प्रेरितान काम 21

पौलुसान यरूशलेम माय जाणे

1 जेवी ज्यो कार्यक्रम खेतेम एय गीयो, तेवी आमु ता हेऱ्या रेन आलेग एन डोंडह्या माय निकेलना, ते आमु हुतरा कोस हेयरा माय पोच गीया; एने दिहरे दिह रूदुस माय एने ता रेन पतरा माय गीया। 2 ताहरी फीनीके माय जाणार एक डोंडह्यो मिलनो, आमु ता माय बोहीन चाल पोड़ना। 3 जेवी आमुह साइप्रस देखानो, तेवी ताह डाखरे उगे टाकीन सीरीया निही जाईन सुर माय उतेरना। काहाकाय ताहरी डोंडह्यान सामान उतारनु एतो। 4 ताहरी आमु थोड़ाक विश्वासी जुड़ना, एने आमु ता हेऱ्या एक एप्तो वोर रेना। चोखाला जीवाम बोरायीन पौलुसाह केया तु यरूशलेम माय मा जाहे। 5 जेवी ताहरी आमरो रेणेन टेम पुरो एय गीयो, ते आमु ता रेन चाल देना। एने आखान बायकु एने सोरा बेल आमुह गावान बाहेर देरीयान दिड़े वोर पोचाड़ने आवा, एने आमु आखा मांड्या वोलीन विन्ता केऱ्या। 6 एने एका दिहरा हेऱ्या रेन आंगे एन आमु डोंडह्या माय बोह गीया, एने ता आप आपणे गेर पोशा वोलीन जात रेना।

7 तेवी आमु सुर रेन पाण्याम जाणो पुरो केरीन पतुलीमयीस माय पोचना, एने विश्वासी बायाख मिलीन आमु ता हेऱ्या एक दिह रेना। 8 ✝21:8 प्रेरितान काम 6:5; 8:5ओवता दिहरे दिह आमु ता रेन निकलीन केसरीया माय आवा। एने हाजाली खोबरीन पारचार केरनारान फिलीपुसान गेर जाईन ता फाय थोबना, जो हात माय रेन एक ईतो। 9 तान चार कुवाऱ्यु सोर्‍यु एत्यु ज्‍यु बोगवाना फाय रेन आवणार जाणाव ने पारचार केरताल्यु। 10 ✝21:10 प्रेरितान काम 11:28जेवी आमुह ताहरी रेतालान मोकता दिह एय गीया, ते यहुदिया रेन अगबुस नावान एक जाणाव केरनार ताहरी आवो। 11 तो आमरी फाय आवीन एने पौलुसान पोट्टो लिदो, एने तान आथ पाय बांदिन केयो, "चोखालो जीव इहकेरीन किथे काय ज्यो पुट्टो जा माणहान हे ताह यरूशलेम माय यहुदि माणहे इहकेरीन बांदती, एने बिगेर यहुदिन आथा माय होपती।"

12 जेवी आमु ज्‍यु वातु होमल्या ते आमु एने ताहरी वाला माणहे बी पौलुसाह यरूशलेम जाय मा, इहकेरीन विन्ता केऱ्या। 13 पुण पौलुस जापाप आप्यो, "तुमू ज्यो काय केरतेह काय रेड़ रेड़ीन मारा मोनाह तोड़तेह? मी ते मालीक यीशुन नावान केरता यरूशलेम माय नाह निस्तो बांदाणे ओलोस पुण मोरनेन केरता बी तियार हे।"

14 जेवी पौलुस नाह मान्यो, ते आमु ज्यो केयीन ठावका एय गीया, "मालीकान मोरजी पुरी एय।"

15 थोड़ाक दिह काड़नेन बाद, आमु आमरी तियारी केरीन यरूशलेमान उगे चाल देना। 16 *21:16 एने जान गीर आमु रेण्या एता तान गीर आमुह ली गीया; नाहते जान गेरा माय आमु रेण्या एता ता माणहाह आमरी हेऱ्या ली आवा।केसरीया माय रेन बी थोड़ाक चेला आमरी हेऱ्या चाल देना, एने आमुह साइप्रसान मनासोन नावान एक जुनाला विश्वासी फाय ली गीया, काय आमु ता फाय रेहु।

पौलुस याकुबाह मीलाणे

17 जेवी आमु यरूशलेम माय पोचना, ते विश्वासी बाहख जुलूम खुसी माय आमरो स्वागत केऱ्या। 18 तेवी दिहरे दिह पौलुस आमुह लेन याकुब फाय गीयो, जाहरी आखा मोंडलीन डावाला टोलवाय रियेल एता। 19 तेवी पौलुस ताह नमस्‍कार केरीन जो जो काम बोगवान तान सेवान द्‍वारा बिगेर यहुदि माय किरेल ईतो, एक एक केरीन आखो केयो। 20 ज्यो होमलीन ता बोगवानान बोड़ाय केऱ्या, एने पौलुसाह केया, "एय बाहख, तु ते दिखेह काय यहुदि माय रेन एजार माणहे बुरहो किरेल हेते, ता आखा नेमान बाराम उत्साही रेणारे हेते। 21 एने ताह तारे बाराम कियेल हेते काय तु बिगेर यहुदि माय रेणाराह यहुदिह ज्यो हिकाड़ेह काय मुसान नेमाह सोड़ देणेन हिकाड़ेह, एने किथे काय तुमरा सोरान खेतना मा केरावो, एने रित्यु पोर मा चालो। 22 ते ओवतो काय किरज्‍यो? माणहे जोरेवरी ज्यो होमेलती काय तु आयेल हे। 23 केरीन आमु तुवाह जो केतेह तो केर, जा मन्नत मानेन हेते, ओहला आमरे माय चार जाणे हेते। 24 *21:24 ता आखा टाली केऱ्या। देखी 18:18 ताह लेन ता हिऱ्यो जाईन चोखो केरनाराम बेचकाय जा, एने ताह खीरचो आप काय ता तान मुंड बोड़ावे। तेवी आखा माणहे जाण जाती काय ज्‍यु वातु तार बाराम ताह कियेल एत्यु त्यु ते खेरी नाह, पुण ज्यो काय तु खुद बी मुसान नेमाह पालेन केरती लेन तान गेत चालेह। 25 ✝21:25 प्रेरितान काम 15:29पुण ता बिगेर यहुदिन बाराम जा बुरहो किरेल हेते, आमु ज्यी राय केरीन चिट्ठी लेख मोकलेल हेते काय मुरतीन सामने बोली किरेल माह एने लुयीह रेन, गिलो दाबीन मारील जेनवेरान माहाह रेन, एने सिनालाह रेन वोचीन रिवो।"

26 तेवी पौलुस ता माणहाह लेन दिहरे दिह ता हिऱ्यो चोखो एन मोंदिर माय गीयो, एने ताहरी केय दिनो काय चोखो एणेन दिह केवीह पुरा एती, आपणे माय रेन आखान केरता बोली केवीह चेड़ावाय जाय।

मोंदिर माय पौलुसान देराणो

27 जेवी ता हात दिह पुरा एणेन एता, तेवी आसीया ईलाकान यहुदि पौलुसाह मोंदिर माय देखीन आखा माणहाह बोड़काव देना एने पौलुसाह देर लेदा। 28 एने ता आयड़ीन केया, "एय इस्राएली! आमरी मोदेक किरो! ज्यो तोस एदमी हे, जो इस्राएली माणहान, एने मुसान नेमान, एने ज्या मोंदिरान विरोद माय आखी जागे आखा माणहाह हिकाड़ेह, न्या वोर काय बिगेर यहुदिह बी मोंदिर माय लावीन ज्या चोखाला मोंदिराह विटाल दियेल हे!" 29 ✝21:29 प्रेरितान काम 20:4ता ज्यो ज्यानकेरता कियेल, काहाकाय ज्यान पेल त्रुफिमुस नावान इफीसीह पौलुस हिऱ्यो हेयरा माय दिखेल एता, एने ज्यो सोमज्या काय पौलुस ओयाह मोंदिर माय लेन आयेल हे।

30 तेवी आखा हेयरान माणहे बोड़ेक उठना, एने आखा माणहे दोवड़ीन टोलवाय गीया, एने ता पौलुसाह देरीन मोंदिर माय रेन बाहेर गीहलीन लावा, एने चालोच बायणो बोंद केर देना। 31 जेवी माणहान गेरदी पौलुसाह मार टाकणे होदताला, तेवी रोमी टोलान सेनापोती फाय ज्यी खुबेर पोचनी काय आखा यरूशलेम माय देंगो एय जायेल हे। 32 तेवी तो चालोच सिपायाह एने आदिकारीह लेन माणहान उगे दोवेड़ पोड़नो, एने जेवी माणहे सेनापोती एने सिपायाह देख्या, ते पौलुसाह देणेन बोंद केर देना। 33 तेवी सेनापोती पौलुसान आहने आवो, बोंदी बाणाव लिदो; एने दुय हाकुल केरीन बांदणेन उकुम आपीन फुसणे बाज गीयो, "ज्यो कुण हे, एने ज्यो काय किरेल हे?" 34 पुण गेरदी माय रेन कुण काय एने कुण काय आयेड़ते रेना, एने ता देंगान वोजेसे जेवी तो खेरी वात नाह सोमेज सेकनो, ते पौलुसाह किल्‍ला माय ली जाणेन उकुम आप्यो। 35 जेवी पावतीरी पोर पोचना ते बिड़ माय पुसरेल हिंसान केरता पौलुसान रेकशान ईसाब माय सिपाय पौलुसाह उखलीन ली जाणे पोड़नो। 36 काहाकाय माणहान गेरदी इहकेरीन आयेड़ते लेन तान पासाण पुड़ेल एती, "ज्याह खेतेम केर दिवो।"

पौलुस खुद ने बचाव केरने

37 जेवी सिपाय पौलुसाह किल्‍ला माय ली जाणे केरताला, तेवी पौलुस सेनापोतीह फुशो, "मी तुवाह काह केय सेकथु?" तेवी तो पौलुसाह फुशो, "काय तु युनानी बाषा जाणेह? 38 काय तु मीस्री माणुह ते नाह, जो थोड़ाक दिह्यान पेल विद्रोह सुरू केरायेल ईतो, एने चार एजार आथ्‍यारबंद आतंगवादी माणहाह जेंगला माय आगवाय केरने बाजरियेल ईतो?" 39 पुण पौलुस केयो, "मी ते तरसुस ने यहुदि माणुह हे, किलीकीयान नाव लायेल हेयरा माय रेणार हे। मी तुवाह विन्ता केरथु काय माहु माणहा हिऱ्यो वातु केरने दे।" 40 जेवी सेनापोती उकुम आप्यो, ते पौलुस पावतीरी पोर उबरीन माणहाह आथा केरीन ठावका किऱ्यो। जेवी ता ठावका एय गीया, तेवी पौलुस इब्रानी बाषा माय बोलने बाज गीयो।