प्रकाशितवाक्य 18

बाबिलोन हियोर पोड़ जाणे

1 ज्यान पासाण मी एक उंजु हेरोगदुताह हेरगाम रेन उतेरतालो दिख्यो। ताह मुठलो आदिकार ईतो, एने देरती तान उजाला केरीन चोमेक उठनी। 2 ✝18:2 प्रकाशितवाक्य 14:8तो मोठेस आयड़ीन केयो, "मोटलो बाबिलोन पोड़ गीयो! पोड़ गीयो! तो खाराब जीवान जागु; एने आखी बातीन एठी जीवान ईड्डो एने एकेक एठा एने खाराब चीड़ान ईड्डो एय गीयोह। 3 काहाकाय आखा देस तान दारो मतलब खाराब ने बियावी ओहली आदेतीह पियेल हेते। ज्यी देरतीन राजा ती हेऱ्या खाराब सिनालो किरेल हेते, एने देरतीन वेपारी तान हुख ने कारेण मालदार एती गीयाह।"

4 पुशो मी हेरगा माय रेन ज्यो आवाज होमल्यो:

"एय मारा माणहा! ता माय रेन निकलीन न्या आवो!

एने तान पापा माय तुमू बागीदार मा बुणो;

तेवी ता पोर आवणार डेंडाह रेन वोच सिकहो!

5 काहाकाय तान पाप हेरगा माय वोर पोच गीयो,

एने बोगवान तान गेलेत कामाह ईर किरेल हे।

6 तुमू बी ता हेऱ्या ठिक तोहलोस वेवारो किरो;

जिहकेरीन काय जो तो तुमरी हिऱ्यो किरेल हे।

तान बोदले ताह दुय गुणा आपो,

तुमरी केरता तो वाटका माय दारो बेचकील हे तिहेस केरीन तुमू तान केरता बिचको।

7 काहाकाय जी बोड़ाय एने ईजुत ती आपणे आपाह आपेल हे,

तिहेस केरीन तुमू तीह दुख आपो।"

काहाकाय ती मोना माय किथे रिथे,

"मी राणी हे!

मी रांडायेल नाह सोती,

मी केदी बी काल्लो दुख नाय मोणावु!

8 केरीन ती पोर एकुस दिह्या माय पिड़ा आव पोड़ी, मोत, दुख, एने काल।

एने तीह आक्‍ठा माय हेलगाड़ाय जाय,

काहाकाय तीन नियाव केरनार मालीक बोगवान ताकेतवालो हे।"

9 ज्यी दुनियान जा राजा ती हेऱ्यो सिनालो किरेल एने हुक माय जियेल एता, ता तीन हेलेगताला दुवाड़ाह देखती एने ता तीन केरता रेड़ती एने दुख मोणावती। 10 तीन पिड़ा देखीन ता बियीन सेटा उबरीन केती, "एय मुठलो हियोर बाबिलोन! एय मोजबुत गाव, हाय! हाय! एकताल माय तुवाह सेजा जुड़ गियी!"

11 देरतीन वेपारी तीन केरता रेड़ती एने दुख मोणावती, काहाकाय तान कुण बी लेय नाय; 12 मतलब होनो चांदी, मोंगाला दिगोड़ एने हिरो, हुवाल्ला एने जामण्या फाड़का, रेशमी एने रातला फाड़का, आखी बातीन मोग मोग गेंदाणे लाकड़े एने आथीन दातान बाणायेल वोस्तु, मोंगालो लाकोड़, पितेल, लोखंडो एने गेराम लागणार आखी वोस्तु। 13 एने दालचीनी, मासालो, एसेल गेंदाणार वोस्तु, हालीयान डिक; दारो, तेल, मोयदो, गोव, गाय बुयेल, मेंड्रा बोकड्या, गोड़ा, तांगो, पावोर, सेरीर एने माणहान जीव वोर। 14 वेपारी तीह केती, "त्यु आख्‍यु हाजी वोस्तु जी माय तार जीव खुस एतो, तो आखो एवी खेतेम एय गीयोह, एने तार आखी ईजुत जात रियेल हे, तु एवी ती वोस्तुह केदी बी होद नाय सिकहे!" 15 ता वेपारी जा ज्यी वोस्तुन वोजेसे मालदार बोण जायेल एता, ता आखा तीन पिड़ा माय बागीदार एणेन बिय ने कारेण वोजेसे सेटास उबरेती। ता रेड़ती एने दुख मोणावती,

16 एने केती, "हाय! हाय!" तो मुठलो हियोर हाजा हुवाल्ला, जामण्या एने रातला फाड़का पिर रियेल एतो, एने होनो, मोंगाला दिगोड़, एने हिरामोती माय होबाय रियेल एतो! 17 एकताल माय तीन मालदेन खेतेम एय गीयो!

एकेक डोंडह्यो चालाड़णार एने ता जा डोंडह्या माय पारवास केरतेह, एने मल्लाह जा देरीया माय वेपार केरतेह, सेटा उब रेना। 18 जेवी माणहे तीन हेलेगणेन दुवाड़ाह देखीन आयड़ीन केया: "काय ज्या मोटला हेयरान गेत एगदो दिहरो हियोर बुणील!" 19 ता आखा तान मुंडी पोर रेजड़ो टाकती एने रेड़ती एने दुख मोणावती जाईन केती, मुठलो हियोर "हाय! हाय! ज्यो कोलोक बयंकर एने केठीण हे। ज्यान मालदेनान द्‍वारे देरीयान आखा डोंडह्यावाला मालदार एय जायेल एता, एने एकताल माय ता हेयरान आखो काय उजड़ी गीयो!"

20 एय हेरोग, एने एय बोगवानान माणहा, प्रेरित, जाणकार तीन खेतेम एणेन कारेण खुसी मोणावो! काहाकाय बोगवान तीह ठिक तोहलोस डेंड आपेल हे जिहकेरीन ती तुमूह आपेल एती!

21 पुशो एक ताकेतवान हेरोगदुत मोटली गेरटीन पुड़ान गेत एक देगड़ाह उखील लिदो, एने ज्यो किन देरीया माय जुगार दिनो, "ज्यो मुठलो हियोर बाबिलोन इहीचकेरीन निचो जुगाराय जाय, एने तान केदी बी पुतो नाय चाली। 22 रेणथो वाजाड़नार, गायेक, पावली वाजाड़नार, एने पावलो फुकणारान आवाज पोशो केदी बी तुवा माय होमलाय नाय देय; एने एवी रेन काल्लो बी काम केरनार माणुह कुणूस तुवा माय पोशो केदी बी नाय जुड़ी; एने गेरटी चालाड़नेन आवाज तार माय पोशो केदी होमलाय नाय देय! 23 एने दिवान उजालो तुवा माय पोशो केदी बी देखाय नाय, एने वोवड़ान एने वोवड़ीन आवाज पोशो केदी बी तुवा माय होमलाय नाय देय। काहाकाय तार वेपारी दुनिया माय ताकेतवाला एता, एने देरतीन आखा माणहे तार जुठा चोमेत्कारान वोजेसे बारमाय जायेल एता!"

24 एने देरती पोर माराय जायेल ता आखा बोगवानान माणहान, एने जाणकारान लुय बाबिलोन हेयरा माय सापड़ेल हे।