1 याकुब कनान देसाम रेतालो, जा तान आबोख पाराया देसावालो बोणीन रेतालो। 2 एने याकुबान वोसीन वातु ज्यी हेत्यु, युसूफ सतरा वोरह्यान इतो, तेवी तो तान बायाख हिऱ्यो मेंड्रा बोकड्याह चारतालो; एने तो सुरो तान आबाख ने बायकु बिल्हा एने जिल्पान सोरा हिऱ्यो रेतालो; एने तान खाराब कामान खुबेर तान आबाख फाय पोचाड़तालो।

3 एने याकुब *तान आखा सोराह रेन वोदार मोंग युसूफाह केरतालो, काहाकाय तो तान डायावारान सुरो इतो। तो युसूफान केरता रेंगी बिरेंगी डेगलो बाणावायेल इतो। 4 पुण जेवी तान बाहख देख्या, काय आपणो आबोख आपु आखा बायाख रेन वोदार युसूफा मोंग किरेह, केरीन ता ताह कुयराणे बाज गीया, एने ता हेऱ्या हाज केरीन वातु बी नाह केरताला।

5 एक दिह युसूफ होपनो दिख्यो; एने जेवी तो तान बायाख तान बाराम केयो, तेवी ता ताह उंजु होवटाह नफरथ केरने बाज गीया। 6 तो ताह केयो, "जो होपनो मी दिखेल हे, तो हुमलो। 7 आपु आखा जाणे खेता माय पुला बांदणे बाजरेनाह; तेवी मारो पुलो उठीन उबरेय गीयो; एने तुमरा आखान पुला मार पुलान कावदेन उबरीन ताह वोंदताला।"

8 ज्य होमलीन तान बाहख ताह केयो, "काय तु आमरी पोर खेरीच राज किरहे? एने आमु पोर आदिकार मिलहे?" केरीन ता तान होपनान केरता ताह उंजु बी वोदार कुयराणे बाज गीया।

9 तेवी युसूफ पुशो एक उंजु होपनो दिख्यो, एने तान बाराम बी बायाख केयो, "हुमलो मी उंजु पोशो एक होपनो दिखेल हे, काय दिह एने चांद एने इग्यार तारा माहु वोंदणे बाज रेनाह।"

10 ज्य होपनो तो तान आबाख एने तान बायाख केयो; तेवी तान आबोख ताह जुलीन केयो, "ज्य कोहलो होपनो दिखेल हे तु? काय खेरीच मी एने तारी आहख एने तारा बाहख सोब आवीन तार ओंगाण बुई पोर पोड़ीन वोंदती?" 11 तान बाहख ते ताह कुयराताला; पुण तान आबोख तान ती वातीह एर मिल्यो।✝

12 एक दिह युसूफान बाहख तान आबाख ने मेंड्रा बोकड्याह चारनेन केरता शेकेम माय गीया। 13 तेवी याकुब युसूफाह केयो, "तारा बाहख ते शेकेम माय मेंड्रा बोकड्याह चारने बाज रेना एती, केरीन तु जा, मी तुवाह ता फाय मोकलथु।"

तेवी युसूफ जापाप आप्यो, "होव मी जाथु।"

14 तेवी याकुब युसूफाह केयो, "तु जा तारा बायाख ने एने मेंड्रा बोकड्यान हाल देखीन आव काय ता हाजे हुखेस ते हेते, उवतो मार फाय खुबेर लेन आव, तेवी तो ताह हेब्रोन ने खोयरा माय मोकली दिनो, एने तो शेकेम माय आवो।" 15 एने शेकेम माय वाट चुकीन इही तिहे बोटेकतालो, तेवी एक माणुह ताह फुशो "तु काय हुदेह?"

16 युसूफ केयो, "मी ते मारा बायाख होदणे बाज रिनोह, गीण केरीन माहु केय दे, काय ता मेंड्रा बोकड्याह काहरीह चारने बाज रेनाह?"

17 तो माणुह केयो, "ता ते न्या रेन जात रेनाह; एने मी ताह ज्य केताला हुमलेल इतो, चाला, आपु दोतान गावा माय जाता।" केरीन युसूफ तान बायाख ने पासाण चाल पोड़नो, एने ताह दोतान माय सापड़ायो।

18 युसूफान बाहख ताह सिटोच रेन आवतालो देख्या, एने ता आहने आवणेन पेल ताह मार टाकणेन हुमच्यो केऱ्या। 19 एने ता आपसाम केणे बाज गीया, "दिखो पुलो होपनो देखणार आवणे बाज रिनोह। 20 केरीन आवो, आपु ओयाह मारीन एगदा खाडा माय टाक देहु, एने इह केय देहु काय एगदो जेंगली जेनवार ताह खाय गीयो एय। ओवता आपु देखहु काय तान होपनान काय फोल एय।"

21 ज्य होमलीन रूबेन ताह तान आथाम रेन वोचाड़नेन विचार केरीन केयो, "आपु ओयाह मारीच नाय टाकहो।" 22 उवतो रूबेन ताह केयो, "लुय मा वोयाड़ो, ओयाह जेंगलान ज्या खाडाम टाक दिवो, एने ता पोर आथ मा उठावो।" तो ताह तान आथाम रेन सोड़वीन आबाख फाय पुशो पोचाड़ने होदतालो। 23 जेवी युसूफ तान बायाख ने आहने पुचनो, तेवी ता तान रेंगी बिरेंगी फाड़का जाह तो पेर रियेल इतो, काढ़ लेदा। 24 एने युसूफाह उखलीन खाडाम टाक देना, तो खाडो हुकेल इतो एने ता माय पाणी नाह एतो।

25 ओवता ता रूटो खाणेन केरता बोह गीया, एने निजेर टाकीन देख्या काय सेटाच इश्माएली माणहान एक टुलो उटड़ा पोर मासालान वोस्तु, एने डिक एने गन्दरस लादीन गीलाद रेन मिस्र उगे जाणे बाज रेनाह। 26 तेवी यहुदा तान बायाख केयो, "आपणा बायाख मारने एने तान खुन लिकाड़नेन काय फायदो रेय? 27 केरीन आवो, आपु ज्याह इश्माएली माणहान आथाम वेच देता, एने आपणो आथ ता पोर नाह उठावते, काहाकाय तो आपणो बाहख हे एने आपणोच आड़ एने माह हे।" एने तान बाहख तान वात मान लेदा। 28 तेवी मिद्यानी वेपारी ता लागता तान आहने आव पोचना। तेवी ता युसूफाह खाडाम रेन बाहेर काढ़ीन ताह इश्माएली माणहान आथाम विह चांदीन पोयशाम वेच देना; एने ता युसूपाह मिस्र देसाम लेन जात रेना।

29 रूबेन खाडाम फिरीन आवीन दिख्यो काय युसूफ खाडाम नाय मिले; केरीन तो तान फाड़का फाड्यो। 30 एने तान बायाख फाय आवीन केयो, "सुरो ते नाय मिले; एवी मी काहरी जाव?"

31 तेवी ता एक बोकड्याह मारीन तान लुय माय युसूफान फाड़काह बुड़ाव देना। 32 ओवता ता लुय माय बोरायेल फाड़काह तान आबाख फाय मोकलीन ज्यी खुबेर देना; "ज्य आमुह सापड़ेल हे, एने देखीन ओलखी लेय काय ज्य तारा सोरान डेगलो हे काय नाह।"

33 तान आबोख ताह ओलखी लिदो, एने केयो, "होव ज्य मार सोरा डेगलो हे; एगदो खावऱ्यो जेनवार ताह खाय जाईल हे; जोरूड़ युसूफ खावाय जायेल हे!" 34 तेवी याकुब सोतान फाड़का फाड्यो एने कोमराम गोंटो वेटाल्यो, एने तान सोरान केरता जुलूम दिह वोर रेड़ती रिनो। 35 एने तान आखा सोरा-सोऱ्यु ताह साथी आपणेन कोसीत केऱ्या; पुण ताह साथी नाह आवी; एने तो ज्य किति रिनो, मी ते रेड़ती लेन मार सोरा फाय आंदारी केलीम उतेर जाह। इह केरीन तान आबोख तान केरता रेड़तीच रिनो।

36 एने मिद्यानी वेपारी युसूफाह मिस्र देसाम ली जाएन पोतीपर नावान फिरोन राजान एक आदिकारी, एने राखवाल्यान आदिकारी इतो ताह वेच देना।