1 जेवी याकुबाह मालुम पोड़नो काय मिस्र देसाम एन हे, तेवी तो तान सोराह केयो, "तुमू एका दिहरान मुय काहा देखणे बाज रेनाह। 2 पुशो तो केयो, मी हुमलेल हे काय मिस्र माय एन हे; केरीन तुमू ता जाएन आपणी केरता एन वेचाता लेन आवो, तेवी आपु नाय मोरहु पुण जिवताला रेहु।"✝ 3 तेवी : युसूफान दोह बाहख एन वेचाता लेणेन केरता मिस्र देसाम गीया। 4 पुण युसूफान बायाख बिन्यामीनाह याकुब ज्य सोचीन बायाख हिऱ्यो नाह मुकल्यो काय, काहाकाय बिन्यामीन पोर काह दुख नाय आव पोड़ी।

5 इह केरीन जा माणहे एन वेचातो लेणेन केरता आवा ता हेऱ्या याकुबान सोरा बी आवा; काहाकाय कनान देसाम बी जुलूम मुठो काल पुड़ेल इतो। 6 युसूफ ते मिस्र देसान प्रदानमंत्री इतो, एने ता देसान आखा माणहाह तोच एन वेचातालो; केरीन जेवी युसूफान बाहख बी आवा एने तान ओंगाण बुई पोर पोड़ीन वोंद्या। 7 तेवी युसूफ ताह देखीन ओलखी ते लिदो, पुण तान सोमोर बुलो बोणीन वातड़ो बोणीन ताह फुशो, "तुमू कारेन आवाह?"

ता केया, "आमु ते कनान देसाम रेन एन वेचातो लेणेन केरता आयेल हेते।"✝

8 युसूफ तान बायाख ओलखी लिदो, पुण ता ताह नाह ओलख्या। 9 उवतो युसूफ तान होपनाह एर केरीन जो तो तान बाराम दिखेल इतो, एने तो तान बायाख केणे बाज गीयो, "तुमू पालथ्या हेते; ज्या देसान हाल देखणेन केरता आयेल हेते।"

10 तेवी ता ताह केया, "नाह, नाह एय मालीक!" तारा पावोर खेरीच खाणेन वोस्तु वेचात्यु लेणेन केरता आयेल हेते। 11 आमु आखा एकुच आबाख ने सोरा हेते, आमु हुतरा माणहे हेते, आमु तारा पावोर पालथ्या नाय मिले। 12 पुशो युसूफ ताह केयो, "नाह-नाह तुमू ज्या देसान हाल देखणे आयेल हेते।"

13 पुण ता पोशा केया, "आमु तारा पावोर बारा बाहख हेते, कनान देसावाला एकुच आबाख ने सोरा हेते, एने आतल्यो बाहख ज्यी टेम आमरा आबाख फाय हे, एने एक बाहख मोर गीयो।"

14 तेवी युसूफ ताह केयो, "मी ते तुमूह केय दिनो, काय तुमू पालथ्या हेते; 15 तेवी तुमू खेरीच केतेह ज्य जाणनेन केरता मी तुमूह फिरोन ने सुगोण आपथु, जाहुक वोर तुमरो आतल्यो बाहख न्या नाय आवी, ताहुक वोर तुमू न्या रेन निकली नाय सिकहो। 16 केरीन तुमू माय रेन एक जाणाह मोकली दिवो काय तो तुमरा बायाख लेन आवी, ताहुक वोर, तुमू न्याच आमरी देख रेख माय रिहो; इह केरीन तुमरी वातु पारखाय जाय काय तुमू माय खेराय हे काय नाह। केदी खेरा नाय ठेराहो ते फिरोनान जीवणान सुगोण तुमू जोरूड़च पालथ्या सोमजाय जाहो।" 17 उवतो युसूफ ताह तीन दिह वोर जेलीम मिल्यो।

18 तिसरी दिह युसूफ ताह केयो, "एक काम किऱ्‍यो, तेवी जिवताला रिहो; काहाकाय मी बोगवानान बिय मानथु; 19 केदी तुमू खेरीच हाजाला माणहे हेते, ते ओवता तुमू माय रेन एक बायाख न्या आमरी देख रेत मिलो; एने तुमू तुमरा गेरवालान बुख ओलेवणेन केरता एन ले जावो। 20 एने तुमरा आतल्या बायाख मार फाय लेन आवो; इह केरीन तुमरी वातु खेरल्यु केवाय, एने तुमू माराय नाय जाहो।" तेवी ता तिहेच केऱ्या। 21 ता आपसाम केया, "खेरीच आमु आपणा बायाख ने बाराम गुनेगार हेते, काहाकाय जेवी तो रेड़ रेड़ीन विन्ता किऱ्यो, तीबी आपु ज्य देखीन काय तान जीवणो किहीक पिढ़ा माय पुड़ेल हे, तान नाह होमल्या; केरीन आपु बी एवी पिड़ा माय पुड़ेल हेते।"

22 रूबेन ताह केयो, "काय मी तुमूह नाह कियेल इतो, काय ज्या सोरान गुनेगार मा बुणो? पुण तुमू मारी वात नाह होमल्या। दिखो, एवी तान लुयीन बुदलो आपु पोर लेवाय जाथे।"✝ 23 युसूफ एने तान वातु दुयू बाषाम एताली; ता माय ताह मालुम नाह पोड़नो, काय तो तान बोली सोमजेह। 24 तेवी तो ता हिऱ्यो रेन सिटो जाएन रेड़ने बाज गीयो; पुशो तान आहने आवीन पुशो ता हिऱ्यो वातु केरीन, ता माय रेन शिमोनाह निवाड़ काड्यो एने तान सोमोर ताह कोंड लिदो।

25 तेवी युसूफ तान पावराह उकुम आप्यो, काय न्यान थेयला माय एन बुरो एने एक एक जाणान थेयला माय तान पोयशा बी मिल दिवो, एने न्याह वाटीन केरता खाणेन वोस्तु आपो। तेवी : तान पावोर तिहेच केरीन केऱ्या। 26 तेवी ता तान एन गेदड़ा पोर लादीन तारेन चाल देना। 27 देरेमसाला माय जेवी एक जाण तान गेदड़ाह चारो आपणेन केरता तान थियलो उगाड्यो, तेवी तान पोयशा थेयलान मुयाला पोर मिलेल देखाना। 28 तेवी तो तान बायाख केयो, "दिखो मारा पोयशा ते फिराव दियेल हे, ता मारा थेयला माय हेते," तेवी तान जीवाम जिव नाह रिनो, एने ता बिन एक दिहराह देखणे बाज गीया, एने केया, "बोगवान ज्य आमु हेऱ्यो काय किरेल हे?"

29 तेवी ता कनान देसाम तान आबाख याकुब फाय गीया, एने ताह आखी वातु केय होमलाया। 30 "जो एदमी ता देसान मालीक हे, तो आमु हिऱ्यो वातड़ोच वातु किऱ्यो, एने आमु देसान पालथ्या केयो।" 31 तेवी आमु ताह केल्या, "आमु हाजाला माणहे हेते, पालथ्या नाय मिले। 32 आमु बारा बाहख एकुच आबाख ने सोरा हेते, एने एक मोर जाईल हे, पुण आतल्यो बाहख कनान देसाम आमरा आबाख फाय हे।" 33 तेवी तो एदमी जो ता देसान मालीक हे, तो आमुह केयो, "तुमू खेरला माणहे हेते; ज्य ज्या माय मालुम पोड़ जाय काय तुमू माय रेन एक जाणाह मार फाय सोड़ीन तुमरा गेरवालान बुख ओलेवणेन केरता थोड़ोक लिजावो। 34 एने तुमरा आतल्या बायाख मार फाय लेन आवो। तेवी माहु बुरहो एय जाय काय तुमू पालथ्या नाह सोता पुण हाजाला माणहे हेते। उवतो मी तुमरा बायाख तुमूह होप देह, एने तुमू ज्या देसाम लेणो-देणो केर सिकहो।"

35 ज्य किन ता तान-तान थेयला माय रेन एन काढ़ताला; तेवी, काय देख्या, काय एक-एक जाणान पोयशान थेयली ताच ने थेयला माय मिलेल देखीन ता एने तान आबोख जुलूम बिय गीयो। 36 तेवी तान आबोख याकुब ताह केयो, "मी बिगेर सोरान रेय काय? दिख, युसूफ ते नाह रिनो, एने शिमोन बी नाह आवो, एने एवी तुमू बिन्यामीनाह बी ली जाणे होदतेह, ज्यी आखी पिढ़ा मार पोर आव पुड़ेल हे।"

37 रूबेन तान आबाख केयो, "केदी मी ज्याह तार फाय नाय लावु, ते तु मारा दुयू सोराह मार दिजे; तु बिन्यामीनाह मार आथाम होप दे, मी ज्याह तार फाय पुशो पोचाड़ देह।"

38 तेवी तो केयो, "मी मारा सोराह तुमरी हिऱ्यो नाय मोकलु; काहाकाय ज्यान बाहख मोर जाईल हे, एने तो एवी एखालोच रेय जायेल हे; केरीन जी वाटे तुमू जाहो, ती वाटे केदी ज्या पोर काह पिढ़ा आव पोड़ी, ताहार ते तुमरी कारेण मी ज्या डायावाराम दुखाम आंदारी केलीम उतरी जाह।"