1 एक दिह याकुब लाबानान सोराह आपसाम ज्यी वातु केरताला हुमल्यो, "याकुब आपणा आबाख ने आखो मालदेन सांडाड़ लियेल हे, एने तो मालदेन लेन मालदार बोण जायेल हे।" 2 याकुब लाबानान मुय देखीन जाण लिदो, काय तो ता हिऱ्यो पेल सारको नाय मिले। 3 तेवी बोगवान याकुबाह केयो, "तारा डायडायान देसाम एने तारी जेल्मान बुयीम पुशो जातरे, एने मी तार आरही रेह।"

4 तेवी याकुब राहेल एने लियाह, तान मेंड्रा बोकड्याह मेलतालो ती जागे हादिन केयो, 5 "तुमरा आबाख ने मुयाह देखीन माहु मालुम पुड़ेह, काय तो पेल सारको मार हिऱ्यो वेवारो नाह किरेत; पुण मारा आबाख ने बोगवान मार हिऱ्यो हे। 6 एने तुमू बी जाणत्युह, काय मी तुमरा आबाख ने सेवा मारी आखी ताकेत लागाड़ीन किरेल हे। 7 तीबी तुमरो आबोख माहु ठेगीन मारी मोंजरीह दोह वारीन बोदली दिनो; पुण बोगवान ताह मारो नुकसान नाह केरने दिनो।" 8 जेवी तो माहु कियेल इतो, "टिमकावाला पिला तारी मोंजरीन रेती," तेवी आख्‍यु बोकड्यु टिमकावाला पिला जेणने बाज गियु, तेवी तो पुशो केयो, "पाटाल्या पिला तारी मोंजरीन रेती;" तेवी आख्‍यु बोकड्यु पाटाल्या पिला जेणने बाज गियु। 9 तेवी इह केरीन बोगवान तुमरा आबाख ने जेनवाराम रेन काढ़ीन माहु आप दिनो।

10 मेंड्रा बोकड्युन गाबेण एणेन टेम माय मी होपना माय काय दिख्यो, काय जा बुकोड़ बोकड्यु पोर उड़ने बाज रेनाह, ता पाटाल्या, टिमकावाला, काबऱ्या हेते। 11 तेवी बोगवानान दुत होपना माय माहु केयो, "एय याकुब!" मी केयो, "काय उकुम हे।" 12 तेवी तो केयो, "निजेर टाकीन देख ता सोब बुकोड़ जा बोकड्यु पोर उड़ने बाज रेनाह; ताह देख काय ता टिमकावाला, पाटाल्या, एने काबऱ्या हेते। काहाकाय लाबान जो काय तार हिऱ्यो किरेह, तो मी दिखेल हे। 13 मी ता बेतेल वालो बोगवान हे, जाहरो तु एक खांब उबो केरीन ता पोर तेल रोचवेल इतो, एने मारी मानता मानेल इतो, एवी चाल, ज्या देसाम रेन निकलीन तारा देसाम पुशो जातरे।"✝

14 तेवी राहेल एने लिया ताह केयु, "काय आमरा आबाख ने गेराम एवी बी आमरो थुड़ोक ईसो वुचेल हे? 15 काय आमु तान नेजरीम पारक्यु नाह बोणन्यु? देख, तो ते आमुह वेच दियेल हे, एने आमरा रूप्या खाईन बोह रिनोह। 16 केरीन बोगवान आमरा आबाख ने जोलो देन मांगेल हे, तो एवी आपणो, एने आपणा सोरान हे, एवी जो काय बोगवान तुवाह कियेल हे तोच केर।"

17 तेवी याकुब जाणेन तियारी किऱ्यो; एने तो तान बायकुह सोराह उटड़ा पोर बोहाड्यो।

18 एने जोला जेनवेराह तो पद्दनराम माय टुलो केरीन मालदार बोण जायेल इतो, ता सोबाह लेन कनान माय तान आबाख इसाहाक फाय जाणेन केरता निकेलनो। 19 लाबान ते मेंड्रान रोचका कातेरनेन केरता जात रियेल इतो, तेवी राहेल तीन आबाख ने गेरवाला देवतान मुरता चोरीन ली जात रेनी। 20 तेवी याकुब अरामी लाबान फाय रेन मोनेस जात रिनो, एने मी न्या रेन जाथु इही ताह नाह केयो। 21 याकुब तान आखो गेरबार मालदेन लेन नाठो; एने फरात नेदी पार उतरीन गीलाद नावान बोयड़ान देसा उखीर निकेलनो।

22 तीन दिह्यान पासाण लाबानाह खुबेर जुड़नी काय याकुब नाह जायेल हे। 23 केरीन तो तान माणहाह आरही लेन सात दिह वोर तान पासाण पुड़नो, एने गीलाद नावान बोयड़ान देसाम ताह सापड़ाव लिदो। 24 तेवी ती राती बोगवान अरामी लाबानान होपना माय आवीन केयो, "चेकचिल्यो रे, याकुबाह हाजो बाक्तो मा किहे।" 25 याकुब गीलाद नावान बोयड़ान देसा माय तोम्बु उबो केरीन पाड़ावो टाकेल इतो, केरीन लाबान बी तान माणहा हिऱ्यो ताहरीच तोम्बु उबो राखीन पाड़ावो किऱ्यो।

26 लाबान याकुबाह केयो, "तु मार हिऱ्यो इही काहा किरेल, काय तु मार फाय रेन मोनेच आवती रिनो, एने मार सोऱ्युह इह केरीन लावो, जीहे तालवार केरीन लेड़ाय माय देरीन लायेल बायकुन गेत लेन आवो। 27 तु लिकाईन काहा नाहीन आवो, माहु बिगेर फुसेल मार फाय रेन मोनेच आवतेरनो; नाह ते मी तुवाह खुसी माय डोलगी एने विणो वाजाड़ावीन, एने गीते गावाड़तीन वाटे लागाड़तो? 28 तु ते माहु मारी सोऱ्युह एने नातण्याक गुल्या वोर नाह देणे दिनो? तु विणएकल्यान गेत ज्य किरेल हे। 29 तुमूह नुकसान पोचाड़नेन ताकेत मारा आथाम ते हे; पुण, गियी राती तारा आबाख ने बोगवान मारा होपना माय आवीन केयो, चेकचिल्यो रे याकुबाह हाजो बाक्तो मा किहे। 30 मी जाणथु तुवाह तार आबाख ने गेर जाणेन मोठली आसा हे, केरीन तु आवती रिनो, पुण तु मारा गेरान देवताह चोरी काहा किऱ्यो?"

31 याकुब ताह जापाप आप्यो, "मी ज्यो सोचीन बिय जायेल इतो काय, तु तार सोऱ्युह मार फाय रेन सांडाड़ ते नाय लिहे। 32 पुण मी तारा गेरान देवताह चुरेल नाह सुतो, एने जा कुणी फाय तारा देवता सापड़ती, तो जिवतालो नाय वोची, एने मार फाय तारो जो काय सापड़ी, ताह तारा बाय बोन्दान ओंगाण ओलखीन राखले।" काहाकाय याकुबाह नाह मालुम एतो काय राहेल तान गेरवान देवताह चोरीन लायेल हे।

33 ज्य होमलीन लाबान याकुब एने लिया एने दुयू पावेरन्युन तोम्बु माय गीयो; एने ताहरो ताह कायच नाह सापेड़नो, तेवी तो लियान तोम्बुम रेन निकलीन राहेलीन तोम्बु माय गीयो। 34 राहेल ते तान आबाख ने देवताह उटड़ान काठीम मेलीन ता पोर बोह रियेल एती, लाबान आखा तोम्बुम सापलीन हुद्यो पुण ताह नाह सापड़ना। 35 राहेल तीन आबाख केयी, "एय मालीक; मी तार ओंगाण उबरेय नाह सिकेत केरीन नाराज मा इय काहाकाय माहु फाड़को आव रिनोह।" तेवी इह केरीन लाबानाह होदीन बी तान गेरान देवता नाह सापड़ना।

36 तेवी याकुब रागाईन लाबानाह केयो, "मारो काय गुनो हे?" "मी काय पाप किरेल हे, काय तु उलो रागाईन मार पासाण पोड़नो? 37 तु जो मारी आखी वोस्तुह तु सापलीन दिख्यो, ते तुवाह तारा गेरान आखी वोस्तु माय रेन काय सापड़नो? काह सापड़नो एय ते ताह न्या तारा एने मारा बायबोंदान सोमोर मेल दे, एने ता आपणा दुयान विचीम न्यायनिवाड़ो केरी। 38 मी तार फाय विह वोरह्या रेन तारी चाकरी किऱ्यो, एने न्या माय नाह ते तारा मेंड्रा बोकड्यान गेरबा पोड़ना, एने नाह ते तारा मेंढान माह मी केदी खादो। 39 एने जाह जेंगली जेनवारे मार टाकताला, तेवी मारा टोलाम रेन तुवाह पुशो फिराव देतालो, तान नुकसानी मीच विसतालो; दिह्या नाह ते राती चोराय जाताला, ते तु मारीस फाय ताह लेय लेतालो। 40 दिह्या ते दोपाम मारी ताकेत उबाराम कोम एय जाताली एने राती ईवाला माय मारी निंद उड़ जाताली। 41 विह वोरह्या वोर मी तार गेराम रिनो; चोवदा वोरह्या ते मी ताऱ्यु दुय सोरीन केरता, एने सोव वोरह्या मेंड्रा बोकड्यान केरता तारी चाकरी किऱ्यो; तीबी तु दोह वारीन मारी मोंजरीह बोदली दिनो। 42 पुण मारा आबाख ने बोगवान, मतलब अब्राहाम ने बोगवान, जान बिय इसाहाक बी मानेह, केदी तो मार उगे नाय रितो, ते जोरूड़ तु माहु ठाल्ली आथेच मोकली दितो। एने मारा दुख एने मारा आथान मेहनेतीह देखीन बोगवान गियी राती तुवाह जुल्यो।"

43 तेवी लाबान याकुबाह केयो, "ज्यी सोऱ्यु ते मारीच हेत्यु, एने ज्या सोरा बी माराच हेते, एने ज्या मेंड्रा बोकड्या बी माराच हेते, एने जो काय तुवाह देखाह तो सोब मारोच हे पुण एवी मी मारी ज्यु सोऱ्युह एने न्युन सोराह काय केर सेकथु? 44 केरीन एवी तु आव मी एने तु, दुयू आपसाम वाचा बांदता, एने ती वाचा ईर रेणेन केरता देगड़ान खांब बोणावता एने तो मारी एने तारी विचीम पुरावो बोणीन रेय।"

45 तेवी याकुब एक दिगोड़ लावीन तान खांम उबो किऱ्यो। 46 एने याकुब तान बायबांडलाह केयो, "दिगोड़ टुलो किरो!" ज्य होमलीन ता दिगोड़ टुलो केरीन पाल लागाड्या, एने तिच देगड़ान पालीन आहने बोहीन ता रूटो खादा। 47 ता जागान नाव लाबान जेगार सहुदा* मिल्यो, पुण याकुब तान नाव गिलियाद मिल्यो। 48 लाबान केयो, "ज्यी देगड़ान पाल आज रेन तारी एने मारी विचीम पुरावो रेय।" केरीन ता जागान नाव गिलाद* मेलाय गीयो। 49 एने मिस्पा *बी; काहाकाय तो केयो, "जेवी आपु एक दिहरा हेऱ्या रेन सेटा रेय।" तेवी बोगवान तुवाह एने माहु होमाली। 50 केदी तु मारी सोऱ्युह तेकलीत दिहे, त्युन सावाय दिहऱ्यु बायकु हिऱ्यो वाराड़ किरहे, ते आपणी हेऱ्या काल्लो माणुह ते नाय रेय; पुण देख बोगवान तारी विचीम पुरावो रेय। 51 पुशो लाबान याकुबाह केयो, "ज्यी पालीह देख एने ज्या खांबाह बी देख, जाह मी आपणी एने तारी विचीम उबराखेल हे। 52 ज्यी पाल एने खांब दुयू ज्यी वातीन पुरावो रेती काय नुकसान केरनेन विचार केरीन ज्यी पालीह उणखीन तार फाय नाय जाव, नाय ते तु ज्यी पालीह एने ज्या खांबाह उणखीन मार फाय आवहे। 53 केदी आपु ज्यी वाचा तोडुह ते अब्राहाम नाहोर एने तान आबोख न्या तीन जाणान बोगवान हे, तोच आपु दुय जाणान विचीम न्यायनिवाड़ो केरी।" तेवी याकुब तान सुगोण खादो जान बिय तान आबोख मानतालो। 54 एने याकुब ता बोयड़ा पोर एक जेनवेर बोली चेड़ायो, एने तान आखा बायबोंदाह खाणो खाणेन केरता हाद्यो एने ती राती ता बोयड़ा पोरच रेना। 55 विगोच उठीन लाबान तान सोऱ्युह, एने नातण्याक गुल्या देन एने बोरकेत आपीन तान गेर जात रिनो।