1 फारस देसान कुस्रु राजान राज्‍यान तीसरे वोरीह दानिएल पोर, जो बेलतशस्सर बी केवाथे, ओंगाणली वातुन बाराम मालुम पोड़नो। एने ती वात खेरी एती एने मोट मोटली लेड़ायीन बाराम एती। दानिएल त्यु वातुह सोमजी गीयो। त्यु वातु दानिएलाह देरसेन माय सोमजाड़ीन कियेल एत्यु।

2 दानिएल किथे, "ती टेम, मी दानिएल, तीन एप्‍ता वोर जुलूम दुखी रिनो। 3 ता तीन एप्‍ता पुरा एता वोर, मी पुटे तोहलो खाणो नाह खादो एने माह केदिस नाह खादो, एने अंगुरान रूह नाह पिदो, एने सेरीर पोर तेल नाह लागाड्यो।"

4 वोरह्यान पेल्ला मोयनान चोवविसवे दिहे मी हिद्देकेल नावान मोटली नेदीन दिड़े उब रियेल इतो। 5 ताहरी उब उबोस जेवी मी उपेर दिख्यो, ते ताहरी मी एक एदम्याह होणीन फाड़का पेर रियेल, एने ऊफाज देसान कुन्दन केरीन तान कोमराम चोखाला होनान पुट्टो बांद रियेल इतो। 6 तान सेरीर फिरोजा पिपेलन्या देगड़ान गेत एता, तान मुय हेलेगताला दिवान गेत एतो, तान आथ पाय चोमकाड़ेल पितलान गेत एता, एने तान बोल माणहान बिड़ीन गेत इतो।

7 ज्‍य देरसेन देखणार, मी दानिएल एखालोच इतो, जा माणहे मार हेऱ्या हेते, ता माणहे ता देरसेनाह नाह देख सेक्‍या; पुण तीबी ता ओला बिय गीया काय सेटा दोवड़ीन जाएन लिकाय गीया। 8 ओवतो मी एखालोच रेय गीयो, तेवी मी एक देरसेन दिख्यो, पुण देरसेन देखणेन बाद मार माय ताकेत नाह रेनी; मारो मुरेल ने गेत मुय बिय ने कारेण हुक गीयो, एने मी कोमजोर एय गीयो। 9 ओवतो मी देरसेन माय ता माणहाह वातु केरतालो होमल्यो, मी तान बोलाह होमेलताच बुई पोर जाय पोड़नो एने निंदीम गारायीन बुई पोर पोड़ रिनो। 10 एगदान एक आथ माहु आथल्‍यो, एने माहु उठाड़ीन मांडान एने तेलसान साहारे थेर थेर केरावतेन बोहाड़ दिनो।

11 तेवी हेरोगदुत माहु केयो, "एय दानिएल, तु बोगवानान जुलूम मोंगाल्लो हे, जो वचन मी तुवाह केथु, ताह सोमजी ले; एने हुतरो उबरी, काहाकाय माहु तार फाय मोकलेल हे।" तो इहकेरीन केताच मी उबरी गीयो पुण मी एवी बी कापणे बाजरियेल इतो, काहाकाय मी बिय रियेल इतो।

12 ओवतो तो माहु केयो, "एय दानिएल, मा बिय, जे दिह रेन तु बोगवानान सामने सोताह गेरबोड़ो बाणावीन सोमेजणेन मोन लागाड्यो, ते दिह रेन बोगवान तारी विन्ता होमेलते रियेल हे, तु विन्ता केरते रियेल हे, केरीन मी तार फाय आयेल हे। 13 पुण फारस ने राज्‍यान हेरोगदुत एकविस दिह वोर मार हिऱ्यो लेड़ाते रिनो, एने माहु तारास दिते रिनो; पुण हेरोगदुता माय रेन मिखाएल जो मुखी हेरोगदुताम रेन हे, तो मारी मोदेक ने केरता आवो, केरीन मी फारस ने राजा फाय रिनो। 14 एय दानिएल, एवी मी तार फाय तुवाह तो सोमजाड़ ने आयेल हे, काय सेवेटल्‍या दिह्याम तार माणहान देशा काय एय; काहाकाय जो देरसेन तु दिखेल हे, तो थोड़ाक दिह्यान बाद पुरो एय।"

15 जेवी तो माणुह मार हिऱ्यो बोलतालोन, मी डोंगो वोलीन बुई पोर मुंड टेकाड्यो; एने मी बोल नाह सेकतालो। 16 तेवी माणहान गेत देखाणार हेरोगदुत मार ओठाह सापल्‍यो, ओवतो मी मुय उगाड़ीन बोलने बाज गीयो। एने जो मार सामने उबरियेल इतो, ताह मी केयो, "एय मारा मालीक, मी देरसेन माय जो दिखेल इतो, तासे मी दुखी एने बिय जायेल हे, एने मार माय काय ताकेत नाह रेनी। 17 मी तारो सेवक दानिएल हे, मी तुवा हिऱ्यो किहीक वातु केर सेकथु? काहाकाय मार माय नाह ताकेत रेनी, एने हांह लेणे बी माहु केठीण हे।"

18 तेवी माणहान गेत देखाणार माहु पुशो सापलीन ताकेत आप्यो। 19 ओवतो तो केयो, "दानिएल बिय मा, बोगवान तुवाह जुलूम मोंग किरेह; तुवाह सान्ती जुड़ी! मोजबुत एन ईमोत बांद।"

तो ज्‍य केतास माहु ताकेत जुड़नी एने मी केयो, "एय मार मालीक, बोल, काहाकाय तु माहु ताकेत आपेल हे।"

20 तेवी तो केयो, "दानिएल, मी तार फाय काहा आवो, तुवाह मालुम हे काय? एवी मी फारस ने हेरोगदुता हिऱ्यो लेड़ाणेन केरता माहु पोशो जाणु हे; जेवी मी जाह, तेवी ग्रीसान हेरोगदुत आवी। 21 पुण दानिएल, मार जाणेन पेल तुवाह आखान पेल माहु ज्‍य केणु हे काय खेरायीन पुस्तेक माय काय लिखेल हे; ता खाराब हेरोगदुतान विरूद माय मिखाएल हेरोगदुताह सोड़ीन मार हिऱ्यो कुण नाह उबरेत, मिखाएल तारा माणहा पोर राज केरनार हेरोगदुत हे।