उत्पत्ती 48

याकुब मनश्शे एने एप्रेमाह बोरकेत आपणे

1 ज्यी वातुन पासाण एक माणुह युसूफाह केयो, "हुमेल तारो आबोख दुखाऱ्यो हे।" तेवी तो मनश्शे एने एप्रेम नावान तान दुय सोराह लेन तान आबाख एरने गीयो। 2 कुण तीबी याकुबाह केय देनो, "तारो सुरो युसूफ तार फाय आवणे बाज रिनोह," तेवी याकुब बोलेच खाटला पोर रेन उठीन बोह गीयो। 3 ओवतो याकुब युसूफा केयो, "आखी ताकेतवालो बोगवान कनान देसावाला लुज हेयरान आहने माहु देरसेन आपीन बोरकेत आप्यो।✝48:3 उत्पत्ती 28:13-14 4 एने केयो, ‘हुमेल, मी तुवाह जुलूम बोरकेत आपीन वोदाडुह, एने तुवाह राज राजान वोस ने मुखी बाणावुह, एने तार पासाण तारी वोसीह ज्यो देस आपुह, ता माय तो हामेशा वोर तान सोतान बुय बोणीन रेय।’ "

5 "एने एवी तारा दुयू सोरा, जा मिस्र माय मार आवणेन पेल पायदा इयेल हेते, ता माराच केवाती; मतलब जिह केरीन रूबेन एने शिमोन मारा सोरा हेते, तिहेच केरीन एप्रेम एने मनश्शे बी मारा सोरा केवाती। 6 एने तान पासाण जा सोरा पायदा एती, ता तारा ते केवाती; पुण वाटाणेन बुखेत ता तान बायाख ने वोसी माय गेणाय जाती। 7 जेवी मी पद्दान माय रेन आवतालो, तेवी एप्रात पोचणेन थोड़ोक आहनेच पेल तारी आहख राहेल कनान देसाम वाटे मार सामनेच मोर गीयी; एने मी तीह ताच मतलब एप्रात जो बेथलेहेम बी केवाथे ताच ने वाटे बुज्यो।"✝48:7 उत्पत्ती 35:16-19

8 जेवी याकुबाह युसूफान सोराह दिख्यो, तेवी तो फुशो, "ज्या सोरा कुणीन हेते?"

9 तेवी युसूफ तान आबाख केयो, "ज्या मारा सोरा हेते, जा बोगवान माहु न्या आपेल हे।"

तेवी तो केयो, "न्याह मार फाय लेन आव काय मी न्याह बोरकेत आपु।" 10 याकुब जुलूम डायो एय जायेल इतो एने तान निजेर कोम एय जायेल एती, केरीन ताह हाज केरीन नाह देखातालो; तेवी युसूफ ताह तान आहने ली गीयो; तेवी याकुब ताह गुल्या दिन गिले लागाड़ लिदो। 11 तेवी याकुब युसूफाह केयो, माहु आसा नाह एती, काय मी तारो मुय पुशो देख सेकुह : पुण देख, बोगवान माहु तारी वोस बी देखाड़ेल हे। 12 तेवी युसूफ ताह तान आबाख ने खोलाम रेन सिटो केरीन एने तान मुय निचो केरीन तान आबाख वोंद्यो।

13 तेवी युसूफ ता दुय सोराह लेन, मतलब एप्रेमाह तान जेवड्या आथा उगे काय तो इस्राएलान डाखऱ्यो आथ पुड़े; एने मनश्शेह तान डाखरी आथा उगे काय इस्राएलान जिवड्यो आथ पुड़े, इहकेरीन ताह तान आहने ली गीयो। 14 पुण याकुब तान जिवड्यो आथ लाम्बो केरीन एप्रेमान मुंडा पोर एने डाखऱ्यो आथ लाम्बो केरीन मनश्शेन मुंडा पोर मेल दिनो; तो ते जाण जोवीन ओहलो किरेल इतो, नाह ते डावालो सुरो मनश्शेस इतो। 15 ओवतो तो युसूफाह बोरकेत आपीन केयो, "बोगवान जान सामने मारा बापदादा अब्राहाम एने इसाहाक चालताला, तोच बोगवान मारो जेल्मो रेन ते आजीन दिह वोर मारो गोवाल बुणेल हे! 16 एने तोच खुबऱ्यो माहु आखी खाराबी माय रेन सुड़ोवती आयेल हे, तोच न्या सोराह बोरकेत आपी; एने मारा बापदादा अब्राहाम एने इसहाकान केवाय; एने देरती पोर जुलूमच वुदे।"

17 जेवी युसूफ दिख्यो काय मारो आबोख तान जीवड्यो आथ एप्रेमान मुंडा पोर मिलेल हे, तेवी ज्यी वात ताह खाराब लागी; केरीन तो तान आबाख ने आथ देर लिदो, काय एप्रेमान मुंडा पोर रेन विसीन मनश्शेन मुंडा पोर मेल देय। 18 एने युसूफ तान आबाख केयो, "एय आबा इही नाह; काहाकाय डावालो ज्योच हे; तारो जीवड्यो आथ ज्यान मुंडा पोर मेल।"

19 पुण तान आबोख केयो, "नाह मार सोरा, माहु मालुम हे काय मनश्शेच पेल पायदा इयेल हे, एने तान वोसीन माणहे बी मोठा बोणती; पुण ज्यान आतल्यो बाहख ज्याह रेन वोदार मुठो बोणी, एने ज्यान वोसी पोर रेन जुलूम मोटला देसे निकेलती।"

20 ओवतो तो ते दिहच इही ज्य केन बोरकेत आप्यो, "इस्राएली माणहे तारो नाव लेय लेन ओहली बोरकेत आप्या केरती, बोगवान तुवाह एप्रेम एने मनश्शेन गेत बाणाव देय।" एने तो मनश्शेन पेल एप्रेमान नाव लिदो।

21 तेवी याकुब युसूफाह केयो, "देख मी ते मोरने माय हे पुण बोगवान तुमरी आरही रेय, एने तुमूह तुमरा डायडायान देसाम पुशो पोचाड़ देय। 22 एने मी तुवाह तारा बायाख रेन होवटो बुईन ईसो आपथु, जाह मी एमोरी माणहान आथाम रेन तालवार एने दोंदलीन जोरा पोर रेन जिकेल हे।"