पावोर इसाहाकाह आखी वात केय दिनो, जो ता हेऱ्यो इयेल एती। 67 तेवी इसाहाक रिबीकाह तान आईख सारान तोम्बु माय लेन आवो, एने ती हिऱ्यो वाराड़ केरीन तिह मोंग किऱ्यो, इह केरीन सारान मोतीन पासाण इसाहाकाह हुक सापेड़नो।