1 तेवी बोगवान याकुबाह केयो, "न्या रेन निकलीन बेतेल माय जातरे एने ताच रिज्ये; ताहरो मार केरता वेदी बाणावज्ये, जो तुवाह ती टेम माय देरसेन आपेल इतो, जुलबुखे तु तारा बायाख एसावाह बिन नाहीन जातालो।✝"

2 तेवी याकुब तान गेरल्‍याह एने ता सोबाह बी जा ता हेऱ्या एता, ताह केयो, "तुमरी विची माय जा पाराया देवता हेते, ताह काढ़ीन टाको; एने आप आपणा मोनाह चोखा किरो, तुमरा फाड़का बोदली लिवो; 3 एने आवो, आपु न्या रेन निकलीन बेतेल माय जाता; ता मी बोगवानान केरता एक वेदी बाणावुह, जो पिड़ान दिह मारी विन्ता होमलीन जी वाटे मी चालतालो, ता माय तो मार हिऱ्यो रिनो।" 4 केरीन ता जोला पाराया देवता ता फाय एता, एने जोला डुबला तान कानाम एता, ता सोबाह काड़ीन ता याकुबाह आप देना; एने तो ताह शेकेम नावान हेयरान आहने वाहण्यान थुड़ाम बुज दिनो।

5 जेवी याकुब एने तान सोरा तो हियोर सोड़ीन जाताला, तेवी तावाला माणहे ताह सापड़ावीन मार देता, पुण बोगवाना उगे रेन ताह बिय आवी केरीन ता तान पासाण नाह पोड़ना। 6 इह केरीन याकुब एने तान गेराणान माणहे कनान देसान लुज हेयराम पोचना; तोच एवी बेतेल केवाथे। 7 ताहरो याकुब एक वेदी बाणावीन, ता जागान नाव एलबेतेल *मिल्यो; काहाकाय जेवी तो तान बायाख एसावाह बिन नाहीन जातालो, तेवी जिच जागे पेल बोगवान ताह देरसेन आपेल इतो। 8 तेवी रिबीकान हुवारनी दबोरा मोर गियी, एने तिह बेतेल माय वाहण्यान थुड़ाम बुज देना, एने ता वाहण्यान जाड़ान नाव, "अल्लोनबक्कत* मेलाय गीयो।"

9 उवतो याकुबाह पद्दनराम माय रेन आवणेन पासाण, बोगवान ताह दुसरी वार देरसेन आपीन ताह बोरकेत आप्यो। 10 एने बोगवान ताह केयो, "तारो नाव एवी वोर याकुब हे; पुण एवी रेन तारो नाव याकुब नाह, पुण इस्राएल रेय।" इह केरीन बोगवान तान नाव इस्राएल नाव मिल्यो।✝ 11 एने बोगवान ताह केयो, "मी आखी ताकेतवालो बोगवान हे। तु फुले फोले एने वुदे; एने तार पोर रेन एक देस एने देस देसान एक मोठली मोंडली पायदा एय, एने तार वोसी माय राजा पायदा एती।✝ 12 एने जो देस मी अब्राहाम एने इसाहाकाह आपेल हे, तोच देस तुवाह बी आपथु, एने तार पासाण तारी वोसीह बी आपुह।"

13 ओवतो बोगवान ता रेन उपेर जात रिनो।

14 एने जी जागे बोगवान ता हिऱ्यो वातु किरेल इतो, ताहरू याकुब देगड़ान एक खांम उब राखीन ता पोर पिणी बोली एने जेतुन ने तेल टाक दिनो। 15 जाहरोह बोगवान याकुबा हिऱ्यो वातु किरेल इतो, ता जागान नाव तो बेतेल मिल्यो।

16 जेवी याकुब एने तान परिवार बेतेल सोड़ीन जाणे बाज रियेल एता, तेवी एप्रात हियोर थोड़ोक आहनेच रेय जायेल इतो, तेवी राहेलीन फोकड़ाणे टेम आव लागो एने पेटाम दुखणे बाज गीयो। 17 एने तीह जुलूम दुख एतालो तेवी तीन हुवारनी तिह केयो, "मा बिय; एविन फेराह बी तारो सुरोच पायदा एय।" 18 ती ताह सोरान वेला हुदेरताली तेवी मोर गियी, एने तीन जीव निकेलनेन पेल ती ता सोरान नाव बेनोनी *मेली; पुण तान आबोख तान नाव बिन्यामीन *मिल्यो।

19 जेवी राहेल मोर गियी, ते तिह एप्रात माय वाटीन दिड़े तीह बुज्या। एप्रात जो एवी बेथलेहेम नाव से जाणाय जाथे। 20 एने याकुब तीन माहणा पोर एक खांब उब राख्यो, ताह राहेल ने खांब बी केणु, एने तो खांब आज वोर तोहलोच हे। 21 तान पासाण इस्राएल एदेर नावान गुम्मटान ओंगाण जाएन तान तोम्बु उबो किऱ्यो।

22 जेवी इस्राएल ता देसाम वुहेल इतो, तेवी एक दिह ओहलो एनो काय रूबेन जाएन तान आबाख ने पावेरनी बिल्हा हिऱ्यो खाराब काम किऱ्यो; एने इस्राएलाह ज्यी वात मालुम पोड़ताच, जुलूम राग आवो।

एने याकुबान बारा सोरा एता। 23 ता माय रेन लियान सोरा ज्या एता, याकुबान डावालो सोरो रूबेन, एने शिमोन, लेवी, यहुदा, इस्साकार, एने जबुलून। 24 एने राहेलीन सोरा ज्या एता, युसूफ एने बिन्यामीन 25 एने राहेलीन पावेरनी बिल्हान सोरा ज्या एता; दान एने नप्ताली। 26 एने लियान पावेरनी जिल्पान सोरा ज्या एता; गाद, एने आशेर, याकुबान ज्या ओलाक सोरा पद्दनराम माय पायदा इयेल एता।

27 याकुब तान आबाख इसाहाक फाय हेब्रोन ने आहने मम्रे माय गीयो, जाहरो अब्राहाम एने इसाहाक पाराया देसावाला बोणीन रेताला।✝ 28 इसाहाक ने वोय एक होव हांयची वोरह्यान एय गीयी। 29 एने इसाहाक जुलूम डायो इन मोर गीयो, एने तान सोरा एसाव एने याकुब ताह बुज्या।